Read urhobo Izikiẹl 5 Bible Online

Izikiẹl 5 - urhobo bible

Izikiẹl 5

¹Wẹ rhe, E ọmọ rẹ ohwo, reyọ ọlọkọ ọdandan, vwo ru kerẹ anre rẹ ọwanrẹto vwọ yariẹ uyovwi wẹn kugbe ẹtuegba wẹn; gba reyọ ovwanvwọn ra vwọ vwanvwan, rere wọ ghare ẹto na.

²Ẹkẹn erha rọye wọ torhẹ vwẹ erhanre vwẹ uherevie rẹ orere na, rẹ ẹdẹ rẹ imu na da gba nu, ẹkẹn erha ọvo, wọ reyọ wọ me vwẹ ọlọkọ wẹn vwo tue riariẹ orere na; ẹkẹn erha ro chekọ wo mi tuetue nene odju, ki mi yoro ọlọkọ mẹ nẹ ako rhe vwọ kpahe ayen.

³Ku wọ reyọ emerha krẹn nẹ enana, ku wo churu ayen mu orhọn rẹ ewun wẹn.

⁴Vwẹ evun rẹ enana ku wọ rha reyọ emerha, wo mi kuo phihọ erhanre; Etiyin kọye erhanre che nurhe rhe ro uwevwi rẹ Izrẹl ejobi.

⁵Enẹ Ọrovwohwo Ọghẹnẹ tare; Ọnana Jerusalẹm; mi muro phihọ uherevie rẹ ẹgborho na vẹ irho re yarierẹ phihọ.

⁶Ọ da vwẹ uvumwemwu vwọ so irhi me nọ ẹgborho ri chekọ na, ọ da vwọ so iji mẹ nọ irho re yarierẹ phihọ na, ọ da sen irhi mẹ ọ gbe yan nene iji mẹ-ẹ.

⁷Fiki rẹ ọtiọye na enẹ Ọrovwohwo Ọghẹnẹ tare: Fikiridie wọ vọnre vẹ ukpokpoma nọ ẹgborho re yariẹ owẹ phihọ na, wọ gbe rha yan phihọ iji mẹ-ẹ eyẹ yọnrọn irhi me-ẹ na, ẹkẹvuọvo ku wo ru nene irhi rẹ ẹgborho re yariẹ owẹ phihọ na;

⁸Fiki rẹ ọtiọye na enẹ Ọrovwohwo Ọghẹnẹ tare. Nighe, Mẹvwẹ, ekpuyovwi mẹ, kọ vwọ so wẹ; ke me che brorhiẹ wẹn vwẹ irharo rẹ ẹgborho na.

⁹Fiki rẹ ẹgua wẹn na ejobi ki mi che nene uwe ru obọ mi ji ru dẹvo-o, oghẹre rẹ emu ọtiọye na mi gbi ji se ruo ọfa bẹdẹ-ẹ.

¹⁰Fiki rẹ ọtiọye na esẹ ke cha re emọ rayen vwẹ uherevie ovwan, emọ ke cha re esẹ rayen; ke me cha vwẹ owẹ gu ẹdjọ, ọ rọ vẹ abọ rẹ ẹdjọ na ke me hra nene odju na ejobi.

¹¹Vwẹ ọtiọye na, kirobo re me herọ na, eriyin Ọrovwohwo Ọghẹne tare, uyota, fikirobo wo vwo gbe ẹshẹ mẹ na ẹgua vẹ erharhe eravwọ wẹn ejọbi kugbe ẹgua wẹn ejobi na, vwẹ ọtiọye na ke me nyavwe owẹ te otọ, ẹro mẹ che ju we vwo-o, me je cha re ehrọre-e.

¹²Ẹkẹn erha wẹn ki che ghwu ughwu rẹ emiavwe, owẹvwe kọ cha torhẹ vwẹ uherevie wẹn; ẹkẹn erha ọfa ko ghwu ughwu rẹ ọlọkọ riariẹ owẹ; ẹkẹn erha ro chekọ ke me hra nene odju ejobi ke yoro ọlọkọ nẹ ako rhe nene ayen.

¹³Enẹ kọye ophu mẹ cha dia, ke me kpa ivuemiovwo ku ayen kẹ ọhọre mẹ she; kẹ ayen riẹn nẹ mẹvwẹ Ọrovwohwo na, ta ota vwẹ evun rẹ omẹriọ mẹ nure, vwẹ ọke ri mi de ku ophu mẹ ku ayen nu.

¹⁴Ọ rọ marho ke me kua wẹ fiotọ ku wọ dia ohwo rẹ ehwẹjẹ vwẹ ohri rẹ ẹgborho na re riariẹ owẹ phihọ na kugbe obaro rẹ ihwo ejobi re wanvrẹn.

¹⁵Ku wọ cha dia ohwo rẹ ehwẹjẹ vẹ oharebro, okpaẹkpa vẹ ometuo vwọ kẹ ẹgborho re riariẹ owẹ phihọ na, vwẹ ọke me da vwẹ owẹ gu ẹdjọ vwẹ evun rẹ ophu mẹ vẹ ivuemiovwo mẹ, kugbe efafa rẹ ivuemiovwo mẹ — Mẹvwẹ, Ọrovwohwo na, re tarọ —

¹⁶ọke me da vwẹ edada rẹ obi rẹ ewẹvwe mẹ vwọ sa wẹ, edada rẹ ẹghwọrọ, re me cha vwọ sa wẹ ghwọrọ, ọke me da vwẹ ewẹvwe kpahe ewẹvwe rhi vwo hwe we, ri mi de vwirhi ọkpọ rẹ ikara wẹn.

¹⁷Ke me vwẹ owẹvwe efio kugbe eranvwe re djuoma vwọ so owẹ, ayen ki cho emọ wẹn mie we, emiavwe vẹ ọbara ke cha wan we vrẹn; ke Me cha vwẹ ọlọkọ vwọ so owẹ. Mẹvwẹ, Ọrovwohwo na, re tarọ.