Read urhobo Ọbe rẹ Ọmraro Ọbadaya Obadaya 1 Bible Online

Ọbe rẹ Ọmraro Ọbadaya Obadaya 1 - urhobo bible

Ọbe rẹ Ọmraro Ọbadaya Obadaya 1

¹Emramrẹ rẹ Obadaya. Enẹ Ọrovwohwo Ọghẹnẹ ta kpahe Idọm: Avwanre nyo ikun miẹ Ọrovwohwọ rhe, e ji ji ikọn ro ohri rẹ ẹgborho na: Vrẹn! e jẹn avwanre vrẹn ra kpare ofovwi bro ra!

²Nighe, mi che ru we hanvwe vwẹ ohri rẹ ẹgborho na, ka cha jẹn wẹ fia tototo.

³Eheri rẹ udu wẹn ọ phiẹn wẹ, rọ dia asan ro kpenu, rọ ta vwẹ evun rẹ udu wẹn, Ono ri si vwẹ kpotọ?

⁴Owenẹ wọ rhan kpenu kerẹ Ugo, owenẹ wọ bọn ẹho wẹn phihọ ohri rẹ isio, oboyi mi de che si we rhe otọ, eriyin Ọrovwohwo tare.

⁵Ọ da dianẹ iji bru we rhe, ọ da dianẹ i rhi ugborho uwe vwẹ ason — komavọ ayen a guọghọ owẹ te — ayen e gbi rhe cho obo re da ayen ẹro kẹ oma raye-en? Ọ da dianẹ ihwo re kọrọ otie bru we rhe, ayen rhe yan jẹ ibi efafa vwo?

⁶Obo re gborho ekuakua rẹ Isọ, ra guọnọ efe rọye mrẹ!

⁷Otu wọ vẹ ọye gba obọ ejobi phiẹn wẹ, ayen djẹ wẹ re te ughwru, igbeyan wọ vwẹ ẹrọ so rhe kpahe ufi hẹrhẹ owẹ — a rha sa riẹn otọ rọye-e.

⁸Vwẹ evun rẹ ẹdẹ yena, Ọrovwohwo tare Me rha sa ghwọrọ evwaghwanre nẹ Idọm kugbe ẹruọ nẹ Ugbenu rẹ Isọ.

⁹Ofu ko che dje egba wẹn na, E Teman, ọtiọye na kohwo kohwo ro che nẹ Ugbenu rẹ Isọ rhe ughwu ko che hwe ayen.

¹⁰Fiki rẹ ozighi wo gbe kẹ oniọvo wẹn Jekọp, omaẹvuọ ko rhurhu we opharo, ke che bru we kufia bẹdẹ.

¹¹Vwẹ ẹdẹ ru wo vwo mudia tephe, rẹ erhorha vwọ ghwẹ efe rọye kpo, re ihwo rẹ isiorho vwọ vwẹriẹ anurhoro rọye re ayen vwo duvwu itẹ fiki ri Jerusalẹm, wọ da họhọ ọvo vwẹ usun rẹ ayen.

¹²Ẹkẹvuọvo wo gbi rhe mudia vwẹ abọ gbanoma-a vwẹ ẹdẹ rẹ okpetu rẹ oniọvo wẹ-ẹn vwẹ ẹdẹ rẹ uyovwi emiovwo rọye-e, wa rha ghọghọ ihwo ri Juda vwẹ ẹdẹ ra vwọ guọghọ ayen na-a.

¹³Wa rha vwẹriẹ anurhoro rẹ ihwo mẹ-ẹ vwẹ ẹdẹ rẹ okpetu rọye na-a, wa rha vwẹ abọ gbanoma vwẹ asan rẹ ughwu de hwe na-a vwẹ ẹdẹ rẹ okpetu rọye, we rhe gborho ekuakua rọye reyọ vwẹ ẹdẹ rẹ okpetu rọye na-a.

¹⁴We rhe mudia vwẹ adaerha wọ da nyavwẹ ighuvwu rọye re dje vabọ hwe; wa da rha vwẹ ihwo rọye ri ghwu chekọ vwọ phia vwẹ ẹdẹ rẹ uvwerhe rọye.

¹⁵Kidie ẹdẹ rẹ Ọrovwohwo na si kẹre ẹgborho na ejobi re. Kirobo wo ruru, ọtiọye e ji che ru kẹ wẹ, uruemu wẹn cha rhọma she hwe uyovwi wẹn.

¹⁶Kidie kirobo wọ dare vwẹ ugbenu ọfuanfon me na, ẹgborho re riariẹ owẹ na ke cha da, ayen ke da, ki gele, ke họhọ ihwo re je dia dẹvo-o.

¹⁷Ẹkẹvuọvo vwẹ Ugbenu ri Zayọn ka cha mrẹ otu re djẹ vabọ, kọ cha dia fuanfọn, uwevwi ri Jekọp kọye che vwo eyenre rayen.

¹⁸Uwevwi ri Jekọp kọ dia kerẹ erhanre, uwevwi ri Jọsef kẹ ọgidi erhanre, uwevwi ri Isọ kẹ ehẹbe, ke ayen torhẹ ayen ka ghwọrọ ayen, ọ gbi che vwo ohwo ovuọvo ro ghwu chekọ vwẹ uwevwi rẹ Isọ-ọ. Kidie Ọrovwohwo na ye tarọ.

¹⁹Otu rẹ obo Negẹb ki che vwo Ugbenu rẹ Isọ, ihwo rẹ obo uphẹphe na ki vwo otọ ri Filistia; ayen ki che vwo otọ rẹ Ifrem kugbe otọ ri Sameria Benjamin kọ che vwo otọ ri Gilead.

²⁰Otu re mu kpo Halah re dia ihwo rẹ Izrẹl keye ri che vwo Fonisha rhiri re te Zerafat; ihwo ri Jerusalẹm re muru re obẹ Sefarad ki che vwo irere re obẹ Negẹb.

²¹Ihwo re rhọre ki che kpo obo Ugbenu ri Zayọn re sun Ugbenu rẹ Isọ; uvie na kọ cha dia ọ rẹ Ọrovwohwo.