Read urhobo Izikiẹl 48 Bible Online

Izikiẹl 48 - urhobo bible

Izikiẹl 48

¹Enana keye edẹ rẹ orua na: Ọ tophihọ nẹ ughwru rẹ ohọhwẹre ọnre rhe, nẹ obo abadi na vwẹ idjerhe ri Hetlọn re te unu ri Hamat, rhiri re te Hazarenọn (rọ hẹ ughwru vwẹ obọhwẹre ọnre ri Damaskọs ro nẹ Hamat), rọ riẹn abọ nẹ obaro ọnre rhe obuko ọnre, Dan, ẹkẹn ọvo.

²Ọ rọ ghwabọ kpahe ubrakpọ ri Dan na, nẹ abọ rẹ obaro ọnre rhe re te obuko ọnre, Asher, ẹkẹn ọvo.

³Ọ rọ ghwabọ kpahe ubrakpọ rẹ Asher na, nẹ abọ rẹ obaro ọnre re te obuko ọnre, Naftali, ẹkẹn ọvo.

⁴O rọ ghwabọ kpahe ubrakpọ ri Naftali, nẹ abọ rọ hẹ obaro ọnre re te abuko ọnre, Manasse, ẹkẹn ọvo.

⁵Ọ rọ ghwabọ kpahe ubrakpọ ri Manasse, nẹ abọ rẹ obaro ọnre re te obuko ọnre, Ifrem, ẹkẹn ọvo.

⁶Ọ rọ ghwabọ kpahe ubrakpọ rẹ Ifrem, nẹ abọ rẹ obaro ọnre re te obukọ ọnre, Rubẹn, ẹkẹn ọvo.

⁷Ọ rọ ghwabọ kpahe ubrakpọ ri Rubẹn, ne abọ rọ obaro ọnre re te obuko ọnre, Juda, ẹkẹn ọvo.

⁸O rọ vwọ kpahe ubrakpọ ri Juda, nẹ abọ rẹ obaro ọnre re te obuko ọnre, kọ dia ẹkẹn ru wo che phihọ akakọ, ohẹhẹre rọye kubit uriori uje gbẹ iyorin, vwẹ ugrogro, ọ vẹ ẹkẹn rẹ orua ọvo kẹ abavo, nẹ abọ rọ hẹ obaro ọnre re te obuko ọnre, yẹ ẹshẹ na ọ hẹ uherevie rọye.

⁹Ẹkẹn ru wọ che phihọ akakọ kẹ Ọrovwohwo kọ dia kubit uriori uje gbẹ iyorin vwẹ ugrogro kugbe kubit uriorin uje gbẹ iyorin vwẹ ohẹhẹre.

¹⁰Enana keye cha dia utute rẹ ẹkẹ ọfuanfon na: irherẹn na ki vwo utute ra mare kubit uriori uje gbẹ iyorin vwẹ abọ rẹ obọhwere ọnre, kubit uriorin ihwe vwẹ ohẹhẹre vwẹ abọ rẹ obuko ọnre, kubit uriorin ihwe vwẹ ohẹhẹre vwẹ abọ rẹ obaro ọnre, kugbe kubit uriorin uje gbẹ iyori vwẹ ugrogro vwẹ abọ rọ hẹ obọrhe ọnre, vẹ ẹshẹ rẹ Ọrovwohwo rọ hẹ uherevie rọye.

¹¹Ọnana kọ dia vwọ kẹ irherẹn re vwo mu, emeshare ri Zadọk, re sẹro rẹ eta mẹ, ri ghwruru-u vwẹ ọke rẹ ihwo vwo ghwru, kirobo rẹ ihwo ri Livae ruru-u.

¹²Kọ dia ọrayen rere ọ dia oghẹre rẹ ẹkẹ vwẹ otọ ọfuanfọn na ra vwọ kẹ ayen, asan rọ ma fon ejobi, rọ ghwabọ kpahe ubrakpọ rẹ ihwo ri Livae.

¹³Vwẹ akakọ rẹ ubrakpọ rẹ irherẹn na, ihwo ri Livae na ki ji vwo ẹkẹ kubit uriorin uje gbẹ iyorin vwẹ ugrogro kugbe uriorin ihwe vwẹ ohẹhẹre. Ugrogro rọye ejobi kọ dia kubit uriorin uje gbẹ iyorin ohẹhẹre rọye uriorin uje.

¹⁴Ayen sa shẹ-e eyẹ vwo wene emerha rọye-e; ayen che se siobọ nẹ ẹkẹ rẹ otọ oyoyovwi nana-a, kidie ọ pha fuanfon kẹ Ọrovwohwo.

¹⁵Ọ ro chekọ kubit uriorin iyorin vwẹ ohẹhẹre kugbe uriorin uje gbẹ iyorin vwẹ ugrogro, kọye orere na vwo ru obo rẹ ayen guọnọre, ra bọn iwevwi phihọ kugbe asan ophephẹ ro rhie phihọ vwọ. Vwẹ uherevie rọye kẹ etiyin orere na cha dia;

¹⁶enana ke cha dia ovwanvwọn rọye: abọ rẹ obọhwẹre ọnre kubit ujorin iyorin, abọ rẹ obuko ọnre kubit uriorin ẹne kugbe ujorin iyorin.

¹⁷Orere na ko vwo otọ ro rhie phihọ, vwẹ abọ rẹ obọhwẹre ọnre kubit ujorin ivẹ kugbe ujuvẹ gbe ihwe, vwẹ abọ rẹ obọrhe kubit ujorin ivẹ kugbe ujuvẹ gbẹ ihwe, vwẹ obaro ọnre kubit ujorin ivẹ kugbe ujuvẹ gbẹ ihwe, vwẹ obuko ọnre kubit ujorin ivẹ kugbe ujuvẹ gbẹ ihwe.

¹⁸Ugrogro ro chekọ vwẹ abọ rẹ ẹkẹ ọfuanfon na kẹ kubit uriorin ihwe vwẹ obaro ọnre, kubit uriorin ihwe vwẹ obuko ọnre, kọ dia abọ rẹ ẹkẹ ọfuanfon na. Obo ri nuro rhe kọ dia emuọre kẹ iruiruo rẹ orere na.

¹⁹Iruiruo rẹ orere na ri nẹ orua rẹ Izrẹl ejobi rhe, kẹ ayen vwo ru udju.

²⁰Ẹkẹn ru wo che phihọ akakọ na kọ dia kubit uriorin uje gbẹ iyorin abọvo vwẹ ugrogro kugbe ohẹhẹre, kọye, ẹkẹn ọfuanfon na vẹ ekuakua ro chekọ vwẹ orere na.

²¹Obo ri chekọ vwẹ abọ nana vẹ abọ yena kugbe otọ rẹ orere na kọ dia ọ rẹ osun. Nẹ asan kubit uriorin uje gbẹ iyorin rẹ ẹkẹ ọfuanfon na re te ughwru rẹ obaro ọnre na, vwẹ obuko ọnre nẹ kubit uriorin uje gbẹ iyorin rẹ ughwru rọ hẹ obuko ọnre, rọ pha phiọnphiọn pae re duvwu ẹkẹn rẹ orua na, kọ dia ọ rẹ osun na. Ẹkẹn ọfuanfon na vẹ ẹshẹ rẹ uwevwi rẹ ẹga na kọ dia uherevie rọye.

²²Ekuakua rẹ otu rẹ Livae na vẹ ekuakua rẹ orere na, ke dia uherevie rẹ ọ rẹ osun na. Ẹkẹ rẹ ọ osun na kọ dia uvwre rẹ otọ ri Juda kugbe otọ ri Bẹnjamin.

²³Vwọ kẹ orua ri chekọ: nẹ obaro ọnre re te obuko ọnre na, Bẹnjamin ẹkẹ ọvo.

²⁴Ọ rọ ghwabọ kpahe otọ ri Bẹnjamin na, nẹ obaro ọnre re te obuko ọnre na, Simiọn, ẹkẹ ọvo.

²⁵Ọ rọ ghwabọ kpahe otọ ri Simiọn na, nẹ abọ rẹ obaro ọnre re te obuko ọnre na, Issaka, ẹkẹ ọvo.

²⁶Ọ rọ ghwabọ kpahe otọ rẹ Issaka na, nẹ abọ rẹ obaro ọnre re te obuko ọnre na, Zẹbulọn, ẹkẹ ọvo.

²⁷Ọ rọ ghwabọ kpahe otọ ri Zẹbulọn na, nẹ obaro ọnre re te obukọ ọnre na, Gad, ẹkẹ ọvo.

²⁸Ọ rọ ghwabọ kpahe otọ ri Gad na vwẹ obọhwẹre ọnre na, ughwru na kọ djẹ nẹ Tamar re te ame ri Meribat-kadesh, re fi Oku rẹ Ijipt re te Abadi Rode na.

²⁹Ọnana kọye otọ ru wọ cha ghare utute rọ dia uku vwẹ ohri rẹ orua rẹ Izrẹl, enana keye cha dia ẹkẹ rayen, eriyin Ọrovwohwo Ọghẹnẹ tare.

³⁰Enana ke cha dia unu re che bruphihọ orere na. Vwẹ obọhwẹre ọnre na, rọ cha dia kubit uriorin ẹne kugbe ujorin iyorin vwẹ ovwanvwọn,

³¹anurhorọ erha, anurhoro ri Rubẹn, anurhoro ri Juda, kugbe anurhoro ri Livae, a vwẹ odẹ rẹ orua rẹ Izrẹl na se odẹ rẹ anurhoro na.

³²Vwẹ abọ rẹ obaro ọnre, rọ cha dia kubit uriorin ẹne kugbe ujorin iyorin na, anurhoro ri Dan.

³³Vwe abọ rẹ obọhwẹre ọnre, rọ cha dia kubit uriorin ẹne kugbe ujorin iyorin vwẹ ovwanvwọn na, anurhoro erha, anurhoro ri Simiọn, anurhoro rẹ Issaka, kugbe anurhoro rẹ Zẹbulọn.

³⁴Vwẹ abọ rẹ obuko ọnre, rọ cha dia kubit uriorin ẹne kugbe ujorin iyorin na, anurhoro erha, anurhoro ri Gad, anurhoro rẹ Ashar, kugbe anurhoro ri Naftali,

³⁵Okiriarie rẹ orere na kọ dia kubit uriorin ihwe gbẹ ẹrenre. Odẹ rẹ orere na kẹ etinẹ yanran kọ dia, Ọrovwohwo na hẹ etiyin.