Read urhobo Daniẹl 12 Bible Online

Daniẹl 12 - urhobo bible

Daniẹl 12

¹Ọke yena Maikẹl ko che vrẹn rhe, osun rode na re vwo mu vwẹ enu rẹ ihwo wẹn. Ọke rẹ ukpokpogho ko che te, oghẹre ra je mrẹ dẹvo-o nẹ ọke rẹ ẹgborho na vwọ mama rhiri rhi te ọke na, ẹkẹvuọvo vwẹ ọke yena ihwo wẹn ke che sivwi ayen, kohwo kohwo ra mrẹ odẹ rọye vwẹ ọbe na.

²Ihwo buebu re vwerhẹre vwẹ evun ekpẹn rẹ otọ na ke cha rhọvwọ, evọ kpo arhọ ri bẹdẹ, evo kpo omẹvuọ vẹ ehwẹjẹ ri bẹdẹ.

³Ihwo re ghwanre ki che lọ wrowro vwo obo irharhe, otu re rhẹriẹ ihwo buebu hirhe phihọ ọvwata, ke cha dia kerẹ isio bẹdẹ bẹdẹ.

⁴Ẹkẹvuọvo wẹ, Daniẹl, rhurhu eta na, ko ọbe na gbe, bẹsiẹ rẹ ọke rẹ oba na vwo te. Ihwo buebu cha djẹ rhe djẹ kpo, erianriẹn che bu phihọ.

⁵Etiyin mẹvwẹ ri Daniẹl de ni, nighe, ihwo ivẹ efa de mudia, ọvo hẹ egbẹ rẹ urhie nana, ọvo hẹ egbẹ rẹ urho yena.

⁶Me da ta kẹ ohwo na rọ vwẹ esada rhuo rọ hẹ obenu rẹ ame rẹ urhie na, Mavọ o kri te ra ke mrẹ oba rẹ igbunu nana?

⁷Ohwo na rọ vwẹ esada rhuo na rọ hẹ obenu rẹ ame rẹ urhie na, da kpare obọrhe rọye vẹ obọhwẹre rọye kpenu; Mi de nyo obo rọ vwẹ ọ rọ herọ bẹdẹ na vwo duvwu iyori, tanẹ ọ dia ọke ọvo, ọke ivẹ kugbe ubrọ rẹ ọke, vẹ ọke rẹ ẹguọghọ rẹ ogangan rẹ ihwo efuanfon na vwo te oba, eravwọ nana ejobi che ru gba.

⁸Mi nyori, ẹkẹvuọvo yọ ro vwẹ-ẹ. Etiyin me da ta, E Ọrovwovwe, die ri che nẹ evun rẹ eravwọ nana cha?

⁹Ọ da ta, Yanran kpo asan wọ ra, Daniẹl, kidie erhurhu eta na e de rhe kọ ayen gbe bẹsiẹ rẹ ọke rẹ oba na vwọ te.

¹⁰Ihwo buebu ki che ru oma rayen fon, ayen mi rhi ru oma rayen fuanfon, kẹ ayen nabọ fon; ẹkẹvuọvo ohwo umwemwu ko che ru phihọ yẹ ohwo umwemwu ọvuọvo che vwo ọhọ rọye-e ẹkẹvuọvo otu re ghwanre ki vwo ẹruo rọye.

¹¹Nẹ ọke ra cha vwọ reyọ izobo rẹ ẹtorhẹ rẹ kọke kọke na yanran, rẹ ẹguegbe rọ nẹrhẹ asan kua fiọtọ re che vwo muo viẹ, ko dia ẹdẹ uriori gbe ujori ivẹ gbe ujọne gbẹ ihwe.

¹²Ebruphihọ kẹ ohwo rọ sa hẹrhẹ rọ de te ẹdẹ uriori ujori erha gbẹ ọgban gbẹ iyori.

¹³Ẹkẹvuọvo gba yanran bẹsiẹ rẹ oba na ki te; ku wo che rovwoma, ku wo che mudia phihọ asan ra ghare ke we vwẹ oba rẹ ẹdẹ na.