Read urhobo Izikiẹl 45 Bible Online

Izikiẹl 45 - urhobo bible

Izikiẹl 45

¹Ọke wọ da cha gharẹ otọ na ẹkẹnkẹn, wo mi phi ẹkẹn vwọ hẹ akakọ kẹ Ọrovwohwo vwẹ usun rẹ otọ na rọ dia ubrotọ ọfuanfọn, ugrọgro rọye kubit uriorin uje gbẹ iyorin ohẹhẹre rọye kubit uriorin uje, ko dia fuanfon vwẹ asan rọ rho te ejobi.

²Vwẹ evun rẹ ọnana ẹkẹn rẹ kubit ujorin iyorin vwẹ ugrogro vẹ ohẹhẹre kọ dia asan ẹshẹ, idjerhe ra gbẹn riariẹ phihọ mi phen te kubit ujuvẹ gbẹ ihwe.

³Vwẹ ubrotọ ọfuanfon na wọ me vwanvwẹ abọvo nẹ ugrogro rọye kubit uriori uje gbẹ iyorin kugbe ohẹhẹre kubit uriorin ihwe, evun rẹ etinẹ na kọye eshe na dia, asan rọ ma fon ejobi.

⁴Kọye re cha dia ẹkẹn rọ ma fon vwẹ otọ na, kọ dia ọ rẹ irherẹn na, ri gbe odibo vwẹ ẹshẹ na ri sikẹrẹ Ọrovwohwo re gbe odibo kẹ, kọye re dia asan rẹ uwevwi rayen cha dia kugbe asan ọfuanfon kẹ asan ẹshẹ na.

⁵Ogharọ ọfa, ugrogro rọye kubit uriori uje gbẹ iyorin ohẹhẹre rọye kubit uriorin ihwe, kọ dia kẹ ihwo ri Livae ri gbe odibo vwẹ uwevwi rẹ ẹga na, ọye kọ dia ẹkẹn ughwẹ rayen vẹ irere rẹ ayen cha dia.

⁶Vwọ ba ẹkẹn re phihọ akakọ nọ dia ubrotọ ọfuanfon na ku wo ji bru ẹkẹn ra bọn orere na phihọ asan rẹ ohẹhẹre rọye dia kubit uriorin iyorin, ugrogro rọye kubit uriorin uje gbẹ iyorin, kọ dia ọ rẹ uwevwi rẹ Izrẹl ejobi.

⁷Otọ rẹ abọ nana vẹ abọ rivẹ rẹ ubrotọ ọfuanfon na kọ dia ọ rẹ osun kugbe otọ rẹ evun rẹ orere na, vwọ ba ubrotọ ọfuanfon na kugbe otọ rẹ evun rẹ orere na, vwẹ obaro ọnre vẹ obuko ọnre, rọ vẹ ugrogro rẹ otọ na dia abavo da dia ẹkẹn rẹ orua ọvo, rẹ ughwru rọye nene obuko ọnre re te obaro ọnre rẹ otọ na.

⁸Ọye na kọye re cha dia ẹkẹn rẹ otọ rọye vwẹ Izrẹl na. Isun mẹ gbi che shenyẹ ihwo mẹ ọfa-a, ẹkẹvuọvo ayen ke jẹ uwevwi rẹ Izrẹl vwo otọ na kirobo ra gharọ kẹ orua rayen.

⁹E nẹ Ọrovwohwo Ọghẹnẹ tare: Oteri, E isun rẹ Izrẹl! Ku ogbarogba vẹ oshenyẹ kufia, ru ọsoso vẹ ọvwata; we gbi keke ihwo mẹ nẹ otọ raye-en, eriyin Ọrovwohwo Ọghẹnẹ tare.

¹⁰Ku we vwo ovwanvwọn ro shephihọ abavo, iputusẹ abavo kugbe oze abavo.

¹¹Iputusẹ na kugbe oze na me dia abavo vwẹ ovwanvwọn, oze na me dia ẹkihwe rẹ eghẹghẹre, iputusẹ na jẹ vwẹ ekihwe rẹ eghẹghẹre, eghẹghẹre kọye dia uvi rẹ unu rẹ ovwanvwọn.

¹²Shekẹl na ko dia gera uje, shekẹl iyorin kọ dia shekẹl iyorin, shekẹl ihwe ke dia shekẹl ihwe, mina wẹn kọ dia shekẹl ujuvẹ gbẹ ihwe.

¹³Ọnana kọye izobo ru wo che ze: ekeasn rẹ iputusẹ vwẹ eghẹghẹre rẹ ọka, ekesan rẹ iputusẹ vwẹ eghẹghẹre rẹ bali,

¹⁴kirobo ra vwọ vwanvwan evwri, ẹkesan rẹ oze vwi kor ọvuọvo, (kor na, họhọ eghẹghẹre ihwe re vọn oze ọvo),

¹⁵vwẹ ekru rẹ igodẹ ujori ivẹ a me reyọ ogodẹ ọvo no rhe, vwẹ ekru rẹ Izrẹl na. Ọnana kọye e vwo ze izobo rẹ ọka, izobo rẹ ẹtorhẹ, kugbe izobo rẹ ufuoma, rere a vwo rhuẹrẹ arhuẹrẹ kẹ ayen, eriyin Ọrovwohwo Ọghẹnẹ tare.

¹⁶Ihwo rẹ otọ na ejobi ki toro izobo na kẹ osun rẹ Izrẹl na.

¹⁷Ke rha iruo rẹ osun na ro vwo ze izobo rẹ ẹtorhẹ na, izobo rẹ ọka, kugbe izobo rẹ udi, vwẹ ọke orẹ na, vwẹ asan ọtuphro rẹ emeranvwe, vẹ ẹdidjala, vwẹ ẹdorẹ rẹ bruru ejobi vwẹ uwevwi rẹ Izrẹl na: ọye ri ji vwọ oho re vwo ze izobo rẹ umwemu, izobo rẹ ọka, izobo rẹ ẹtorhẹ kugbe izobo rẹ ufuoma, rere a vwọ rhuẹrẹ arhuẹrẹ kẹ uwevwi rẹ Izrẹl.

¹⁸E nẹ Ọrovwohwo Ọghẹnẹ tare: Vwẹ emeranvwe rẹsosuọ, vwẹ ẹdẹ rẹsọsuọ rẹ emeranvwe na, ku wọ reyọ upene rẹ erhuẹn ọshare ro vwo eka-an vwo phorho ẹshẹ na.

¹⁹Orherẹn na kọ reyọ emerha rẹ ọbara rẹ izobo rẹ umwemu na o mi vwo te edọvi rẹ uwevwi rẹ ẹga na, igogo ẹne rẹ agbada na, kugbe edọvi rẹ anurhoro rẹ ọguan rọ hẹ obo ẹtan na.

²⁰Ọtiọye wo ji ru vwẹ ẹdẹ righwrẹ rẹ emeranvwe na vwọ kẹ ohwo ro ru umwemu vwẹ ugheghẹ eyẹ ọ chọrobọ, ọtiọye kọye wọ gọ ẹgua vwo kẹ uwevwi rẹ ẹga na.

²¹Vwẹ emeranvwe rẹ ẹsosuọ, vwẹ ẹdẹ rihwẹne rẹ emeranvwe na, ku wọ rẹ orẹ rẹ ẹwanvrẹn na, vwẹ ọsọsọ rẹ ẹdẹ ighwrẹ ikara ro jephuo kọye a re.

²²Vwẹ ẹdẹ yena osun na kọye vwo obo rẹ ekpuyovwi rọye cha re kugbe ihwo rẹ otọ na ejobi cha re upene rẹ erhuẹn ọshare re vwo ze izobo rẹ umwemwu.

²³Vwẹ ẹdẹ ighwrẹ vwẹ orẹ na ko phi upene rẹ erhuẹn eshare ighwrẹn phihọ otọ re vwo ze izobo rẹ ẹtorhẹ kẹ Ọrovwohwo, kugbe egbo ighwrẹn ri vwo eka-an, ọvo ẹdẹvo bẹsiẹ rẹ ẹdẹ ighwrẹn na vwọ gba, kugbe ẹkpro kẹdẹ kẹdẹ re vwo ze izobo rẹ umwemu.

²⁴Ọ me rha vwanvwẹ iputusẹ rẹ ọka vwọ ba erhuẹn ọshare ọvuọvọ na vwo ze izobo, iputusẹ ọvo vwọ ba egbo ọvo, ukoko rẹ evwri ọvo vwọ ba iputusẹ rẹ ọka ọvo.

²⁵Vwẹ emeravwe righwrẹ, vwẹ ẹdẹ ihwiori rẹ emeranvwe na vwẹ evun rẹ ẹdẹ ighwrẹn rẹ orẹ na, ọ je ghwa oghẹre rẹ ekuakua ọvuọvo na phihọ otọ re vwo ze izobo rẹ umwemu, izobo rẹ ẹtorhẹ, kugbe izobo rẹ ọka, vẹ evwri.