Read urhobo Izikiẹl 42 Bible Online

Izikiẹl 42 - urhobo bible

Izikiẹl 42

¹Etiyin o de sun vwe ro obo etan rẹ ọguan na, ro kpo obọhwẹre ọnre, ọ da vwẹ ovwẹ rhe ighẹn ro hirhe aro ku ogba rẹ uwevwi rẹ ẹga na ro hirhe aro ku uwevwi rẹ obọhwẹre ọnre.

²Ugrogro rẹ uwevwi na rọ hẹ ẹbẹre rẹ obọhwẹre ọnre na da dia kubit ujori, ohẹhẹre rọye ke rha kubit ujuvẹ gbẹ ihwe.

³Ọ rọ kẹre kubit uje rẹ otọegodo rẹ obo oba na, ro hirhc aro ku ugana rẹ otọegodo rẹ obo uphephẹ na, a da bọn ọguan rẹ inughe ivẹ ri hirhe aro ku ohwohwo vwẹ egedege rẹ ibruwevwi erha.

⁴Tavwe re ki rhi te ighẹn na, imidjerhe da herọ vwẹ obo evun, ohẹhẹre rọye kubit ihwe ugrogro rọye kubit ujori, ẹchẹ rayen da hẹ obọhwẹre ọnre.

⁵Ighẹn rẹ obenu na pha hwahwa, kidie asan ra bọn ọguan rẹ inughe phihọ na reyọ omamọ rẹ asan mie ayen nọ evun rẹ obotọ vẹ uherevie vwẹ evun rẹ uwevwi na.

⁶Kidie ibruwevwi rẹ enu erha re herọ, ayen rhe vwo ichivwo kerẹ ichivwo rẹ obọ ọguan rọ hẹ uphephẹ na-a, kọye sorọ rẹ ighẹn rọ hẹ obenu na vwo si kpuko nẹ obotọ rhe nọ ighẹn rẹ obotọ kugbe e rẹ uherevie na.

⁷A da ma igbẹhẹ phihọ obotafe vwẹ urhiẹ rẹ ighẹn na, rọ ghwọma phihọ obo uphephẹ rẹ ọguan na, ro hirhe aro ku ighẹn na, ugrogro rọye kubit ujuvẹ gbẹ ihwe.

⁸Kidie ighẹn na re hẹ obo uphephẹ rẹ oguan na da dia kubit ujuvẹ gbẹ ihwe vwẹ ugrogro, yẹ iri hirhe aro ku uwevwi rẹ ega na da dia kubit ujori vwẹ ugrogro.

⁹Vwẹ obotọ rẹ ighẹn nana anurhoro ọvo da herọ vwẹ ẹbẹre rẹ obaro ọnre, vwẹ ẹsiẹ ra da vwẹriẹ ayen nẹ obo uphephẹ rẹ ọguan na cha,

¹⁰vwẹ asan rẹ igbẹhẹ rẹ obotafe na de mu phihọ. Vwẹ obuko ọnre na rhe, ro hirhe aro ku ogba na ro hirhe aro ku uwevwi na ighẹn da herọ

¹¹vẹ anurhoro vwẹ obaro rayen, ayen da họhọ ighẹn re obọhwẹre ọnre na, te ugrogro te ohẹhẹre rọye abavo, vẹ oghẹre rẹ anurhoro ọvuọvo je vwẹ oghẹre ọvuọvo na a je ghwẹ ẹchẹ na phihọ.

¹²Vwẹ obotọ rẹ ighẹn rọ hẹ obuko ọnre na anurhoro da herọ vwẹ ẹbẹre rẹ obaro ọnre na, vwẹ asan ra da ghwa vwẹriẹ ro anurhoro na, vwẹ asan ro hirhe aro kuo na igbẹhẹ ọvo da gharọ.

¹³Etiyin ọ da ta kẹ vwẹ, Ighẹn rọ hẹ obọhwẹre ọnre kugbe ighẹn rọ hẹ obuko ọnre na ro hirhe aro ku ogba na etiyin ighẹn efuanfon na epha, asan rẹ irherẹn ri siẹkere Ọrovwohwo na da ria izobo rọ ma fon — izobo rẹ ọka, izobo rẹ umwemwu, kugbe izobo rẹ abe, kidie asan na ọfuanfon.

¹⁴Ọke re irherẹn na da ro asan ọfuanfon na, ayen se nẹ evun rẹ etiyin rhe re ro uphephẹ rẹ ọguan na-a jokpa nẹ ayen ku iwun rẹ ayen vwọ ga ẹga na phihọ otọ vwẹ etiyin tavwe, kidie enana pha fuanfon; ayen ki ku ewun efa phihọ tavwe rẹ ayen ki rhi sikẹre obo rẹ ihwo na vwori.

¹⁵Ọke rọ vwọ ma obo evun rẹ uwevwi rẹ ẹga na nu, o de sun vwe ro uphephẹ wan anurhoro ro hirhe aro ku obaro ọnre, ọ da vwanvwe otọ rẹ uwevwi rẹ ẹga na riariẹ.

¹⁶Ọ da vwẹ ubiurhe rẹ ovwanvwọn na vwọ vwanvwe ẹbẹre rẹ obaro ọnre na, o da dia kubit ujori iyori rẹ ubiurhe rẹ ovwanvwọn na.

¹⁷Etiyin o de kuoma rhẹriẹ o da ra vwanvwe ẹbẹre rẹ obọhwẹre ọnre, o da dia kubit ujori iyorin rẹ ubiurhe rẹ ovwanvwọn na.

¹⁸Etiyin o de kuoma rhẹriẹ o da ra vwanvwe ẹbẹre rẹ obọrhe ọnre, ọ da dia kubit ujori iyorin rẹ ubiurhe rẹ ovwanvwọn na.

¹⁹Etiyin o de kuoma rhẹriẹ kpo ẹbẹre obuko ọnre ọ da vwanvwọn, ọ da dia kubit ujori iyorin rẹ ovwanvwọn.

²⁰Ọ da vwanvwọn igogo ẹne na. A da vwẹ igbẹhẹ gba ogba riariẹ, ugrogro rọye kubit ujori iyorin kugbe ohẹhẹre rọye kubit ujori iyorin, ra vwọ hẹriẹ asan ọfuanfon na nẹ asan rẹ ihwo ghevweghe dia.