Read urhobo Izikiẹl 38 Bible Online

Izikiẹl 38 - urhobo bible

Izikiẹl 38

¹Ota rẹ Ọrovwohwo de bru vwe rhe:

²Ọmọ rẹ ohwo, tọn opharo wẹn vi Gọg, rọ hẹ otọ ri Magọg, olori rẹ isun ri Mẹshẹk kugbe Tubal, re wọ mraro kpahe ayen

³wọ ta, Enẹ Ọrovwohwo Ọghẹnẹ tare: Nighere mi mukpahe owẹ Gọg, olori rẹ isun ri Mẹshẹk kugbe Tubal,

⁴mi ku we rhẹriẹ, ke me vwẹ eghọre sa ọhwa wẹn, ki mi kpono uwe phia, vẹ usun rẹ ofovwi wẹn, iyesi vẹ ihwo re gua ayen, ayen ejobi nabọ ghwa ekpọfia họ, usun rẹ ihwo buebu, ayen ejobi vẹ oshuẹ vẹ agada kugbe elọkọ re go,

⁵Pẹsha, Kush, kugbe Put vẹ ayen gba herọ, ayen ejobi vẹ erhu kugbe ekpọfia,

⁶Gomar vẹ otu rọye, Bẹttogarmah ro nẹ obo ẹtan rẹ obọhwẹre ọnre rhe vẹ otu rọye — ihwo buebu vẹ owẹ herọ.

⁷Muegbe rere wọ choma, wẹ vẹ urogho na re vẹ owẹ gba ghwẹ koko na, rere wọ dia egbe kẹ ayen.

⁸Ẹdẹ buebu da wan nu ku wọ cha ghwẹ koko gbidi, vwẹ ikpe re cha vwẹ obaro na ku wọ ra vwẹ ofovwi vwọ so otọ na re si nẹ obọ rẹ ofovwi na, otọ rẹ ihwo da rhe ghwẹ koko nẹ ẹgborho buebu rhe rhi koko vwẹ igbenu rẹ Izrẹl, ra kua jovwo rhabae; ihwo ra ghwẹ nẹ ẹgborho na rhe. Asakiephana egbemọphẹ kọye ayen epha, ayen ejobi re kpae.

⁹Ku wọ yan hẹ obaro, ra yancha kerẹ ogiribo, ku wọ họhọ egho ro rhurhu otọ na, wẹ vẹ usun wẹn ejobi, kugbe ihwo buebu ri nene uwe.

¹⁰E nẹ Ọrovwohwo Ọghẹnẹ tare: Vwẹ ẹdẹ yena iroro ke cha djẹ ro wẹ evun, ku wọ cha jẹ iroro umwemwu.

¹¹Ku wọ cha ta, Me cha kpare ofovwi kpo otọ re jẹ ogba egba phihọ ẹko rọye na, mi re she teye ihwo dẹnden na re dia vwẹ egbemọphẹ na, ayen ejobi re dia uphephẹ na, ri vwo ogba-a ri vwo ẹchẹ rẹ utehru eyẹ anurhoro-o;

¹²re ayen gborho ugborho re ayen ghwẹ ekuakua kpo; rere ayen ra ghwọrọ asan ra kua nu na rẹ ihwo rhoma dia re na, kugbe ihwo ra ghwẹ koko nẹ ẹgborho na rhe, ri vwo uchuru kugbe ekuakua, re dia uherevie rẹ otọ na.

¹³Shẹba vi Dedan kugbe ineki ri Tarshish vẹ ẹko rọye ke ta kẹ wẹ, Wo rhe vwẹ ẹgba vwọ reyọ emu re gborhori? Wọ rhe ghwẹ urogho rẹ ihwo na koko rere wọ rhe ghwẹ emu re gborhori na yanran, rere wọ rhe ghwẹ idọnọ vẹ iro reyọ, rere wọ ghwẹ uchuru vẹ ekuakua, re wọ ghwẹ imu buebu reyọ?

¹⁴Vwẹ ọtiọye na, ọmọ rẹ ohwo, gba mraro, re wọ ta kẹ Gọg E nẹ Ọrovwohwo Ọghẹnẹ tare: Vwẹ ẹdẹ yena rẹ ihwo mẹ Izrẹl da cha dia vwẹ egbemọphẹ na, ku wọ jeje oma wẹn.

¹⁵Ku wo che nẹ asan ru wọ dia rhe vwẹ etan rẹ akpọ na vwẹ obọhwẹrẹ rẹ ọnre, wẹ kugbe ihwo buebu ri che nene uwe, ayen ejobi gua iyesi, urogho rode, unuofovwi ọgangan;

¹⁶ku wọ cha vwọ so ihwo mẹ Izrẹl, kerẹsiẹ rẹ ẹgho e de rhurhu otọ na. Vwẹ ẹdẹ rọ ka uku na ke me cha reyọ owẹ vwọ so otọ mẹ na, rere ẹgborho na vwọ riẹn vwẹ, vwẹ ọke re me da wan oma wẹ, E Gọg, vwo dje asẹ rẹ ẹfuọn mẹ kẹ ayen mrẹ.

¹⁷E nẹ Ọrovwohwo Ọghẹnẹ tare: Wẹ ohwo rẹ me ta ota rọye vwẹ ọke rẹ awanrẹ vwẹ oma rẹ idibo mẹ emraro rẹ Izrẹl, ihwo re mraro vwẹ ọke yena vwẹ ikpe buebu tanẹ: Me cha reyọ owẹ vwọ so ayen?

¹⁸Ẹkẹvuọvo vwẹ ẹdẹ yena, ri Gọg da cha vwọ so otọ rẹ Izrẹl, eriyin Ọrovwohwo Ọghẹnẹ tare: ophu mẹ kọ cha kpare.

¹⁹Kidie vwẹ omẹriọ mẹ kugbe evun rẹ ophu ọtuatua mẹ, me da ta, Vwẹ ẹdẹ yena ekpogho rode kọ cha dia otọ rẹ Izrẹl.

²⁰Eri rẹ abadi, kugbe emephran rẹ obenu, kugbe eranvwe rẹ aghwa, kugbe obo ri kpono ejobi ri kpono vwẹ otọ na, kugbe ihwo ejobi re hẹ enu rẹ akpọ na, cha phariẹ vwẹ irharo mẹ, kugbe igbenu na ejobi ka cha vwẹ ayen phiotọ, enu rẹ igbenu na ki che she, igbẹhẹ kigbẹhẹ ejobi ki che rhurie she te otọ.

²¹Ki mi che se kemu kemu ro muoshọ ejobi rhe rhe vwọ so Gọg, eriyin Ọrovwohwo Ọghẹnẹ tare; ohwo ọvuọvo kọ cha vwẹ ọlọko vwọ so oniọvo rọye.

²²Te emiavwe te ọbara mi che vwo nene guẹdjọ, ki mi che si osio hwe re usun rọye kugbe ihwo buebu re vẹ ọye gba herọ, osiọ rode vẹ osio rẹ erhanre, erhanre kugbe ibieragha rẹ rhorha.

²³Ọtiọye ke me cha vwẹ ọrho mẹ vẹ ẹfuọn mẹ phia ra da riẹn vwẹ vwẹ irharo rẹ ẹgborho buebu. Etiyin ayen ke cha riẹn nẹ mẹvwẹ Ọrovwohwo na.