Read urhobo Joẹl 3 Bible Online

Joẹl 3 - urhobo bible

Joẹl 3

¹Kidiẹ nighere, vwẹ ẹdẹ yena kugbe ọke yena, re me da cha rhoma vwẹ ughwẹ ri Juda vi Jerusalẹm rhivwi rhe na,

²ke me ghwẹ ẹgborho na ejobi koko ke me vwẹ ayen rhe iyara ri Jehoshafat, kẹ etiyin me da vwẹ ayen gu ẹdjọ, fiki rẹ ihwo mẹ kugbe ireuku mẹ Izrẹl, fikiridie ayen hra ayen nene ẹgborho na ejobi. Ayen da ghare otọ mẹ reyọ.

³Ifiki rẹ ihwo mẹ we vwo duvwu itẹ. we de siobọ nẹ ọmọshare nẹ o gbe igberadja, wa da vwi fiki rẹ udi shẹ ọmọtẹ, rere ovwan sa da udi.

⁴Die ovwan epha kẹ vwẹ, E Taya vi Sidọn, kugbe ubrakpọ ri Filistia ejobi? Wọ rhoma hwa osa kẹ vwẹ fiki rẹ emuọvo? Ọ da dianẹ wọ rhoma hwa osa kẹ vwẹ, ye Me cha nọ ekpẹn rẹ uruemu wẹn vwẹ uyovwi wẹn kpata kpata.

⁵Kidie wọ reyọ idọnọ efuanfon Mẹ kugbe oro Mẹ, wọ da ghwẹ efe ọghaghare mẹ kpo uwevwi rẹ ẹdjọ wẹn.

⁶Wọ shẹ ihwo ri Juda vi Jerusalẹm kẹ ihwo ri Grik, wo de mu ayen yanran shesheri nẹ ughwru rayen.

⁷Ẹkẹvuọvo mẹ ra kpare ayen vrẹn nẹ asan ra she ayen ra na rhe, vwẹ uyovwi rẹ obọ wẹn Me da nọ ekpẹn rẹ uruemu wẹn na.

⁸Ke Me shẹ emeshare wẹn vẹ emetẹ wẹn ke emọ ri Juda, ayen ke rhoma she ayen kẹ ihwo ri Sabia, ẹgborho ro sheri gangan; kidie Ọrovwohwo tarọ nure.

⁹Ghwoghwo ọnana vwẹ ohri rẹ ẹgborho na: Muegbe rẹ ofovwi, Rhanriẹ udu rẹ egba na Jẹn eshare rẹ ofovwi na ejobi si te obonẹ, jẹn ayen rhe.

¹⁰Duvwu ighwro wẹn phihọ elọkọ, ibiakpa wẹn phihọ ibiri; jẹn ọvwiẹrẹ tanẹ, Mẹvwẹ ọgba ofovwi.

¹¹Broma wọ rhe, ovwan ẹgborho re kẹrobọ ghwẹ oma rẹ ovwan koko vwẹ etiyin. Reyọ otu rẹ ofovwi wẹn rhe, E Ọrovwohwo

¹²Gbe jẹn ẹgborho na jẹjẹ oma rayen, rere ayen rhe iyara ri Jẹhoshafat, kidie etiyin mi de che tidia de gu ẹdjọ rẹ ẹgborho re riariẹ ovwan phihọ na.

¹³Chọrọ oda rẹ ivuevun phihọ, kidie orhọ na ghwore. Ro evun rọye chiyo, kidie okọ ri vain na vọnre. ikpotọ na vọn mwavwe hwẹ, kidie umwemwu rayen rhoro gangan.

¹⁴Urogho, urogho, vwẹ evun rẹ iyara rẹ orhiebro! kidie ẹdẹ rẹ Ọrovwohwo na kẹrire vwẹ evun rẹ Iyara rẹ orhiebro.

¹⁵Te ọnre vẹ emeranvwe muegho, isio ri lo she divwi

¹⁶Ọrovwohwo de do nẹ Zayọn rhe, urhuru rọye da mra nẹ Jerusalẹm rhe, odjuvwu vẹ akpọ na de mu kpogho Ẹkẹvuọvo Ọrovwohwo hẹ odjahọ kẹ ihwo rọye, ogba ọgangan kẹ ihwo rẹ Izrẹl.

¹⁷Ọtiọye ku wa cha riẹn nẹ Mẹvwẹ Ọrovwohwo Ọghẹnẹ wẹn, rọ dia Zayọn, ugbenu ọfuanfon mẹ na. Jerusalẹm kọ cha fon erhorha gbe cha wanvrẹn bẹdẹ-ẹ.

¹⁸Vwẹ ẹdẹ yena udi ọvwevwerhe ko che sun nẹ igbenu na rhe, ame-ivie ki che sun nẹ igbenu itete na rhe, ukpọkẹre ri Juda ejobi ke cha djẹ ọkẹre rẹ ame, ogbugbu ọvo kọ cha djẹ nẹ uwevwi rẹ Ọrovwohwo rhe kọ cha kpọrhọ iyara ri Shitim.

¹⁹Ijipt kọ cha rhoma dia ofefe Edom kọ cha dia aghwa ofefe ghevweghe, fiki rẹ emu ogbarogba re ru kẹ ihwo ri Juda, kidie ayen sun ọbara rẹ ekun te otọ vwẹ otọ rayen.

²⁰Ẹkẹvuọvo ka dia Juda bẹdẹ, Jerusalẹm nẹ uvwiẹ re te uvwiẹ

²¹Ki mi reihri rẹ ọbara rayen, Me cha hworhẹ ihwo rẹ abe-e, kidie Ọrovwohwo na re dia Zayọn.