Read urhobo Hosia 5 Bible Online

Hosia 5 - urhobo bible

Hosia 5

¹Nyo ọnana, E irherẹn! wa kerhọn, E uwevwi rẹ Izrẹl! Wa kerhọn, E uwevwi rẹ ivie na! Kidie ẹdjeguo na bru uwe rhe; kidie wọ vwẹ oma ru ufi vwi Mizpa, vẹ ariri ra riẹn phihọ enu ri Tabọ.

²Ayen da tọn ukpotọ okokdo phihọ Shitim, ẹkẹvuọvo me cha fa ayen ejobi.

³Me riẹn Ifrem, Izrẹl sioma nu kẹ vwẹ-ẹ, kidie asakiephana, E Ifrem, wo gbe igberadja, Izrẹl gbe oma ẹgua.

⁴Uruemu rayen gbi jẹn ayen hirhe bru Ọghẹnẹ raye-en. Kidie erhi rẹ igberadja hẹ evun rayen, ayen gbe riẹn Ọrovwohwo-o.

⁵Eheri rẹ Izrẹl se iseri hwe; Ifrem kọ cha yẹnghrẹn vwẹ abe rọyẹ, Juda vẹ ayen gba cha yẹnghrẹn kugbe.

⁶Ayen vẹ igodẹ kugbe irhuẹ rayen gba yanran ra guọnọ Ọrovwohwo, ẹkẹvuọvo ayen cha mrẹ-ẹ. O sioma nu kẹ ayen.

⁷Ayen phiẹn Ọrovwohwo; kidie ayen vwiẹ emọ rẹ erhorha. Asakiephana emeranvwe ọkpokpọ cha ghwọrọ ayen vẹ idju rayen ejobi.

⁸Hworo owanre vwi Gibia, hworo owanre vwi Rama Bunu vwi Bẹtaven Phariẹ, E Bẹnjamin.

⁹Ifrem ko che hirhe phihọ erhurhu vwẹ ẹdẹ rẹ ojaẹriọ, vwẹ ohri rẹ uvwiẹ rẹ Izrẹl mi de ghwoghwo obo ri muẹro

¹⁰Isun ri Juda da họhọ ihwo re kpare ughwru; enu rẹ ayen mi ku ophu mẹ phihọ kerẹ ame.

¹¹E shenyẹ Ifrem, a guọgherọ vwẹ ẹdjeguo, fikiridie emu gheghe ọ guọnọ nene.

¹²Fiki rẹ ọtiọye na ke me họhọ eghwọghwọ kẹ Ifrem, kerẹ ophu kẹ uwevwi ri Juda.

¹³Ọke rẹ Ifrem vwọ mrẹ ọga rọye, ri Juda vwọ mrẹ omẹwan rọye, etiyin Ifrem de kpo Asiria, o de ji ohwo bru ovie rode na. Ẹkẹvuọvo o se sivwi uwe-e eyere sivwi ora wẹn kpo-o.

¹⁴Kidie me cha họhọ okpohrokpo kẹ Ifrem, kerẹ ọmọ rẹ okpohrokpo kẹ uwevwi ri Juda. Mẹvwẹ, ekpuyovwi mẹ, me da bẹrẹ nu ke me yanran, Mi che muo yanran, yẹ o vwo ohwo ro se sivwo mie vwe-e.

¹⁵Mi che rhivwi kpo ẹdia mẹ, bẹsiẹ rẹ ayen vwọ rhọvwe abe rayen ayen me rhe guọnọ opharo mẹ vwẹ evun rẹ ọdjorho rayen ke ayen cha guọnọ ovwẹ tane,