Read urhobo Hosia 13 Bible Online

Hosia 13 - urhobo bible

Hosia 13

¹Ọke rẹ Ifrem vwọ ta ota, ihwo de kpogho; a da kparọ kpenu vwẹ Izrẹl, ẹkẹvuọvo rọ vwọ wan oma ri Baal re abe o de ghwu.

²Asakiephana kẹ ayen ruẹ umwemwu buẹ phihọ, ayen de duvwu oma ra wranre kẹ oma rẹ ayen, oma ra vwẹ idọnọ efuanfon vwo ru re bru ona phihọ, ayen ejobi iruo rẹ ọwena. We ze izobo kẹ enana, ayen me ta, ihwo ke fiọnfiọn ema rẹ irhuẹn unu!

³Fiki rẹ ọtiọye ayen ke cha dia kerẹ evwru rẹ irhiọke yẹrẹ irho ro krẹ ọke ya-a, kerẹ iphopho ri tuẹ nẹ utuwevwi rẹ de wuye ọka eyẹ kerẹ ivwirhi re wan evakpo ruẹ otafe.

⁴Mẹvwẹ Ọrovwohwo rẹ Ọghẹnẹ wẹn nẹ otọ rẹ Ijipt rhe; wọ riẹn Ọghẹnẹ ọfa vrẹn vwẹ-ẹ ọ dia omẹvwẹ-ẹ osivwi ọfa gbe herọ-ọ.

⁵Mẹvwẹ re riẹn wẹn vwẹ evun rẹ aghwa, vwẹ otọ rẹ ame epha-a.

⁶Ẹkẹvuọvo rẹ evun vwọ vọn ayen nu, oma ko mu ayen, udu rayen da kpare kpenu. Ọye me da chọrọ ayen ẹro.

⁷Ọtiọye na ke me cha dia kerẹ okpohrokpo kẹ ayen, kerẹ edjanakpo ro fiọnko vwẹ oma rẹ idjerhe.

⁸Mi che pho mu ayen kerẹ edjanakpo re mie emọ, ke me chẹghẹ udu rayen rhie phihọ, kẹ etiyin me da re ayen nu kerẹ okpohrokpo, kirobo rẹ eranvwe rọ djọma chẹghẹ ayen.

⁹Me guọghọ owẹ, E Izrẹl, kono sa chọ we uko?

¹⁰Tivọ ovie wẹn epha, ro sivwi uwe; isun wẹn rhọ, re chọ ochọ wẹ ihwo re wọ ta nẹ; Kẹ vwẹ ovie kugbe isun?

¹¹Me kẹ wẹ ovie vwẹ ophu mẹ, vwẹ ivuemiovwo mẹ mi de si ayen nu.

¹²Orukuruku rẹ Ifrem a gba ayen koko, umwemwu rọye a ghwẹrẹ koko.

¹³Obi rẹ uvwiẹ nuro oma rhe, ẹkẹvuọvo ọmọ ogheghẹ o ruẹ, asakiephana ọ gbe cha ohwarha-a vwẹ asan unu rẹ ọmọ wan cha.

¹⁴Ke me tan ayen nẹ obọ rẹ ogangan rẹ Erivwi? Me tan ayen nẹ obọ rẹ Ughwu? E Ughwu, emiavwe wẹn rhọ? E Erivwi, tivọ ẹguọghọ wẹn epha? Ẹhrọre chọrọ ovwẹ ẹro.

¹⁵Owenẹ ọ rho bodo bodo kerẹ ẹgon, odju rẹ obaro ọnre, odju rẹ Ọrovwohwo cha rhe, ọ kpara nẹ obo aghwa cha; ogbugbu rọye cha kpọ, imigbo rọye cha yamu, o che hwerhe kemu kemu esiri rọ sẹro rọye nu ejobi kufia.

¹⁶Sameria kọ ghwa abe rọye, kidie o mu kpahe Ọghẹnẹ rọye, a cha vwẹ ọlọkọ hwe ayen, a cha vwẹ emọ rayen fa otọ hwe, ka cha bẹrẹ evun rẹ eya vẹ evun rhie phihọ.