Read urhobo Emọs 1 Bible Online

Emọs 1 - urhobo bible

Emọs 1

¹Eta rẹ Emọs, rọ hẹ ohri rẹ isuigodẹ ri Tẹkoa, rọ mrẹre kpahe Izrẹl vwẹ ọke rẹ Uzaya ovie ri Juda vẹ ọke ri Jerobọam ọmọ ri Joash, ovie rẹ Izrẹl, ikpe ivẹ tavwe rẹ otọ ki kpogho.

²Ọ da ta: Ọrovwohwo na do ni Zayọn rhe, Ọ da ta ota ni Jerusalẹm rhe, egbri re isuigodẹ na muoma phihọ, enu ri ugbenu ri Kamẹl vwiori.

³Enẹ Ọrovwohwo na tare. Fiki rẹ ogbeku erha ri Damaskọs, ji kugbe ẹne, Me cha rha unu rẹ ehwe na-a, fikiridie ayen vwẹ akpẹrẹ rẹ utehru vwọ guọghọ Gilead.

⁴Vwe ọtiọye na mi che phi erhanre phihọ uwevwi ri Haziẹl. kọ cha torhẹ ogba ọgangan ri Bẹnhadad.

⁵Me cha guọghọ ogba ri Damaskọs, ki mi bru ihwo re dia Iyara rẹ Aven no kugbe ohwo rọ re uvie vwi Bẹnẹden; ihwo ri Siria ki kpo imu vwi kir, Ọrovwohwo na tarọ.

⁶E nẹ Ọrovwohwo na tare. Fiki rẹ ogbeku erha ri Gaza, ji kugbe ẹne, Me gbe sa rhan unu rẹ ehwe na-a fikiridie ayen mu ihwo na ejobi kpo imu a da vwẹ ayen kpo Idọm.

⁷Vwẹ ọtiọye na ke Me vwẹ erhanre torhẹ igbẹhẹ ri Gaza, kọ torhẹ ogba ọgangan rọye.

⁸Ki mi bru ihwo re dia Ashdọd kufia, kugbe ohwo rọ rẹ uvie vwẹ Ashkẹlọn, ki mi gbekpae Ekrọn; umuku rọ chekọ vwi Filistia ko ghwu kufia, Ọrovwohwo Ọghẹnẹ na tarọ.

⁹E nẹ Ọrovwohwo na tare. Fiki rẹ ogbeku erha ri Taya, kugbe ẹne Me gba sa rhan unu rẹ ehwe na-a; fikiridie ayen siobọ nẹ ihwo na ejobi kẹ Idọm, ayen gbe karophihọ ọphọ rẹ imoni-i.

¹⁰Vwẹ ọtiọye na ki mi che phi erhanre phihọ igbẹhẹ ri Taya, kọ torhẹ egba ọgangan rọye.

¹¹E nẹ Ọrovwohwo na tare: Fiki rẹ ogbeku erha rẹ Idọm, ji kugbe ẹne, mẹ gbe sa rhan unu rẹ ehwe na-a, fikiridie ọ vwẹ oda tua omoni rọye, ọ rha re ehrọre-e, ophu rọye rhe vwo ure-e, o de mu ophu rọye na rhiri bẹdẹ.

¹²Vwẹ ọtiọye na ki mi che phi erhanre phihọ Teman, kọ cha torhẹ ogba ọgangan ri Bozra.

¹³E nẹ Ọrovwohwo na tare: Fiki rẹ ogbeku erha rẹ ihwo rẹ Amọn, ji kugbe ẹne, Me gbe sa rhan unu rẹ ehwe na-a, fikiridie ayen hẹrẹ evun rẹ eya vẹ evun vwi Gilead, rere ughwru rayen vwọ rho phihọ.

¹⁴Vwẹ ọtiọye na ki mi che koko erhanre phihọ igbẹhẹ ri Rabah, kọ tọrhẹ ogba ọgangan rọye, re unuebo vwẹ ẹdẹ rẹ ofovwi, vẹ ọgbogho vwẹ ẹdẹ rẹ ogiribo;

¹⁵ke mu ovie rayen kpo imu, te ọye vẹ isun rọye, Ọrovwohwo na tarọ.