Read urhobo Izikiẹl 41 Bible Online

Izikiẹl 41 - urhobo bible

Izikiẹl 41

¹Ọ da vwẹ ovwẹ rhe obo utuwevwi na, ọ da vwanvwe ichivwo na, ohẹhẹre ri tobonẹ tobonẹ rẹ ichivwo na ọvuọvo da dia kubit esan.

²Ohẹhẹre rẹ anurhoro na da dia kubit ihwe, igbẹhẹ rẹ akakọ rẹ anurhoro na da dia kubit iyorin vwẹ obo ọvuọvo; ọ da ma ugrogro rẹ utuwevwi na kubit ujuvẹ, ohẹhẹre rọye kubit uje.

³Etiyin ọ da ro uvun rẹ obo ẹtan o da vwanvwẹ uchivwo rẹ anurhoro na, kubit ivẹ; ohẹhẹre rẹ anurhoro na kubit esan, igbẹhẹ rẹ akakọ rẹ anurhoro na, kubit ighwrẹn.

⁴Ọ da vwanvwe ugrogro rẹ ubruwevwi na, kubit uje, ohẹhẹre rọye, kubit uje, vwẹ abọ oboyi rẹ utuwevwi na. Ọ da ta kẹ vwẹ, Ọnana hẹ asan rọ ma fon.

⁵Etiyin ọ da vwanvwe igbẹhẹ rẹ uwevwi na, ọkpan rọye kubit esan; ohẹhẹre rẹ ivun rẹ akakọ na, kubit ẹne, riariẹ uwevwi na phihọ.

⁶Ivun rẹ akakọ na igedege erha, ohwohwo kpahe ohwo, ọgban vwẹ egedege ọvuọvo. Ugana da riariẹ igbẹhẹ rẹ uwevwi na phihọ, rọ vwẹ ukẹcha kẹ ivun na, rere oghwa rẹ ighẹhẹ rẹ uwevwi na vwo je ayen ekeke.

⁷Ivun rẹ akakọ na ke hẹre phihọ nẹ egedege re te egedege, rere ọ vẹ oghwa rẹ na vwọ shehọ nẹ egedege re te egedege riariẹ uwevwi na phihọ, oyerenu de mu kpenu vwẹ akakọ rẹ uwevwi na, e nẹ kọye a vwọ wan nẹ egedege rẹ obotọ re fi egedege rẹ obenu vwẹ uherevie rẹ egedege na.

⁸Me da je mrẹ rhe nẹ a ma umukpe riariẹ uwevwi na; ichivwo rẹ obotọ rẹ uwevwi na ra vwọ vwanvwọn o gro te okpọghọ ri kubit esan.

⁹Ọkpan rẹ igbẹhẹ rẹ ivun rẹ akakọ na da dia kubit iyorin; abọ rẹ umukpe na ro chekọ da dia kubit iyorin. Uvwre re umukpe rẹ uwevwi na vẹ

¹⁰ivun rẹ ọguan na da dia kubit uje vwẹ ohẹhẹre riariẹ uwevwi na phihọ vwi kabọ kabọ

¹¹Ẹchẹ rẹ ivun rẹ akakọ na de rhie kpo abọ rẹ umukpe ro chekọ, ẹchẹ ọvo rhie kpo obọhwẹre ọnre, ẹchẹ ọfa rhie kpo obuko ọnre, ohẹhẹre rẹ abọ ro chekọ na da dia kubit iyorin riariẹ.

¹²Ohẹhẹre rẹ uwevwi ro hirhe opharo ku ọgba rẹ uwevwi na vwẹ abọ rẹ obọrhe ọnre da dia kubit ujorha gbẹ ihwe, ọkpan rẹ igbẹhẹ rẹ uwevwi na da dia kubit iyorin riariẹ, ugrogro rọye kẹ kubit ujọne gbẹ ihwe.

¹³Etiyin ọ da vwanvwẹ uwevwi na, kubit ujori vwẹ ugrogro, ogba na kugbe uwevwi na vẹ igbẹhẹ rọye da dia kubit ujori vwẹ ugrogro;

¹⁴ji te ohẹhẹre rẹ obaro vwẹ obaro ọnre rẹ uwevwi na kugbe ogba na, kẹ kubit ujori.

¹⁵Etiyin ọ da vwanvwẹ ugrogro rẹ uwevwi ro hirhe opharo ku ogba na rọ hẹ obọrhe ọnre vẹ igbẹhẹ rọye vwi tobọnẹ vẹ tobonẹ, da dia kubit ujorin. Utuwevwi rẹ uwevwi na kugbe evun rẹ obo etan kugbe ivun rẹ obo uphephe,

¹⁶a da phare ayen e de phi evakpo phihọ ayen erha na riariẹ vẹ edọvi ra rangbe. Vwẹ asan rọ hirhe aro ku ugana na a da vwẹ irhe phare uwevwi na riariẹ, nẹ utuwevwi kpenu re te evakpo na (Asakiephana e rhurhu evakpo na),

¹⁷re te uvwre rọ hẹ obenu rẹ ẹchẹ na, rẹ te uvun rọ hẹ obọ etan na, ji te obo uphephẹ rọye. A da kanre eranvwọ phihọ ighẹhẹ rẹ evun rẹ obo etan na kugbe utuwevwi na riariẹ;

¹⁸eranvwọ re họhọ shẹrobim kugbe iriẹ, oriẹ vwẹ uvwre ri shẹrub ivẹ. Shẹrub kichẹrub vwo epharo ivẹ

¹⁹opharo rẹ ohwo de hirhe ku oriẹ na vwẹ abọ ọvo, opharo rẹ upene rẹ okpohrokpo de hirhe ku oriẹ na vwẹ abọ ọfa. A kanre ayen phihọ uwevwi na ejobi riarie,

²⁰nẹ utuwevwi re te obenu rẹ ẹchẹ na ọye a kanre shẹrobim vẹ iriẹ na phihọ vwẹ oma rẹ igbẹhẹ na.

²¹Irhe rẹ ẹchẹ rẹ utuwevwi na abọvo, vwẹ obaro rẹ ẹshẹ na emu ọvo da herọ rọ họhọ

²²agbada rẹ urhe, kubit erha kpenu, kubit ivẹ vwẹ ugrogro, kubit ivẹ vwẹ ohẹhẹre; ibienyẹ rọye, esiri rọye, vẹ igbẹhẹ rọye irhe e vwo ruo. O da ta kẹ vwẹ, Ọnana imẹjẹ rọ hẹ obaro rẹ Ọrovwohwo na.

²³Utuwevwi na kugbe asan eshe na ọvuọvo vwo ẹchẹ ivivẹ.

²⁴Ẹchẹ ro vwo ẹbẹre ivẹ vwẹ ọvuọvo, re rhie kpo dohwo dẹbẹre rọye.

²⁵A da kanre shẹrobim kugbe iriẹ phihọ ẹchẹ rẹ utuwevwi na, ọ tiẹ oghẹre ra kanre phihọ igbẹhẹ na, ophie rẹ urhe na da hẹ obaro rẹ ivun na vwẹ obo otafe.

²⁶Evakpo na rangbe kugbe iriẹ na vwẹ abọ nana vẹ abọ yena, vwẹ akakọ rẹ igbẹhẹ rẹ uvun na.