Read urhobo Izikiẹl 39 Bible Online

Izikiẹl 39 - urhobo bible

Izikiẹl 39

¹Wẹ, ọmọ rẹ ohwo, mraro kpahe Gọg, re wọ ta, E nẹ Ọrovwohwo Ọghẹnẹ tare: Nighe, mi mu kpahe owẹ, E Gọg, onotu rẹ isun rẹ Mẹshẹk kugbe Tubal,

²mi che ku we rhẹriẹ me me djẹ wẹ kpo obaro, ke me vwẹ owẹ kpenu nẹ obo ẹtan rẹ obọhwẹre ọnre rhe, o mi sun we ra vwọ so igbenu rẹ Izrẹl,

³ke me cha reyọ umurhabọ wẹn nẹ obọhwẹre wẹn rhe, ki mi che ru edada wẹn she va obọrhe wẹn abọ.

⁴Ku wọ che she vwẹ enu rẹ igbenu rẹ Izrẹl, wẹ vẹ usun wẹn ejobi kugbe ihwo re vẹ owẹ gba herọ; ke me vwẹ owẹ kẹ emephran kemephran re ria eranvwe kpokpọ, kugbe eranvwe re djoma rere ayen re.

⁵Wo che she phihọ evun rẹ uphephẹ, kidie me tarọ nure, eriyin Ọrovwohwo Ọghẹne tare.

⁶Ki mi duvwu erhanre phihọ Magọg kugbe ayen otu rẹ oma furu vwẹ obo erhuru na; ke ayen cha riẹn nẹ mẹvwẹ hẹ Ọrovwohwo na.

⁷Odẹ ọfuanfon mẹ na ka cha riẹn vwẹ uherevie rẹ ihwo mẹ Izrẹl; me gbe cha rhọvwe nẹ a phọphọ odẹ ọfuanfon mẹ na ọfa-a; ẹgborho na ke cha riẹn nẹ mẹvwẹ Ọrovwohwọ na, Ọfuanfon Ọvuọvo rẹ Izrẹl na.

⁸Nighe, ọ cha ọ cha vwọ phia, eriyin Ọrovwohwo Ọghẹne tare. Ọye hẹ ẹdẹ re me tare na.

⁹Etiyin ihwo re cha dia irere rẹ Izrẹl na ke cha yan phia re koko erhanre phihọ ekuakua rẹ ofovwi na a me torhẹ ayen, te ekpọfia, te egbe, umurhabọ vẹ edada, ubiri kugbe oshuẹ, kẹ ayen vwẹ ayen koko erhanre phihọ ikpe ighwrẹn.

¹⁰Vwẹ ọtiọye na o gbi rhe fo rere ayen reyọ urhe nẹ evun rẹ udju rhe-e eyẹ vwo she evo nẹ evun rẹ egbo rhe-e, kidie ekuakua rayen e che vwo koko erhanre phihọ; ayen ke reyọ obo rẹ a reyọ miẹ ayen rhivwi, ayen mi rhe gborho otu ri gborho ayen, eriyin Ọrovwohwo Ọghẹnẹ tare.

¹¹Vwẹ ẹdẹ yena ke me vwẹ asan kẹ Gọg re sho phihọ vwẹ Izrẹl, Iyara rẹ Eyoyan vwẹ obaro ọnre rẹ abadi na; kọ kanre eyoyan na dje, kidie etiyin Gọg vẹ ihwo rọye gbidi na e che shi ayen phihọ, ke che se Iyara ri Hamọngọg.

¹²Kidie emeranvwe ighwrẹn ọye uwevwi rẹ Izrẹl che shi ayen, rere irivwi rẹ ayen ki se nẹ otọ na.

¹³Ihwo rẹ otọ na ejobi ri che shi ayen, ke che phiẹba ọghọ rẹ ayen vwẹ ẹdẹ re me da cha vwẹ urinrin mẹ phia, eriyin Ọrovwohwo Ọghẹnẹ tare.

¹⁴Ayen ki phi ihwo phihọ otọ re kiẹn otọ na kọke kọke re shi irivwi ri chekọ vwẹ enu rẹ otọ na, rere ayen vwo ruo fon, emeranvwe ighwrẹn na da gba nu ka rhoma ki otọ rayen na.

¹⁵Ọke rẹ enana da wan otọ na vrẹn re ohwo ọvo da mrẹ ubeku rẹ ohwo, ko ka oka phihọ, bẹsiẹ rẹ ishirivwi na che vwo sho phihọ Iyara ri Hamọngọg.

¹⁶(Orere ọvo Ramonah ọ je hẹ etiyin rhe.) E nẹ kọye ayen che ru otọ na fon.

¹⁷Vwọ kẹ wẹ, ọmọ rẹ ohwo, e nẹ Ọrovwohwo Ọghẹnẹ tare: Ta ota kẹ oghẹre koghẹre rẹ ọphran kugbe eranvwe rẹ aghwa na ejobi, Ghwẹ oma koko re wa rhe, si koko nẹ asan kasan rhe orẹ rẹ izobo ri mi che ze kẹ wẹ, izobo rode gangan vwẹ enu rẹ igbenu rẹ Izrẹl, ku wọ re uvwo wọ me rha da ọbara.

¹⁸Wọ cha re uvwo rẹ egba na, wọ me rha da ọbara rẹ isun rẹ akpọ na — ọ rẹ egbo, ọ rẹ imigodẹ, ọ rẹ ẹvwe, ọ rẹ erhuẹn, ayen ejobi omamọ rẹ uchuru rẹ Bashan.

¹⁹Ku wọ re ivwri bẹsiẹ rẹ evun vwọ vọn wẹ, wọ me da ọbara bẹsiẹ ro vwo mu we, vwẹ asan orẹ rẹ izobo ri mi che ze kẹ wẹ na.

²⁰Evun kọ cha vọn wẹ vwẹ imẹjẹ mẹ vẹ iyesi kugbe otu re gua, vẹ egba ride na vẹ egba ofovwi dohwo doghẹre, eriyin Ọrovwohwo Ọghẹnẹ tare.

²¹Ke me vwẹ urinrin mẹ vi vwẹ ohri rẹ ẹgborho na, ẹgborho na ejobi ke cha mrẹ orhiebro mẹ ri che bru, kugbe obọ mẹ re me ghwẹ kpahe ayen.

²²Uwevwi rẹ Izrẹl kọ cha riẹn nẹ mẹvwẹ Ọrovwohwo Ọghẹnẹ rayen, nẹ ẹdẹ yena yanran.

²³Ẹgborho na ejobi ke cha riẹn nẹ e ghine mu uwevwi rẹ Izrẹl ighuvwu fiki rẹ orukuruku rayen, fikiridie ayen ru emu rẹ ophiẹvwe kẹ vwẹ ọ da nẹrhẹ ovwẹ si opharo mẹ nu kẹ ayen, mi de phi ayen phihọ obọ rẹ ukọn rayen, a da vwẹ ọlọkọ nyavwe ayen ejobi hwe.

²⁴Mi de nene ayen yeri kirobo ri jẹfuọn rayen epha, mi de si opharo mẹ nu kẹ ayen.

²⁵Fiki rẹ ọtiọye na e nẹ Ọrovwohwo Ọghẹnẹ tarẹ: Asakiephana me cha rhoma reyọ ughwẹ ri Jekọp rhivwi rhe, re mi ni arodọvwẹ kẹ uwevwi rẹ Izrẹl ejobi, ke me rioma kpahọ fiki rẹ odẹ ọfuanfon mẹ.

²⁶Omẹvuọ rayen kọ chọrọ ẹro, kugbe emu rẹ ophiẹvwe ejobi re ayen ru kpahe ovwẹ, vwẹ ọke rẹ ayen da dia dẹndẹn vwẹ otọ rayen na rẹ ohwo ọvuọvo gbe sa djẹ oshọ mu aye-en,

²⁷vwẹ ọke me da vwẹ ayen rhivwi nẹ obọ rẹ ihwo na rhe mi de si ayen koko nẹ otọ rẹ ivwighrẹ rayen rhe, ke me wan oma rẹ ayen dje ẹfuọn mẹ phia vwẹ obaro rẹ ẹgborho buebu na.

²⁸Etiyin ayen ke riẹn nẹ mẹvwẹ Ọrovwohwo Ọghẹnẹ rayen kidie mẹvwẹ re djẹ ayen kpo imu vwẹ orhi rẹ ẹgborho na, rọ da rha ghwẹ ayen kpo otọ rẹ obọ rayen. Me rha yan jẹ ayen ọvuọvo vwo vwẹ ohri rẹ ẹgborho na ọfa-a.

²⁹Mi gbi che si opharo mẹ nu kẹ ayen ọfa-a, vwẹ ọke ri mi de ku Erhi mẹ na ku uwevwi rẹ Izrẹl, eriyin Ọrovwohwo Ọghẹnẹ tare.