Read urhobo Hosia 1 Bible Online

Hosia 1 - urhobo bible

Hosia 1

¹Ota rẹ Ọrovwohwo de bru Hosia rẹ ọmọ ri Beri rhe, vwẹ ọke rẹ Uzzia, Jotam, Ehaz kugbe Hẹzikaya, ivie ri Juda, kugbe ọke ri Jeroboam rẹ ọmọ ri Joash, ovie rẹ Izrẹl.

²Ọke rẹ Ọrovwohwo vwo ka wa oma ri Hosia ta ota, Ọrovwohwo da ta kẹ Hosia, Yanran wọ ra rọvwọ igberadja wo vwiẹ emọ rẹ igberadja, fikiridie ihwo na gbe ọfarhiẹ rode rẹ ayen vwọ sen Ọrovwohwo.

³Ọye ọ da yanran ra reyọ Goma rẹ ọmọtẹ ri Diblam, ọ da mrẹ evun ọ de vwiẹ ọmọshare.

⁴Ọrovwohwo da ta kẹ, se odẹ rọye Jezrẹl, vwẹ ọmọke emerha, ke me cha vwẹ oja rẹ uwevwi ri Jehu fiki rẹ ọbara ri Jezrẹl, uvie rẹ uwevwi rẹ Izrẹl kọ vwo oba.

⁵Vwẹ ẹdẹ yena ki mi vwirhi umurhabọ rẹ Izrẹl na vwẹ iyara ri Jezrẹl.

⁶Ọ vwọ rhoma mrẹ evun o de vwiẹ ọmọtẹ. Ọrovwohwo da ta kẹ, Se odẹ rọye Ovwo-ehrọre-e, fikiridie me gbe cha re ehrọre rẹ uwevwi rẹ Izrẹl ọfa-a, mi che vwo ghovwo ayen kakaka-a.

⁷Ẹkẹvuọvo me re ehrọre rẹ uwevwi ri Juda, ki mi sivwi ayen vwẹ oma rẹ Ọrovwohwọ rẹ Ọghẹnẹ rayen, Me vwẹ umurhabọ sivwi aye-en, eyẹrẹ ọlọkọ, eyẹrẹ ofovwi eyẹrẹ Iyesi, eyẹrẹ ihwo re gua iyesi.

⁸Ọke re vwo bru Ovwo-ehrọre-e evie nu, ọ da mrẹ evun ọ de vwiẹ ọmọshare.

⁹Ọrovwohwo da ta, se odẹ rọye Ọdia-ihwo-mẹ-ẹ, fikiridie ovwan dia ihwo mẹ-ẹ, Me je dia Ọghẹnẹ wẹ-en.

¹⁰Ihwo rẹ Izrẹl cha dia kerẹ ehavwo rẹ urhie ra sa vwavwe-e eyẹ e se keri-i, vwẹ asan rẹ a da ta kẹ ayen nẹ, Ovwan dia ihwo mẹ-ẹ, ka je ta kẹ ayen nẹ, Ovwan emọ rẹ Ọghẹnẹ ri bẹdẹ na.

¹¹Te ihwo ri Juda vẹ ihwo rẹ Izrẹl ka ghwẹ ayen koko, kẹ ayen vwẹ ohwo ọvo mu osun kẹ oma rayẹn, kẹ ayen yan nẹ otọ na, fikiridie ẹdẹ ri Jezrẹl cha rho gangan.