Read urhobo Emọs 7 Bible Online

Emọs 7 - urhobo bible

Emọs 7

¹Etiọna Ọrovwohwo Ọghẹnẹ vwọ nẹ vwẹ: nighere, o de se igurube koko vwẹ etuọphihọ rẹ ẹdjẹcha rẹ ẹgon; nighe, ọye ẹdjẹcha rọ kerẹ ovie vwo fro nu.

²Ọke rẹ ayen vwọ re odi rẹ otọ na nu, Me da ta, E Ọrovwohwo Ọghẹnẹ, vwo ghovwo, Me rẹ wẹ! Mavọ Jekọp se vwo mudia? Ọ havwe nọ.

³Ophu rẹ Ọrovwohwo na de fue vwẹ ọnana: Ọ sa dia etiọye-e, eriyin Ọrovwohwo na tare.

⁴Kenẹ Ọrovwohwo Ọghẹnẹ vwọ nẹ vwẹ. Nighere, Ọrovwohwo Ọghẹnẹ cha vwẹ erhanre brorhiẹ, ọ da torhẹ iyara rode na kugbe otọ na.

⁵Etiyin me da ta, E Ọrovwohwo Ọghẹnẹ da obọ ji, me rẹ wẹ! Mavọ Jekọp se vwo mudia? Ọ havwe nọ.

⁶Ophu rẹ Ọrovwohwo na de fue vwẹ ọnana: Ọnana cha sa phia-a, eriyin Ọrovwohwo Ọghẹnẹ na tare.

⁷Ọ da vwọ nẹ vwẹ nighe, Ọrovwohwo de mudia vwẹ oma rẹ igbẹhẹ na rọ nabọ vwanvwe, ovwavwọn na.

⁸Ọrovwohwo na da ta kẹ vwẹ, Emọs, die wọ mrẹre? Me da ta, Ovwavwọn. Etiyin Ọrovwohwo na da ta, Nighere, mi phi ovwavwọn phihọ ohri rẹ ihwo rẹ Izrẹl; Me gbe cha wan oma rayen vrẹ-ẹn,

⁹a cha kua asan ro kpenu rẹ Aizik fiotọ riẹriẹ, ẹshẹ re Izrẹl ejobi ke cha dia ofefe, ki mi che mu kpahe uwevwi ri Jeroboam vẹ ọlọkọ

¹⁰Etiyin Amazaya rẹ orherẹn ri Bẹtẹl de ji ohwo bru Jeroboam ovie rẹ Izrẹl nẹ, Emọs jẹ iroro ọbrabra kpahe owẹ vwẹ ohri rẹ uwevwi rẹ Izrẹl, otọ na sa gba ota rọ tare-e.

¹¹Kidie e nẹ Emọs tare, A cha vwọ ọlọkọ hwe Jeroboam, ke che mu Izrẹl kpo imu vwẹ otọ oshesheri.

¹²Amazaya da ta kẹ Emọs, E ọmraro, yanran, djẹ yanran kpo otọ ri Juda, rere wọ re emu re wo mraro vwẹ oboyi,

¹³ẹkẹvuọvo wọ gbe mraro vwẹ Bẹtẹl ọfa-a, kidie etiyin ẹshẹ rẹ ovie epha, etiyin je ọguan rẹ uvie na.

¹⁴Etiyin Emọs da kpahe kẹ Amazaya, Me dia ọmraro-o, yẹrẹ ọmọ rẹ ọmraro-o, ẹkẹvuọvo uchuru mi churẹ vẹ ohwo rọ vwẹ ẹro te irhe ri sikamọ,

¹⁵Ọrovwohwo dẹ fru vwẹ reyọ nẹ mi gbi nene igegede-e, Ọrovwohwo da ta kẹ vwẹ, yanran ra mraro kẹ ihwo mẹ Izrẹl.

¹⁶Asakiephana gbe nyo ota rẹ Ọrovwohwo na. Wọ tanẹ, Wọ gbe mrarọ kpahe Izrẹl ọfa-a wọ gbe je ta ota kpahe uwevwi rẹ Aiziki-i.

¹⁷Fiki rẹ ọtiọye na e nẹ Ọrovwohwo tare, Aye wẹn che hirhe phihọ igberadja vwẹ evun rẹ orere na, te emeshare wẹn vẹ emetẹ ka vwẹ ọlọkọ nyavwe ayen hwe. Ka vwẹ ufi ma otọ wẹn ghare, ekpuyovwi wẹn ko ghwu phihọ otọ rọ fonro-o, Izrẹl che kpo imu vwẹ isiorho.