Read urhobo Daniẹl 2 Bible Online

Daniẹl 2 - urhobo bible

Daniẹl 2

¹Vwẹ ukpe rivẹ rẹ eriọ ri Nebukadreza ovie, Ọ da vwerhẹ evwerhẹ, etiyin udu de bro, o de gbune rhọvwọ.

²Etiyin ovie na de se otu rẹ egbẹnẹke, idjene, eboepha, kugbe ihwo ri Kaldia ejobi koko rere ayen fa evwerhẹ na kẹ ovie. Etiyin ayen da rhe, ayen de rhi mudia phihọ obaro rẹ ovie na.

³Etiyin ovie da ta kẹ ayen, Me vwerhẹ evwerhẹ udu ko bru vwẹ me vwọ riẹn otọ rẹ evwerhẹ na.

⁴Etiyin ihwo ri Kaldia na da ta kẹ ovie na, E Ovie wọ dia bẹdẹ! Ta evwerhẹ na kẹ idibo wẹn, kẹ avwanre djẹ otọ rọye vwọ kẹ wẹ.

⁵Ovie na da kpahe kẹ ihwo ri Kaldia, Ota ro nẹ obọ mẹ rhe muero: wa gbe rha fan otọ rẹ evwerhẹ na kẹ vwẹ-ẹ, ka cha sanvwe abọ vẹ awọ nẹ ovwan oma, uwevwi rẹ ovwan ka je guọghọ ayen te otọ.

⁶Ẹkẹvuọvo ovwan da fan otọ rẹ evwerhẹ na kẹ vwẹ, ko wa mrẹ ẹse te esa vẹ ọrho rode vwẹ obọ mẹ. Vwẹ ọtiọye na wa gba fan otọ rẹ evwerhẹ na kẹ vwẹ.

⁷Ayen da kpahe vwẹ obọ rivẹ, E jẹn ovie ta evwerhẹ na kẹ idibo rọye, kẹ avwanre fan otọ rọye kẹ wẹ.

⁸Etiyin ovie da kpahe ọ da ta, Me riẹnre nẹ ovwan di ruẹ ọke na gro, kidie wa mrẹre nẹ ota ro nẹ obọ mẹ rhe muẹro.

⁹Nẹ wa sa fan otọ rẹ evwerhe na kẹ vwẹ-ẹ, ota ọvuọvo kpoi kọye me ta kẹ ovwan, wa rhọvwe kugbe nẹ wa vwọrọn efian kugbe eta imiomiovwi vwẹ obaro mẹ bẹsiẹ rẹ ọke na vwọ rherie. Fiki rẹ ọtiọye na wa gba ta evwerhẹ na kẹ vwẹ, ke me riẹn nẹ ovwan sa fan otọ rọye.

¹⁰Ihwo ri Kaldia na da kpahe ke ovie na, O vwo ohwo ọvuọvo vwẹ akpọ na ro se ru obo rẹ ovie na nọre na-a, kidie a je mrẹ ovie rode ro vwo ogangan rọ nọ ekpẹn rẹ emu ọtiọnana vwẹ obọ rẹ egbẹnẹkẹ, eyẹ idjene, eyẹ eboepha, eyẹ, erienda rọye devọ-ọ.

¹¹Emu rẹ ovie nọ ekpẹn rọye na pha bẹnbẹn, o vwo ohwo ọvuọvo ro se dje phia kẹ ovie-e jokpa nẹ edjọ rọ vẹ ihwo rẹ akpọ yeri kugbe-e.

¹²Fiki rẹ ọnana ophu de mu ovie na ivun de ghwie mamọ etiyin ọ da tanẹ ehwe evwaghwanre ri Babilọn ejobi rẹ.

¹³Ọtiọye na, re vwo ghwoghwo nẹ ehwe evwaghwanre na, ke ayen je guọnọ Daniẹl vẹ irivẹ rọye, hwe.

¹⁴Etiyin Daniẹl da vwẹ ẹghwanre vẹ iroro kpahe ota kẹ Ariọk, onotu rẹ idugbu rẹ ovie na, rọ yanran re hwe evwaghwanre ri Babilọn na.

¹⁵Ọ da ta kẹ Ariọk, onotu rẹ idugbu rẹ ovie na, Die sorọ rẹ ovie vwo ji urhi ọgangan ọtiọye? Etiyin Ariọk da vwẹ ota na phia kẹ Daniẹl.

¹⁶Etiyin Daniẹl yanran ọ da ra rẹ ovie na nẹ ọ vwẹ ọke kẹ ọye, rere ọ sa fan otọ rọye kẹ ovie na.

¹⁷Etiyin Daniẹl de kpo obo uwevwi ọ da ra nẹ iyẹnrẹn rẹ ota na kẹ Hananaya, Mishẹl vẹ Azaraya, irivẹ rọye.

¹⁸Ọ da ta kẹ ayen nẹ ayen nọ ekpẹn rẹ ehrọre vwẹ obọ rẹ Ọghẹnẹ rẹ odjuvwu kẹ emu rẹ igbunu nana, rere Daniẹl vẹ irivẹ rọye vwo je ghwo kugbe evwaghwanre ri chekọ vwi Babilọn na.

¹⁹Etiyin a da vwẹ otọ rẹ igbunu na phia kẹ Daniẹl vwẹ evun rẹ emramrẹ vwẹ ason. Etiyin Daniẹl de bruba kẹ Ọghẹnẹ rẹ odjuvwu.

²⁰Daniẹl da ta: Ebruba kẹ odẹ rẹ Ọghẹnẹ bẹdẹ bẹdẹ, ohwo ro vwo ẹghwanre vẹ ẹgba.

²¹Ọ rhẹriẹ ọke vẹ ẹghẹre; ọye ri siẹ ivie nẹ ẹdia ọ me rha vwẹ ivie mu, ọ vwẹ aghwanre kẹ ihwo re ghwanre, ọ me rha vwẹ erianriẹn kẹ ihwo ri vwo ẹruọ

²²Ọ vwẹ obo ri kodori vẹ emuigbunu vwọ phia, ọ riẹn obo rọ hẹ evun rẹ ebri, orẹmrẹ vọye gba dia.

²³We, E Ọghẹnẹ rẹ esẹ mẹ, Me vwẹ ẹkpẹvwẹ vẹ ejiro kẹ, kidie wẹ re kẹ vwẹ ẹghwanre vẹ ogangan, obo ma nọ ekpẹn rọye vwẹ obọ wẹ, wọ vwe rọ phia kẹ vwẹ, kidie ota rẹ ovie na wọ vwẹ rọ phia kẹ avwanre.

²⁴Ọtiọye na Daniẹl de bru Ariọk ra, ohwo rẹ ovie vwo mu nẹ ọ guọghọ evwaghwanre ri Babilọn na; ọ yanran ọ da ra ta ọtiọna kẹ, wo hwe evwaghwanre ri Babilọni-i, reyọ ovwẹ rhe ovie na, rere me ra fan otọ rẹ evwerhẹ rọye na vwọ kẹ.

²⁵Etiyin Ariọk da reyọ Daniẹl okpokpakpa rhe obaro rẹ ovie na, ọ da ta eta nana vwọ kẹ: Me mrẹ ohwo ọvo vwẹ usun rẹ ihwo re mu nẹ Juda rhe na rọ sa fan otọ rọye kẹ ovie na.

²⁶Ovie na da ta kẹ Daniẹl, re se odẹ rọye Bẹlteshaza, Wọ sa ta evwerhẹ re me vwerhẹre na kẹ vwẹ, re wọ da je sa fan otọ rọye kẹ vwẹ?

²⁷Daniẹl da kpahe kẹ ovie, o vwo ọvwaghwanre ọvuọvo, eyẹ otu rẹ idjene eyẹ otu rẹ egbẹnẹkẹ eyẹ otu rẹ fan otọ rẹ isio ri se dje emuigbunu nana rẹ ọvie nọre na kẹ-ẹ,

²⁸ẹkẹvuọvo Ọghẹnẹ ọvo rọ hẹ obo odjuvwu ro se dje otọ rẹ igbunu phia, obo re cha phia vwẹ ẹdẹfa ọye ọ vwọ phia kẹ ovie, Nebukadreza na. Evwerhẹ vẹ emramrẹ re kọn ro owẹ uyovwi vwẹ ọke ru wo vwo shevwerhẹ na kẹ ena.

²⁹Vwọ kẹ wẹ E ovie, ọke wo vwọ shevwerhẹ ehwa, iroro rẹ obo re cha phia vwẹ ẹdẹfa de bru we rhe, ohwo rọ vwẹ otọ rẹ emuigbunu phia na da vwẹ obọ re cha phia vwẹ obaro nẹ wẹ.

³⁰Ẹkẹvuọvo vwọ kẹ vwẹ, ọ dianẹ mi vwo aghwanre nọ ihwo ri chekọ-ọ, ọye nẹrhẹ a vwẹ otọ rẹ emuigbunu na vwọ phia kẹ vwẹ-ẹ, ẹkẹvuọvo rere a vwọ sa fan otọ rọye kẹ ovie, rere wọ sa vwọ riẹn iroro rọ hẹ evun wẹn.

³¹Wọ mrẹre, E ovie, nighe oma rode ọvo, oma nana, gidigba o lo wronwron, o de mudia vwẹ obaro wẹ, ekroma rọye muọshọ.

³²Uyovwi rẹ oma nana da dia omamọ rẹ oro e vwo ruo udu rọye vẹ abọ rọye da dia idọnọ ọfuanfon, okpevun rọye vẹ ekpoghowọ rọye kẹ ẹrovwo,

³³igbawọ rọye utehru, awọ rọye abọvo utehru abofa ophiẹn.

³⁴Wo vwo no re, e de bru oragha ọvo nẹ asa ọvo rhe, ọ dia ohwo rẹ akpọ ri ruro-o, o de re she teye awọ rẹ oma na ra vwẹ utehru vẹ ọphiẹn ma na, ọ da guọghọ ayen ibribro,

³⁵etiyin te utehru na, ọphiẹn na, ẹrovwo na, idọnọ ọfuanfọn vẹ oro na, ayen ejobi de vwirhi ibribro, etiyin e da rhe dia kerẹ ivwuvwu ri tue kuotọ vwẹ okeuvo, etiyin odju de dju ayen kufia, a gbe mrẹ ivwuvwu rayen ọfa-a. Ẹkẹvuọvo oragha ro she teye oma na de rhi hirhe phihọ ugbenu rode ọ da rhe vọn otọ na ejobi.

³⁶Onana evwerhẹ na, asakiephana ke ma fan otọ rọye kẹ ovie.

³⁷Wẹ, E Ovie, ọye ovie ro vwo ivie, rẹ Ọghẹnẹ rẹ obo odjuvwu vwẹ uvie na kẹ, te ogangan vẹ ẹgba, kugbe urinrin,

³⁸je vwẹ obọ wẹn o phi emu na ejobi phihọ, kasan kasan rẹ ayen epha ejobi, emọ rẹ ihwo, eranvwe rẹ aghwa te ephran rẹ irharheghe, ọ da tanẹ wo sun ayen ejobi — wọwe ọye uyovwi rẹ oro na.

³⁹Wọ da re nu, ovie ọfa ro yovwi te we cha rhe, uvie rerha re ẹrovwo je cha, ro che sun akpọ na ejobi.

⁴⁰Uvie rẹne je cha, gangan kerẹ utehru fikiridie utehru kporo ọ me rha guọghọ emu ejobi yẹyẹghẹ, kirobo rẹ utehru guọghọ emu yẹyẹghẹ, ọtiọye o che hwe, o me rha guọghọ enana ejobi.

⁴¹Kirobo wọ mrẹ awọ na vẹ irhiawọ na abọvo ọphiẹn abọvo utehru na, uvie na ko cha ghare oma, ẹkẹvuọvo ẹgan rẹ utehru evo kọ cha dia evun rọye, kirobọ wọ mrẹ nẹ a gua utehru vẹ ọphiẹn kugbe na.

⁴²Kirobo rẹ irhiawọ vẹ awọ na dia abọvọ utehru abọvo ọphiẹn na, ọtiọye uvie na je cha dia, ẹbẹre ọvo ganre, ẹbẹre ọvo ghwẹ.

⁴³Ọtiọbo wọ mrẹre nẹ a vwẹ utehru gua ọphiẹn na, ọtiọye ayen che ku oma kugbe ohwohwo vwẹ orọvwe, ẹkẹvuọvo ayen cha sa tan kugbe-e, kirobo rẹ utehru vẹ ọphiẹn se kugbe-e na.

⁴⁴Vwẹ ọke rẹ ivie yena, Ọghẹnẹ rẹ odjuvwu na cha vwẹ uvie ọvo mu, ra sa guọghọ-ọ eyẹ e che siobọ nẹ ekete rọye ke ihwo ọfa-a. O cha guọghọ ivie nana ejobi ibribro ọ me vwẹ ayen te oba, kẹ o mudia bẹdẹ,

⁴⁵kirobo wọ mrẹre nẹ e bru oragha ọvo nẹ ugbenu ọvo rhe jo dia obọ rẹ ohwo rẹ akpọ ruro-o, ọ da guọghọ utehru na ibribro, ẹrovwo, ọphiẹn, idọnọ ofuanfon vẹ oro na. Ọghẹnẹ rọ rhọro vwẹ obo re cha phia vwẹ obaro nẹ ovie nure. Evwerhẹ na muẹro, otọ rọye efan ji muẹro.

⁴⁶Etiyin ovie na Nebukadreza, de she bọvwọ opharo rhuotọ, o da vware Daniẹl, ọ da ta nẹ a reyọ izobo vẹ insens vwo ze kẹ.

⁴⁷Ovie na da ta kẹ Damẹl, Uyota, Ọghẹnẹ wẹn ọye Ọghẹnẹ ro vwo eghẹnẹ kugbe Ọrovwohwo ro vwo lvie ejobi, ọye ọvo ji dje emuigbunu phia, kidie wo se dje emuigbunu nana phia.

⁴⁸Etiyin Ovie na de mu ọghọ rọde vwọ kẹ Daniẹl. O de ji ru ẹse ride buebu vwọ kẹ, o de vwo mu osun ro suẹn unuakpọ ri Babilọn ejobi, kugbe onotu vwẹ enu rẹ evwaghwanre ri Babilọn ejobi.

⁴⁹Daniẹl da nọ vwẹ obọ rẹ ovie na, ọ da vwẹ ẹdia kẹ Shadrak, Mẹshak vẹ Abẹdnigo nẹ ayen vwẹ ẹro te iruo rẹ ubrakpọ ri Babilọn, ẹkẹvuọvo Daniẹl da rha daji obo ọguan rẹ ovie na.