Read urhobo Izikiẹl 7 Bible Online

Izikiẹl 7 - urhobo bible

Izikiẹl 7

¹Ota rẹ Ọrovwohwo de bru vwe rhe:

²Wẹ, Ọmọ rẹ ohwo, enẹ Ọrovwohwo Ọghẹne ta kẹ otọ rẹ Izrẹl Oba! Oba na rhire kẹ igogo ẹne rẹ otọ na re.

³Asakiephana oba na bru we rhire, ki mi che siobọ nẹ ophu mẹ bru we rhe, ki mi hwe we fiki rẹ ẹgua wẹn.

⁴Ẹro me se ju we vwo-o, eyẹ me re ehrọre wẹ-ẹ, ẹkẹvuọvo ki mi hwe we fiki rẹ idjerhe wẹn, vwe ọke rẹ ẹgua wẹn vwọ hẹ uherevie wẹn na. Etiyin ku wọ riẹn nẹ mẹvwẹ Ọrovwohwo na.

⁵Enẹ Ọrovwohwo Ọghẹnẹ tare: Okpetu vwa okpetu! Nighe, ọ cha rhe.

⁶Oba rhire, oba na rhire, o vrẹn vwọ kpahe owẹ. Nighe, ọ cha.

⁷Ughwu wẹn bru we rhire, E ihwo re dia otọ na; ọke na rhire ẹdẹ na kẹrire, ẹdẹ rẹ edo, ọ dia ẹdẹ re vwo kperi ukperi rẹ aghọghọ vwẹ obenu rẹ ugbenu-u.

⁸Asakiephana me cha kpare ivuemiovwo mẹ ku we nanana. Me cha vwẹ ophu mẹ kpahe owẹ, ki mi guẹdjọ wẹ kirobo rẹ idjerhe wẹn epha; ki mi hwe we fiki rẹ ẹgua wẹn.

⁹Ẹro mẹ se ju we vwọ-ọ, eyẹ me re ehrọre wẹ-ẹ, ki mi gbe oja kẹ wẹ re kirobo rẹ idjerhe wẹn epha, yẹ ẹgua wẹn ji hẹ uherevie wẹn. Etiyin ku wọ riẹn nẹ mẹvwẹ Ọrovwohwo na, re ghwiẹ wẹ.

¹⁰Nighe, ẹdẹ na! Nighe, ọ cha! Ughwu wẹn rhire, orhiẹn rẹ eku ghwẹ ẹbe phihọ re, eheri kpa ipho re.

¹¹Ozighi rhe rho hirhe phihọ ọkpọ rẹ uvumwemwu; ọvuọvo rọye che chekọ-ọ, eyẹ obuebu raye-en, eyẹ efe raye-en, eyẹ ohwo rode gbe dia ohri raye-en.

¹²Ọke na rhire, ẹdẹ na si kẹrire. E jẹn ohwo rọ de ghọghọ-ọ eyẹ ohwo rọ shẹ muomahọ-ọ, kidie ivuemiovwo ọ hẹ enu rẹ ẹgbotu rayen ejobi.

¹³Kidie ọ rọ she gbi che rhivwi bru obo rọ shẹre-e, vwẹ ọke rẹ ayen vwọ herọ na. Kidie ivuemiovwo ọ hẹ enu rẹ ẹgbotu rayen ejobi, o rhe che rhivwi kpo uko-o, fiki rẹ orukuruku rọye, ohwo ovuọvo rọ sa sẹro re arhọ rọye herọ-ọ.

¹⁴Ayen hworo owanre ayen choma ejobi nure; ẹkẹvuọvo ọvuọvo kpo ofovwi-i, kidie ivuemiovwo me o hẹ enu rayen ejobi.

¹⁵Ọlọkọ ọ hẹ uphephẹ, emiavwe vẹ owẹvwe hẹ evun rẹ uwevwi, ọ rọ hẹ obo uphephẹ ghwu ughwu rẹ ọlọkọ; ọ rọ hẹ obo evun rẹ orere owevwe te emiavwe ke ghwọrọ.

¹⁶O da dianẹ ohwo ro ghwu chekọ vwọ da dje vabọ, ke ayen dia enu rẹ igbenu kerẹ ilekuku rẹ iyara, ayen ejobi re beroma, ọvuọvo fiki re orukuruku rọye.

¹⁷Abọ na ejobi ke ghwrọghọ, iwurho na ejobi ke ghwrọghọ kerẹ ame.

¹⁸Ayen vwẹ esiso rhuo oma rayen, uguegue de rhurhu ayen; omavovwẹ vọn opharo rọye, uyovwi rayen gbe akpan.

¹⁹Ayen ghwẹ idọnọ rayen phihọ evun rẹ irhuvwu, iro rayen epha kerẹ eravwọ ri jẹfuọn; idọnọ vẹ iro rayen se sivwi ayen vwẹ ẹdẹ rẹ ivuemiovwo rẹ Ọrovwohwo na-a, ayen se fue owẹvwe raye-en eyẹ ọ sa vọn evun raye-en. Kidie ọye uchukurhe umwemwu rẹ orukuruku rayen.

²⁰Ekuakua iyoyovwi rẹ oma ẹrhuẹrẹ rayen ayen de ghwa ayen diodi, ayen vwẹ ihoho rẹ ẹgua rayen vwo ru obo ri tuoma rayen; vwẹ ọtiọye na ki mi ru obo ri jẹfuọn kẹ ayen.

²¹Ki mi phio phihọ obọ rẹ erhorha rẹ dia emuọre rayen, rọ dia ugborho kẹ ihwo umwemwu rẹ akpọ na, ayen ki gbe ẹgua.

²²Ki mi si ẹro me nẹ ayen, rere ayen mrasan gbe asan ọghaghare mẹ ẹgua; iji ke cha ruo i mi gbe ẹgua,

²³a Me kua fiotọ. Fikiridie otọ na vọnre vẹ uruemu rẹ ọbara orere na vọnre vẹ ozighi,

²⁴Me vwẹ ihwo re ma bra vwẹ ẹgborho na ejobi rhe reyọ iwevwi rayen, eheri rẹ egba rayen na ejobi ki vwo oba, asan efuanfon rayen ejobi ke gbe ayen ẹgua.

²⁵Ọke rẹ ọdjarhe da rhe, kẹ ayen nọ ekpẹn rẹ ufuoma, ẹkẹvuọvo ayen gbe mrẹ ọvuọvo-o.

²⁶Ughwu kpahe ughwu, ekuvwie kpahe ekuvwie, ayen guọnọ emramrẹ vwẹ obọ rẹ ọmraro na, yẹ urhi re ghwrẹ vrẹn orherẹn abọ, aghwanre phiẹn ekpako na.

²⁷Ovie na muomaphihọ osun na akpọ nuro ọhọ, abọ rẹ ihwo rẹ otọ na ghwuru ghwrọghọ fiki rẹ oshọ. Kirobo rẹ idjerhe rayen epha ọye mi ru kẹ ayen, kirobo rẹ ẹdjọ rayen epha eriyin mi ji gu ayen ẹdjọ, ke ayen riẹn nẹ mẹvwẹ Ọrovwohwo na.