Read urhobo Emọs 5 Bible Online

Emọs 5 - urhobo bible

Emọs 5

¹Nyo ota nana ri mi vwerhe oma rọye keẹ wẹ na, E uwevwi rẹ Izrẹl.

²O sheri, o rhe vwo evrẹn ọfa-a, we ọmọtobẹ rẹ Izrẹl, a serọ vwẹ otọ obọ rọye, o gbi vwo ohwo rọ kparọ vrẹ-ẹn

³Kidie e nẹ Ọrovwohwo Ọghẹnẹ tare orere rẹ ihwo uriori nẹ cha ke ujori ọvo ri che chekọ, e re ujori nẹ cha ihwe kọye che chekọ kẹ uwevwi rẹ Izrẹl.

⁴Kidie e nẹ Ọrovwohwo ta kẹ uwevwi rẹ Izrẹl guọnọ ovwẹ re wọ rhọ;

⁵ẹkẹvuọvo wọ guọnọ Bẹtẹ-ẹl, wọ vwẹriẹ Gilga-al yere wọ samue kpo Bieshibaa; uyota e che mu Gilgal kpo imu, Bẹtẹl che hirhe phihọ odiodi.

⁶Guọnọ Ọrovwohwo re wọ rhọ, o de rhi mu la kerẹ erhanre vwẹ uwevwi ri Josẹf, kọ guọghọ, o rhe vwo ohwo ọvuọvo ro se furhie Bẹtẹ-ẹl,

⁷E we re rhẹriẹ orhiebro phihọ akoro na, ro chiyi ọvwata muotọ.

⁸Ohwo rọ ma Emetasa vẹ Oniọhọvikẹ rọ rhẹriẹ ebri hwi phihọ urhiọke, ọ Me rha rhẹriẹ uvo kpo ason, ro se ame rẹ abadi ejobi kpọ o mi rhe won ayen phihọ enu rẹ akpọ na, Ọrovwohwo na ọye odẹ rọye.

⁹Ohwo rọ nẹrhẹ a guọghọ ọgba, ẹguọghọ mi re she vwa ogba ọgangan,

¹⁰oma re ohwo rọ ghwọ kue ohwo vwẹ anurhoro tue ayen, ivun rẹ ohwo rọ ta uyota miovwo ayen.

¹¹Fiki rẹ obo we vwo chiyi ovwiogbere muotọ na ru wa da karhiẹ ọka rọye mie na, kọye wa vwọ bọn iwevwi rẹ eragha, ẹkẹvuọvo wa cha dia aye-en, wa kọn omamọ rẹ ogba ri vain, ẹkẹvuọvo wa cha da udi raye-en.

¹²Kidie mi riẹn obo rẹ ogbeku rẹ ovwan bute, kugbe obo re imwemwu re ovwan rho te weẹ ro kpokpo evwata, re ria udi, rọ djẹ ọ rẹ akpọ bẹn nẹ anurhoro na.

¹³Fiki rẹ ọtiọye na ohwo ro vwo ọhọ ko rhurhu unu vwẹ ọke yena; fikiridie ọye ọke umwemwu.

¹⁴Guọnọ erhuvwu ọ dia umiovwo-o, rere wọ rhọ, rere Ọrovwohwo, Ọghẹnẹ rẹ otuofovwi na, vwo nene uwe dia, kirobo wọ tare na.

¹⁵Tuoma rẹ umwemwu, guọnọ emu esiri, wọ bro omamọ orhiẹn vwẹ anurhoro, ọke ọvo Ọrovwohwo, Ọghẹnẹ rẹ otuofovwi na, kọ sa re ehrọre rẹ umuku ri Josẹf ro chekọ na.

¹⁶Fiki re otiọye e nẹ Ọrovwohwo tare, Ọghẹnẹ rẹ otuofovwi na; Ọrovwohwo na, omaebere kọ cha dia vwẹ evun rẹ osuere na, ejobi, ke ayen che kperi vwẹ irhuvwu na ejobi nẹ, eghwo! eghwọo! Ayen ki che se eghwẹrẹ na kpo omaemuophihọ otu re riẹn omaebere ke se ayen kpo oma evwerhe,

¹⁷vwẹ ogba ri vain ejobi kọ cha vọn vẹ omaebere kidie Me cha wan ohri rẹ ovwan vrẹn, eriyin Ọrovwohwo na tare.

¹⁸Ekan kẹ wẹ rọ guọnọ ẹdẹ rẹ Ọrovwohwo na! Die wọ vwọ guọnọ ẹdẹ rẹ Ọrovwohwo na? Ẹdẹ na ebri hwi, o vwo orẹmrẹ-ẹ,

¹⁹Kerẹ ọke rẹ ohwo a dje nẹ obọ rẹ okpohrokpo, edjẹnẹkpo da ra vwa, eyẹrẹ ohwo rọ ro evun rẹ uwevwi ọ da vwẹ oma vẹ abọ rere igbẹhẹ, ọrọdekọ da rhovwọ.

²⁰Ẹdẹ rẹ Ọrovwohwo na dia ebri hwi, ọ dia orẹmrẹ-ẹ, egho kpoi o vwo orẹmrẹ kaka-a?

²¹O tu vwẹ oma, Me jẹ orẹ rẹ ovwan fia, Ọghwẹkoko ofuefu rẹ ovwan na vwerhe ovwẹ oma-a.

²²Owenẹ wo ze izobo re ẹtorhẹ kẹ vwẹ vẹ izobo rẹ ọka, Me cha reyọ aye-en, izobo rẹ ufuoma ru wọ vwẹ eranvwe vẹ ivwri ze mi che fovwe ẹro no-o

²³Bi edo re ine re ovwan te oboyi; Me cha kerhọ re ẹmiẹmiẹ rẹ akpata rẹ ovwa-an.

²⁴Ẹkẹvuọvo we gbe jẹ orhiẹbrọ rẹ uyota djẹ kerẹ ọkẹre re ame, rẹ ọvwata dia kerẹ urhie rọ djẹ rara.

²⁵We ze izobo vẹ ẹkpẹvwẹ kẹ vwẹ ikpe ujuvẹ re wa dia aghwa na E uwevwi rẹ Izrẹl?

²⁶Wa cha reyọ Sakut rẹ ovie rẹ ovwan, vi Kaiwan ẹdjọ rẹ isio rẹ ovwan, ema rẹ ovwan, re wa kare kẹ oma rẹ ovwan;

²⁷fiki rẹ ọtiọye na ki mi che mu ovwan kpo imu vrẹn Damaskọs, eriyin Ọrovwohwo na tare, rẹ odẹ rọye Ọghẹnẹ rẹ otuofovwi na.