Read urhobo Ukeri 12 Bible Online

Ukeri 12 - urhobo bible

Ukeri 12

¹Miriam vẹ Erọn de gu Mosis vwẹ obuko, fiki rẹ aye ri Kushi rọ reyọ vwọ rọvwọ.

²Etiyin ayen da ta, Kẹ oma ri Mosis ọvo Ọrovwohwo wa ta ota kẹ ihwo? ọ rha je wan oma rẹ avwanre ta ota rhe? Ọrovwohwo de nyo.

³Asakiephana ọshare na Mosis ohwo dẹndẹn, no ihwo ejobi rẹ evun rẹ akpọ na.

⁴Kpregede na Ọrovwohwo da ta kẹ Mosis vẹ Erọn kugbe Miriam, Wa yanrhe, ovwan ihwo erha na, kpo obo utughẹ ra da vwa oma na. Ayen ihwo erha na da yan phia.

⁵Ọrovwohwo de wotọ rhe vwẹ evun rẹ ukori rẹ egho, o de mudia vwẹ unurhoro rẹ utughẹ na, o de se Erọn vi Miriam; ayen ihwo ivẹ na de bro rhe.

⁶Etiyin ọ da ta, We nyo eta mẹ: ọ da dianẹ ọmraro uherevie rẹ ovwan, mẹvwẹ rẹ Ọrovwohwo ọye vwẹ oma phia kẹ vwẹ emramrẹ, mi nenire ta ota vwẹ evun rẹ evwerhẹ.

⁷Ọ dia ọtiọye ọ epha kẹ odibo mẹ Mosis na-a, mi mu uwevwi mẹ ejobi phihọ obọ rọye.

⁸Me vẹ ọye ohwo hirhe unu ku ohwo ta ota, phephẹn ọ dia eta ikokodo-o; o de rhie ẹro mrẹ oma rẹ Ọrovwohwo. Die sorọ rẹ oshọ vwo jẹ ovwan emuo rẹ ovwan vwọ ta ota kpahe odibo mẹ Mosis?

⁹Ophu rẹ Ọrovwohwo da rhe tua kpahe ayen, ọ da yan jẹ ayen vwo;

¹⁰ọke rẹ egho na rhe vwọ wran nẹ utughẹ na nu nighe, Miriam de rhi hirhe phihọ ọhọnvwoti, fuanfon kerẹ imicho. Etiyin Erọn da rhẹriẹ oma ku Miriam, nighere kẹ ọhọnvwoti.

¹¹Erọn da ta kẹ Mosis, E ọrovwovwe, wo hwe avwanre fikirobo rẹ avwanre vwo gbe ugheghẹ rẹ avwanre vwo ru imwemwu-u.

¹²Wo jọ dia kerẹ ohwo ro ghwuru-u, re uvwo rẹ oma rọye joma fuan kerẹ ohwo re vwiẹ chọra nẹ evun rẹ oni rọye rhe.

¹³Etiyin Mosis dẹ kperi se Ọrovwohwo, Sivwo, E Ọghẹnẹ, me rẹ wẹ.

¹⁴Ẹkẹvuọvo Ọrovwohwo da ta kẹ Mosis, ọ da dianẹ ọsẹ rọye dje enya kuo opharo, oma a rha vuọ ẹdẹ ighwrẹ-ẹn? Je sionẹ erhọn ẹdẹ ighwrẹn, ẹdẹ ighwrẹn na da gba nu re ki rhie ẹchẹ kẹ.

¹⁵Ọtiọye na e de si Miriam nẹ evun rẹ erhọn na ẹdẹ ighwrẹ; ihwo na rhe mu oyan bẹsiẹ ri Miriam ke rhoma ro uwevwi-i.

¹⁶Ọke rẹ enana vwọ wan nure, ihwo na ki rhi mu oyan nẹ Hazerọt, ayen de mu erhọn phihọ aton ri Paran.