Read urhobo Ukeri 13 Bible Online

Ukeri 13 - urhobo bible

Ukeri 13

¹Ọrovwohwo na da ta kẹ Mosis,

²Ji ihwo re dọrhẹ rẹ otọ ri Kenan na, re me vwọ kẹ ihwo rẹ Izrẹl na; vwẹ evun rẹ orua rẹ ọsẹ rayen ọvuọvo etiyin wo de ji ohwo ọvo, ohwo ọvuọvo rọ dia osun vwẹ uherevie rẹ ayen.

³Ọtiọye Mosis ji ayen nẹ aton ri Paran, kirobo rẹ Ọrovwohwo ji urhi kẹ ayen, ayen ejobi na da dia ihwo ri vwo uyovwi vwẹ usun rẹ ihwo rẹ Izrẹl.

⁴Enana keye edẹ rayen: Nẹ orua ri Rubẹn, Shamua rẹ ọmọ ri Zako,

⁵vwẹ orua ri Simiọn, Shaphat rẹ ọmọ ri Hori,

⁶vwẹ orua ri Juda, Kalẹb rẹ ọmọ ri Jefuneh,

⁷vwẹ orua rẹ Isaka, Igal rẹ ọmọ ri Josẹf,

⁸vwẹ orua rẹ Ifrem, Hoshea rẹ ọmọ ri Nun,

⁹vwẹ orua ri Bẹnjamin, Palti rẹ ọmọ ri Rafu;

¹⁰vwẹ orua ri Zẹbulọn, Gaddiẹl rẹ ọmọ ri Sọdi,

¹¹vwẹ orua ri Josẹf, (kọye ji orua ri Manasse), Gaddi rẹ ọmọ ri Susi;

¹²vwẹ orua ri Dan, Ammiel rẹ ọmọ ri Gemalli;

¹³vwẹ orua rẹ Asha, Setur rẹ ọmọ ri Mikẹl,

¹⁴vwẹ orua ri Naftali, Nahbi rẹ ọmọ ri Vophsi,

¹⁵vwẹ orua ri Gad; Geuẹl rẹ ọmọ ri Maki.

¹⁶Enana keye edẹ rẹ eshare ri Mosis jiri ni re dọrhẹ rẹ otọ na. Mosis de se Hoshea rẹ ọmọ ri Nun Joshua.

¹⁷Mosis de ji ayen yanran re dọrhẹ ri Kenan, ọ da ta kẹ ayen, yanran kpo obi Nẹgẹb, re wa yanran kpo obo orere rẹ ugbenu na,

¹⁸re wa mrẹ obo rẹ otọ na epha, se ihwo re dia otọ na, egba eyẹ evwiẹrẹ, ibuebu eyẹ ehahanvwe.

¹⁹Sẹ otọ na rẹ ihwo na dia na, oyoyovwi eyẹ omiomiovwi, sẹ irere rayen dia na eme erhọn eyẹ a gba ogba riariẹ ayen,

²⁰sẹ otọ na rayen dia na yovwẹ emu eyẹ oyovwẹ-ẹ, sẹ irhe herọ eyẹ e herọ-ọ. We yivwaro, wa ghwa emamọ rẹ otọ na ẹvo rhe. Ọke yena da dia ọke rẹ ibi rẹ irhe re ẹsosuọ vwọ vwara.

²¹Etiyin ayen da yanran re ni otọ na, nẹ aton ri Zin re te Rehob, rọ kẹrẹ ughere ri Hamath.

²²Etiyin ayen de kpo obi Nẹgẹb, ayen de ri te Hebrọn; Abiman, Sheshai kugbe Taimai, emọ ri Anak he asan na. (A bọn Hebrọn ẹgbukpe ighwrẹn tavwe a ke bọn? Zoan vwẹ Ijipt.)

²³Ayen de rhi te iyara rẹ Eshkọl, etiyin ayen da nyavwe erhẹghẹ ri otie, ayen de duvwu urhe phihọ ihwo ivẹ da viọn ayen; ayen je ghwa pomegranates, kugbe urhe rẹ owe rhe.

²⁴Asan yena e de se nẹ Iyara rẹ Eskol, fiki rẹ erheghe rẹ ihwo rẹ Izrẹl nyavwe nẹ etiyin rhe.

²⁵Vwẹ oba rẹ ẹdẹ ujuvẹ ayen de rhivwi nẹ orhẹdẹ re otọ na rhe.

²⁶Ayen de bru Mosis vẹ Erọn rhe kugbe ukoko rẹ ihwo rẹ Izrẹl vwẹ evun rẹ aton ri Paran, vwi Kadesh; ayen da rhe nẹ iyẹnrẹn kẹ ayen kugbe ukoko na ejobi, ayen da vwẹ emamọ rẹ otọ na vwọ nẹ ayen.

²⁷Ayen da ta kẹ, Avwanre te otọ ru wo ji avwanre ra na. Otọ na djẹ ọkẹre vẹ ameivie kugbe ọnyọn, ọnana kẹ emamọ rẹ otọ na.

²⁸Ẹkẹvuọvo ihwo re dia evun rẹ otọ na egba, irere na a gba ogba phihọ ayen e ke je rho; ọfa avwanre je mrẹ uvwiẹ rẹ Anak vwẹ etiyin.

²⁹Ihwo rẹ Amalẹk dia evun rẹ otọ ri Nẹgẹb na; ihwo ri Hẹt, Jebu kugbe Amor dia evun rẹ irere rẹ ugbenu na, ihwo ri Kenan dia kẹrẹ oma rẹ abadi kugbe oma rẹ urhie ri Jọdan.

³⁰Ẹkẹvuọvo Kaleb de gbe ota phihọ ihwo na unu vwẹ irharo ri Mosis, ọ da ta, Jẹn avwanre vrẹn siẹvuọvo, rere a ra reyọ otọ na, fikiridie avwanre se phio kparobọ.

³¹Etiyin ihwo re vẹ ọye gba yanran na da ta, Avwanre che se nene ihwo na họnre-e; kidie ayen ga nọ avwanre.

³²Etiyin ayen da vwẹ iyẹnrẹn omiomiovwi rẹ otọ rẹ ayen dọrhẹ rọye na vwọ rhe ihwo rẹ Izrẹl tanẹ, otọ na, rẹ avwanre rẹ dọrhẹ rọye na, ọye otọ ro hwe ihwo, ihwo rẹ avwanre mrẹre vwẹ otọ na, ihwo rhuarho gogorogo.

³³Etiyin avwanre da mrẹ Nẹfilim (emọ rẹ Anak, ri nẹ Nẹfilim rhe), avwanre ke họhọ ebaka kẹ ayen, kẹ etiọye ayen ni avwanre phihọ.