Read urhobo Izikiẹl 43 Bible Online

Izikiẹl 43 - urhobo bible

Izikiẹl 43

¹Ukuko rọye ọ da reyọ ovwẹ rhe asan anurhoro na, anurhoro ro hirhe aro ku obaro ọnre.

²Nighere, urinrin rẹ Ọghẹnẹ rẹ Izrẹl de lo nẹ obaro ọnre rhe, umri rẹ edo rẹ ẹcha rọye da họhọ edo rẹ ame buebu, akpọ na de rhi lo vẹ urinrin rọye.

³Emramrẹ rẹ me mrẹre da họhọ emramrẹ ra mrẹre vwẹ ọke rọ vwọ rhe rhe ghwọghọ orere na, kerẹ emramrẹ re me mrẹre vwẹ oma rẹ urhie ri Kiba, mi de she họvwọn opharo rhuotọ.

⁴Rẹ urinrin rẹ Ọghẹnẹ vwo ro uwevwi rẹ ẹga na vwẹ anurhoro ro hirhe aro ku obaro ọnre.

⁵Erhi na da kpare ovwẹ vrẹn, o da reyọ ovwẹ rhe obo evun rẹ ọguan na, nighere, urinrin rẹ Ọghẹnẹ da vọn uwevwi rẹ ẹga na.

⁶Ọke rẹ ohwo na vwo mudia kẹrẹ ovwẹ, mi de nyo ohwo ọvo rọ ta ota kẹ vwẹ nẹ evun rẹ uwevwi rẹ ẹga na rhe,

⁷ọ da ta kẹ vwẹ, Ọmọ rẹ ohwo, Ọnana asan ekete mẹ kugbe asan re me ghwẹ awọ mẹ phihọ, asan re me cha dia vwẹ uherevie rẹ ihwo mẹ Izrẹl bẹdẹ. Uwevwi rẹ Izrẹl gbi che gbe odẹ ọfuanfon mẹ ẹgua ọfa-a, eyẹ ayen, eyẹ ivie rayen, vẹ igberadja rayen, kugbe irivwi rẹ ivie rayen,

⁸rẹ ayen vwọ vwẹ ibara rayen so ibara mẹ re ayen da vwẹ edovi rayen so edovi mẹ, igbẹhẹ ọvuọvo kọye hẹriẹ uvwre mẹ vẹ ọ rẹ ayen. Ayen vwẹ ẹgua rayen rẹ ayen ruru vwo gbe odẹ ọfuanfon mẹ ẹgua, ọtiọye na me da vwẹ ophu mẹ ghwọrọ ayen.

⁹Asakiephana gbe jẹ ayen siobọ nẹ ẹdjọ rayen kugbe irivwi rẹ ivie rayen, ke me dia uherevie rayen bẹdẹ.

¹⁰Wẹ, ọmọ rẹ ohwo, gbe dje kẹ uwevwi rẹ Izrẹl, uwevwi rẹ ẹga na kugbe obo rọ epha vẹ obo re siro, rere oma rẹ orukuruku rayen vwọ vọ ayen.

¹¹Ọ da dianẹ oma rẹ obo rẹ ayen ruru na vo ayen, gba nabọ dje obo rẹ uwevwi rẹ ẹga na, ẹkuẹko rọye, anurhoro rọye vẹ unu ra wan no, obo rẹ uwevwi na ejobi epha, rere wo dje iji na ejobi kugbe irhi mẹ ejobi kẹ ayen, wo sio phihọ otọ vwẹ irharo rayen, rere ayen vwẹ ẹro te rere ayen yọnrọn irhi na kugbe iji rọye ejobi.

¹²Ọnana kọye urhi rẹ uwevwi rẹ ẹga na asan ejobi re riariẹ uwevwi na rọ hẹ obenu rẹ ugbenu na kọ dia asan rọ ma fon. Nighe, Ọnana urhi rẹ uwevwi rẹ ega na.

¹³Enana oma re agbada na ra mare vwi kubit (kubit na da dia kubit ọvo gbe esabọ) esiri rọye kubit ọvo kpenu, kubit ọvo vwẹ ohẹhẹre vẹ urhie isabọ ọvo rọ djẹ riariẹ wan. Ke e nẹ agbada na kpenu te:

¹⁴nẹ esiri rọye vwẹ obotọ re te urhiẹ ro obotọ na, kubit ivẹ, vẹ ohẹhẹre rọye kubit ọvo, nẹ urhiẹ otete re te ọrhuarho, kubit enẹ, ohẹhẹre rẹ urhiẹ na kubit ọvo,

¹⁵enyerhanre rẹ agbada na, kubit ẹne, ighoro ẹne, ri yoro nẹ enyerhanre rẹ agbada na re fi enu, kubit ọvo kpenu.

¹⁶Enyerhanre rẹ agbada igogo ẹne abavo ọye ọ dia, ugrogro rọye kubit ihwivẹ, ohẹhẹre rọye kubit ihwivẹ.

¹⁷Udje rọ mu riariẹ re je igọgo ẹne abavo ọ dia, ugrogro rọye kubit ihwene ohehere rọye kubit ihwene, urhie ọvo de mu riariẹ phihọ ohẹhẹre rọye ubro ri kubit, obọ esiri rọye kubit ọvo riariẹ. Asan ra wan yere agbada na mi hirhe aro ku obaro ọnre.

¹⁸Ọ da ta kẹ vwẹ, Ọmọ rẹ ohwo, e nẹ Ọrovwohwo Ọghẹnẹ tare Enana eye iji rẹ agbada na vwẹ ẹdẹ ra da tọn phihọ kẹ izọbo rẹ ẹtorhẹ vwẹ enu rọye kugbe ọbara re miri kuo,

¹⁹ku wọ vwọ kẹ ọrherẹn ri Livae rẹ uvwiẹ ri Zadọk, rọ sikere ovwẹ ri gbe odibo kẹ vwẹ, eriyin Ọrovwohwo Ọghẹnẹ tare, erhuẹn e che vwo ze izobo rẹ umwemu.

²⁰Ku wọ reyọ emerha rẹ ọbara rọye, ku wọ kuo phihọ ighoro ẹne rẹ agbada na, kugbe igogo ẹne rẹ urhie na, ji kugbe urhie rọ riariẹ re phihọ na, e nẹ kọye we phorho agbada na wo mi ghwerise ke.

²¹Ku wọ je reyọ erhuẹn rẹ izobo rẹ umwemu na, ka torhẹ vwẹ asan re dje phihọ kẹ vwẹ evun rẹ uwevwi rẹ ẹga na, vwẹ uphephẹ rẹ otọ ọfuanfọn na.

²²Vwẹ ẹdẹ rivẹ ku wọ vwẹ ẹkpro ro je ekan evwo vwo ze izobo fiki rẹ umwemu, ka nabọ phorho agbada na, kirobo ra vwẹ erhuẹn na phorho na.

²³Ọke ri wo de phorho nu, ku wọ vwẹ erhuẹn ro jẹ ipe evwo vwo ze izobo kugbe egbo ro jẹ ipe evwo re mu nẹ uchuru na rhe.

²⁴Ku wọ vwẹ ayen phia kẹ Ọrovwohwo, orherẹn na kọ fẹrẹ ughweraka ku ayen ka vwẹ ayen ze izobo rẹ ẹtorhẹ kẹ Ọrovwohwo.

²⁵Vwẹ ẹdẹ ighwrẹ gbagba ku wọ vwẹ ẹvwe ọvuọvo vwo ze izobo rẹ umwemu, ji erhuẹn vẹ egbo ro nẹ usun rẹ uchuru na rhe, ro jẹ ekan evwo.

²⁶Ẹdẹ ighwrẹn ọye ayen vwọ ga ẹga kẹ agbada na rere ephorho, rere e vwo ruo fon.

²⁷Ọke rẹ ayen de ru ẹdẹ na gba nu, nẹ ẹdẹ ẹrenre yanran kẹsiẹye irherẹn na ki che ze izobo rẹ ẹtorhẹ vwẹ enu rẹ agbada na kugbe izobo rẹ ufuoma, ke me reyọ owẹ, eriyin Ọrovwohwo Ọghẹnẹ tare.