Read urhobo Izikiẹl 4 Bible Online

Izikiẹl 4 - urhobo bible

Izikiẹl 4

¹Wẹ rhe, E ọmọ rẹ ohwo, reyọ ukorekpẹn re wo phio phihẹ obaro wẹ, ru wo si orere ọvo phihọ, kọye Jerusalẹm,

²re wọ gba ogba phihọ, re wọ gba ohẹrhẹ kpahọ, re wọ ma ẹrhẹnre rẹ ekpẹn riariẹ, vwẹ erhọn viọ rhe, re wọ vwẹ ikurusu vio riariẹ phihọ.

³Wọ reyọ ophapha rẹ utehru, re wọ vwọ gba ogba rẹ utehru phihọ uvwre wẹ vẹ orere na, re wọ tọn ẹro vio, rere ọ vwọ dia kerẹ asan ra bọn uwevwi rẹ ohẹrhẹ phihọ, rere wo nyẹ ohẹrhẹ na muo. Ọnana kẹ oka vwọ kẹ uwevwi rẹ Izrẹl.

⁴Gbe shevwerhẹ akakọ, ki mi kru oghwa rẹ ehwe rẹ uwevwi rẹ Izrẹl kpahe owẹ; kerẹ unu rẹ ẹdẹ ru wọ vwẹ akakọ shevwerhẹ na ọye wọ ghwa oghwa rẹ ehwe na.

⁵Kidie mi bru ẹdẹ kẹ wẹ, ujori erha kugbe ujọne gbẹ ihwe, ọ vẹ unu rẹ ikpe rẹ ehwe rayen abavo, ọtiọye wọ je ghwa oghwa rẹ ehwe rẹ uwevwi rẹ Izrẹl kri te.

⁶Ọke wọ de ru enana gba nu, ku wo shevwerhẹ obọ rivẹ, ẹkẹvuọvo ke obọrhe wẹn, ku wọ ghwa oghwa rẹ uwevwi ri Juda, ẹdẹ ujuvẹ mi bru kẹ wẹ, ẹdẹ ọvo ẹgbukpe ọvo.

⁷Ku wọ tọn opharo wẹn vi imu ri Jerusalẹm, wọ me gba utehru mu ugbobọ wẹn, ku wọ mraro kpahe orere na.

⁸Gbe nighe, mi che churu ufi si we, ọtiọye na wọ gbe sa rhẹriẹ oma nẹ abọvo kpo ọrivẹ-ẹ, bẹsiẹ rẹ ẹdẹ rẹ imu wẹn na ejobi vwọ gba.

⁹Vwọ kẹ wẹ, gba reyọ ọka kugbe bali, isha kugbe ikpakpane, milẹt kugbe spẹlt, wọ ghwẹ ayen phihọ orọvwọ ọvuọvọ, wọ vwẹ ayen ru ikara. Uchọke ru wọ vwẹ akakọ wẹn shevwerhẹ kri te, ẹdẹ ujori erha gbẹ ujọne gbẹ ihwe, ku wọ riọ.

¹⁰Emu ru wọ cha re na ka vwanvwọn, shẹkẹl uje ẹdẹ ọvo; ẹsiẹvo ẹdọke wọ riọ.

¹¹Ame ru wọ je da ovwovwanvwọn, ẹkensan rẹ ukoko; ẹsiẹvo ẹdẹvo ọye wọ da.

¹²Ku wọ riọ kerẹ ikara ri bali, ra vwẹ isọn rẹ ohwo vwọ kake vwẹ irharo rayen.

¹³Ọrovwohwo da ta, Enẹ ihwo rẹ Izrẹl re ikara rayen vwi jẹfuọn, vwẹ ohri rẹ ẹgborho re me cha djẹ ayen ra na.

¹⁴Etiyin me da ta, E Ọrovwohwo Ọghẹnẹ! nighe, mi ji gbe oma me ẹgua dẹvo-o; nẹ imitete me rhe rhi te nonẹ na. Me je re obo ro mughwu-u eyẹ obo rẹ eranvwe hweri-i, eyẹ eranvwe rharhaphiẹ ji te unu mẹ-ẹ.

¹⁵Etiyin ọ da ta kẹ vwẹ, Me vwẹ isọn rẹ erhuẹn ke we vwẹ ẹdia rẹ isọn rẹ ohwo, kọye wo vwo chere emu wẹn.

¹⁶Ọ rọ marho ọ da ta kẹ vwẹ, Ọmọ rẹ ohwo, nighe, mi vwirhi ọkpọ rẹ ikara vwi Jerusalẹm, kẹ ayen re ikara rẹ ovwanvwọn kugbe oshọ ẹdjẹ; kẹ ayen da ame rẹ ovwanvwọn vẹ uduebro.

¹⁷Mi ru Ọnana rere ame vẹ ikara vwọ kare ayen, ayen ohwohwo vwo ni ohwo vẹ udu ebro, rere ayen vwọ wran kufia vwẹ evun rẹ ehwe rayen.