Read urhobo Ukeri 11 Bible Online

Ukeri 11 - urhobo bible

Ukeri 11

¹Etiyin ihwo na de brenu kẹ Ọrovwohwo nyo fiki rẹ uyovwi emiovwo rayen; ọke rẹ Ọrovwohwo vwo nyo, ophu rọye da rhe tua gangan kpahe ayen erhanre rẹ Ọrovwohwo na da rhe torhẹ vwẹ uherevie rayen, ọ da torhẹ ẹbẹre ọvo rẹ obo uphẹphẹ rẹ erhọn na.

²Etiyin ihwo na de kperi se Mosis, Mosis da rẹ Ọrovwohwo, erhanre na de fu.

³Kọye e de se odẹ rẹ asan na Taberah, fikiridie erhanre rẹ Ọrovwohwo la re vwẹ uherevie rẹ ayen.

⁴Asakiephana urhuru sivwe rẹ ozighi rọ uherevie rayen da rhe gan phihọ; ihwo rẹ Izrẹl da rhoma viẹ ayen da ta, E manẹ kẹ avwanre vwo eranvwe ra re!

⁵Avwanre karophihọ iyeri rẹ avwanre rere ghevweghe vwẹ otọ rẹ Ijipt, eyaọ, mẹlọn, leek, ututa, ikpogiri;

⁶asakiephana ogangan rẹ avwanre yanmu, emu ọfa rha herọ-ọ jokpa rẹ emana nana rẹ avwanre di nẹ na.

⁷Asakiephana emana na da họhọ ubi ri korianda, etoma rọye da họhọ bdelium.

⁸Ihwo na da yanran ra tọrọ ayen koko, a da vwẹ uwuye wuye ayen vworovworo, eyẹ a da vwẹ odo duvwu ayen, e de mu ayen chere vwẹ itaso, a da vwẹ ayen kaka ikara, avwerhe rọye da họhọ ikara ra vwẹ evwri ru.

⁹Ọke re evwru de she vwẹ ason vwẹ evun rẹ erhọn na, emana na ki she nene.

¹⁰Mosis de nyo oviẹ rẹ ihwo na vwẹ evun rẹ orua rayen, dohwo dunu rẹ unurhoro rẹ utughẹ rọye. Ophu rẹ Ọrovwohwo da nabọ rhe gan kpahe ayen gangan, ivun de miovwo Mosis gangan.

¹¹Mosis da ta kẹ Ọrovwohwo, Die wo vwo ru odibo wẹn eravwọ omiomiovwi ọtiọna? Die sorọ mi vwo jẹ ẹroesiri wẹn ẹmrẹ, wo vwo mu oghwa rẹ ihwo nana ejobi nyẹ vwẹ?

¹²Mẹvwẹ ri mrevun rẹ ihwo nana? Gbenẹ mẹvwẹ ri vwiẹ ayen, ru wọ vwọ ta kẹvwẹ nẹ, Ghwa ayen phihọ agada wẹn, kirobo rẹ ọyọrọmọ mu ọmọ ro vie evie, vwo kpo otọ ru wo veri kẹ esẹ rayen na?

¹³Ki tivọ me da cha mrẹ emu re me cha vwọ kẹ ihwo nana ejobi, fikiridie ayen viẹ hwe vwe tanẹ, Kẹ avwanre eranvwe, rere avwanre re.

¹⁴Mẹvwẹ ọvo sa ghwa oghwa rẹ ihwo nana ejọbi-i oghwa na họhọ nọ kẹ vwẹ.

¹⁵Ọ da dianẹ ọtiọna kọye wo ru vwe, gbe ghwe hwe vwẹ siẹvo, ọ da dianẹ me mrẹ ẹroesiri vwẹ obọ wẹn, wo rhe ju vwe mrẹ orharhe re me epha tavwe-e.

¹⁶Etiyin Ọrovwohwo da ta kẹ Mosis, Sanẹ ekpako ujorha gbẹ ihwe rẹ ihwo rẹ Izrẹl na kẹ vwẹ, ihwo ru wọ riẹnre nẹ ekpako kugbe iruiruo vwẹ enu rẹ ayen, wọ reyọ ayen rhe asan utughẹ ra da vwa oma na, rere ayen vẹ owẹ mudia vwẹ etiyin.

¹⁷Ki mi che wotọ rhe rhi nene uwe ta ota vwẹ etiyin, ke me reyọ erhi evo rọ oma wẹ ke mi phio phihọ ayen, kẹ ayen vẹ owẹ ri gbe mu oghwa rẹ ihwo na, rere wọwẹ ọvo vwo jẹ oghwa na ẹghwa.

¹⁸Wọ me ta kẹ ihwo na, We ru oma rẹ ovwan fon kpahe odẹ, ovwan ke cha re eranvwe; fikiridie wa viẹ kẹ Ọrovwohwo nyo, tanẹ, Kono kẹ avwanre eranvwe re? Kidie obo Ijipt o de me yovwi kẹ avwanre. Fiki rẹ ọtiọye na Ọrovwohwo kọ kẹ ovwan eranvwe, ovwan ke cha re.

¹⁹Ọ dia ẹdẹ ọvuọvo eyẹ ivẹ eyẹ iyori, eyẹ ihwe-e, eyẹ uje-e;

²⁰ẹkẹvuọvo ọsoso rẹ emeranvwe, bẹsiẹ rẹ ọ cha vwọ wan inwe wẹn phia, ke kpare owẹ ohọre, fikiridie wọ sien Ọrovwohwo rọ ohri rẹ ovwan, wa da viẹ vwẹ obaro rọye, tanẹ, Die avwanre vwọ tobọ nẹ otọ rẹ Ijipt rhe vwọ?

²¹Ẹkẹvuọvo Mosis da ta, Ihwo re me hẹ uhereviẹ rẹ ayen na bute odu esan re vwẹ owọ yan; yo wọ tare nẹ, Me vwẹ eranvwe kẹ ayen, rere ayen re ọsoso rẹ emeranvwe ọvo!

²²Ke hwe igodẹ vẹ irhuẹn vwọ kẹ ayen, re o te kẹ ayen? Eyẹ ke hwe iyeri rẹ abadi na ejobi vwọ kẹ ayen, ro te kẹ ayen?

²³Ọrovwohwo da ta kẹ Mosis; Kẹ obo rẹ Ọrovwohwo krẹre? Asakiephana wọ cha mrẹ se ota mẹ uyota eyẹ ofan.

²⁴Etiyin Mosis da yanran ra ta kẹ ihwo na eta rẹ Ọrovwohwo na, ọ da reyọ eshare ujorha gbe ihwe vwẹ ohri rẹ ekpako rẹ ihwo na, ọ da vwẹ ayen tẹrẹ utughẹ na riariẹ phihọ.

²⁵Etiyin Ọrovwohwo na de wotọ nẹ evun rẹ egho na rhe ọ da ta ota kẹ, ọ da reyọ vwẹ erhi rọ herọ oma na o de phio phihọ oma rẹ ekpako ujorha gbe ihwe na, rẹ erhi na vwọ ro ayen oma nu, ayen da mraro. Ẹkẹvuọvo ayen gbi ru ọtiọye ọfa-a.

²⁶Asakiephana eshare ivẹ de chekọ vwẹ evun rẹ erhọn na, e se ọvo Eldad, ọ ro chekọ e se Medad, erhi na da ro eshare na ivẹ oma, ayen ji usun rẹ ihwo re si phihọ otọ jovwo, ẹkẹvuọvo ọ je guakẹ ayen yan nẹ asan utughẹ na-a, vwẹ ọtiọye na ayen da mraro vwẹ evun rẹ erhọn na.

²⁷Etiyin emeghene ọvo da djẹ ra vuẹ Mosis nẹ, Eldad vẹ Medad e rọ mraro vwẹ obo erhọn na.

²⁸Etiyin Joshua rẹ ọmọ ri Nun, odibo ri Mosis ohwo ọvo vwẹ usun rẹ eshare rọ jẹreyọ na da ta, Ọrovwovwe Mosis, djẹ ayen.

²⁹Ẹkẹvuọvo Mosis da ta kẹ, Wọ rioma fiki mẹ? Manẹ kẹ ihwo rẹ Ọrovwohwo na ejobi ke emraro vwo nẹ, manẹ kẹ Ọrovwohwo se phi erhi rọye phihọ oma rayen vwenẹ!

³⁰Etiyin Mosis vẹ ekpako rẹ Izrẹl na de rhivwi kpo evun rẹ erhọn na.

³¹Ọke yena odju de rhi dju nẹ obọ rẹ Ọrovwohwo rhe, ọ da ghwẹ enyavwoto nẹ obo abadi rhe, i de rhi she muotọ vwẹ oma rẹ erhọn na, ro sheri te oyan rẹ ẹdẹ ọvo vwẹ ẹbẹre nana, kugbe oyan rẹ ẹdẹ ọvo vwẹ ẹbẹre rivẹ, riariẹ erhọn na, o de vwo ọkpan ro te oma ri kubit ivẹ nẹ otọ rhe.

³²Ihwo na de vrẹn vwẹ oghẹruvo kugbe ason ọtiọye je ẹdẹ rivẹ, ayen de mu enyavwotọ na koko, ohwo rọ ghwẹ hanvwe ghwẹ eghẹghẹrẹ ihwe ayen da nabọ vwẹ ayen hwa otọ kẹ oma rayen riariẹ erhọn na wan.

³³Ọke rẹ eranvwe na je vwọ unu rayen, rọ je wiẹ-ẹn na, ophu rẹ Ọrovwohwo da rhe tua kpahe ihwo na, Ọrovwohwo da vwẹ ọtiekọ rode teyọ ayen.

³⁴Fiki rẹ ọtiọye na e de se asan na Kibrot-hatavah, fikiridie etiyin asan re shi ivwurhuru phihọ.

³⁵Nẹ Kibrot-hatavah ihwo na de mu oyan re te Hazerọt; ayen da da oma ji vwi Hazerọt.