Read urhobo Ukeri 14 Bible Online

Ukeri 14 - urhobo bible

Ukeri 14

¹Etiyin ukoko na ejobi de kperi gangan; ihwo na da viẹ vwẹ ason yena.

²Ihwo rẹ Izrẹl na ejobi de gu Mosis kugbe Erọn; ukoko rẹ ihwo na ejobi da ta kẹ ayen, Manẹ avwanre ghwe ghwu vwẹ otọ rẹ Ijipt. Eyẹ manẹ avwanre ghwu vwẹ evun rẹ aton nana!

³Die sorọ rẹ Ọrovwohwo vwọ reyọ avwanre vwọ rhe otọ nana, rere a vwẹ ọlọkọ hwe avwanre? Eya rẹ avwanre vẹ imitete rẹ avwanre che ghwu kufia; o gbi rhe yovwi re avwanre rhoma rhivwi kpo obi Ijipt?

⁴Ayen ohwohwo da ta kẹ ohwo, E jẹn avwanre vwẹ olori ọfa vwo mu, rere e rhivwi kpo Ijipt.

⁵Etiyin Mosis vẹ Erọn de she bọvwẹ opharo rhuotọ vwẹ obaro rẹ ọghwẹgbe rẹ ihwo rẹ Izrẹl na ejobi.

⁶Etiyin Joshua rẹ ọmọ ri Nun vi Kalẹb rẹ ọmọ ri Jefunneh, rẹ ẹvo vwẹ usun rẹ ihwo ri re dọrhẹ rẹ otọ na, da bẹrẹ emwa rayen.

⁷Ayen da ta kẹ ukoko rẹ ihwo rẹ Izrẹl na ejobi nẹ, otọ rẹ avwanre re dọrhẹ rọye omamọ rẹ otọ oyoyovwi.

⁸Ọ da dianẹ oma rẹ avwanre vwerhe Ọrovwohwo, ọ sa reyọ avwanre rhe otọ na rọ da vwọ kẹ avwanre, otọ rọ djẹ ọkẹre rẹ ameivie kugbe ọnyọn.

⁹Emuọvo na, wa vwọ suọ Ọrovwohwo-o; wa je djẹ oshọ rẹ ihwo rẹ evun rẹ otọ na-a, fikiridie ayen ikara vwọ kẹ avwanre ukẹcha vuọvo rhe ayeen; yẹ Ọrovwohwo vẹ avwanre herọ, we jẹ oshọ rayen mu ovwa-an.

¹⁰Ẹkẹvuọvo ukoko na ejobi ke tanẹ e phi ayen hwe. Etiyin urinrin rẹ Ọrovwohwo da vwẹ oma phia vwẹ asan utughẹ ra da vwa oma na vwọ kẹ ihwo rẹ Izrẹl na ejobi.

¹¹Ọrovwohwo da ta kẹ Mosis, Mavọ ihwo nana jẹ vwẹ fia krite? Mavọ o kri te rẹ ayen vwo je esegbuyota evwo vwẹ egbudugbu rẹ eka na ejobi re me vwọ phia kẹ ayen na?

¹²Me cha vwẹ emiavwe mu ayen ki mi si uku mẹ nẹ ayen unu, ke me cha vwẹ ẹgborho rọ rhoro rọ gan oma nọ ayen nẹ oma wẹn rhe.

¹³Ẹkẹvuọvo Mosis da ta kẹ Ọrovwohwo, Etiyin ihwo rẹ Ijipt ki che nyo ọnana, kidie wẹ re vwẹ ẹgba wẹn vwọ reyọ ihwo nana nẹ otọ rẹ Ijipt rhe.

¹⁴Ayen ke cha ta kẹ ihwo rẹ otọ nana. Ayen nyori, E Ọrovwohwo, nẹ wọ uherevie rẹ ihwo nana: kidie wẹ, E Ọrovwohwo, a vẹ owẹ ohwohwo rhie ẹro mrẹ ohwo, egho wẹn de mudia vwẹ enu rẹ ayen, wọ da ka obaro kẹ ayen, vwẹ ukori rẹ egho vwẹ uvo kugbe ukori rẹ erhanre vwẹ ason.

¹⁵Asakiephana wo de hwe ihwo nana kerẹ ohwo ọvo, etiyin ẹgborho ri nyo usi wẹn jovwo ke cha ta,

¹⁶Fikiridie Ọrovwohwo sa reyọ ihwo nana te otọ ro ve phihọ nẹ ọye vwọ kẹ ayen na-a, fiki rẹ ọtiọye na ọ vwọ teyọ ayen hwe vwẹ evun rẹ aton na.

¹⁷Asakiephana, me rẹ wẹ, jẹn ogangan rẹ Ọrovwohwo rho kirobo ru wo veri, nẹ,

¹⁸Ọrovwohwo fobọ mu ophu-u, ọ vọnre vẹ ẹguọnọ ro jẹrhẹriẹ, ọ vwẹ orukuruku kugbe ogbeku vwo ghovwo ẹkẹvuọvo o vwo obo ro ru wa-a o brorhiẹ hwe o ro re abe, ọ vwẹ orukuruku rẹ esemọ vwo nene emọ, re te uvwiẹ re erha ra ro ọrẹnẹ.

¹⁹Vwẹ orukuruku rẹ ihwo nana vwo ghovwo ayen, me rẹ wẹ, kirobo rẹ ẹguọnọ ro jẹrhẹriẹ wẹn rode na rho te, kirobo wo vwo ghovwo ihwo nana, nẹ otọ rẹ Ijipt rhe rhi te ọke nana.

²⁰Etiyin Ọrovwohwo da ta, Mi vwo ghovwo ayen, kirobo rẹ ota wẹn epha;

²¹ẹkẹvuọvo vwẹ ọ rẹ uyota, kirobo re me herọ na, kirobo rẹ akpọ na ejobi cha vọn vẹ urinrin rẹ Ọrovwohwo na,

²²ohwo ọvuọvo vwẹ usun rẹ ihwo re mrẹ urinrin mẹ kugbe eka mẹ ri mi ruru vwẹ Ijipt kugbe evun rẹ aton na, re ke davwẹ ovwẹ ni ikpe ihwe soso re gbe kerhọ rẹ urhuru mẹ-ẹ,

²³gbe cha mrẹ otọ na ri mi ve kẹ esẹ rayen na-a, yẹ ọvuọvo vwẹ usun rẹ ihwo re jẹ vwẹ fia na cha sa mrẹ-ẹ.

²⁴Ẹkẹvuọvo odibo mẹ Kalẹb, fikiridie o vwo erhi san, ọ da nabọ nene uvwe, ki mi che vwo te otọ rọ teri jovwo na, uvwiẹ rọye ki che vwo otọ na.

²⁵Asakiephana rẹ ihwo rẹ Amalẹk vẹ ihwo ri Kenan je vwọ dia evun rẹ iyara na, odẹ rọ cha na gba rhoma kpo obo aghwa ra wan idjerhe rẹ Abadi ọvwavware na.

²⁶Ọrovwohwo da ta kẹ Mosis vẹ Erọn,

²⁷Mavọ okrite rẹ ọghwẹgbe umwemwu nana brenu kpahe ovwẹ te? Mi nyo enuebro rẹ ihwo rẹ Izrẹl re ayen brẹ kpahe ovwẹ.

²⁸Ta kẹ ayen, Kirobo re me herọ na, ọtiọye Ọrovwohwo tare, obo ro wọ tare, ri mi nyori na, ọye mi che ru kẹ wẹ:

²⁹irivwi rẹ ovwan e che shi ayen phihọ evun rẹ aton nana; vwẹ uchunu rẹ ovwan, re keri nẹ ikpe uje kpenu, ri brenu hwe vwe na,

³⁰kaka ohwo ọvuọvo rọye che se te otọ ri mi ve phihọ kẹ ovwan nẹ ovwan dia na-a, jokpa ri Kalẹb ọmọ ri Jefunneh kugbe Joshua rẹ ọmọ ri Nun.

³¹Ẹkẹvuọvo imitete rẹ ovwan, rẹ ovwan tare nẹ e che hwere na, kẹ eye me cha vwọ rhe otọ na, kẹ ayen re cha riẹn otọ na rẹ ovwan jẹfia na.

³²Ẹkẹvuọvo vwọ kẹ ovwan ugboma rẹ ovwan aton na e shi ayen phihọ.

³³Emọ rẹ ovwan ke cha dia isuigodẹ vwẹ evun rẹ aton nana vwẹ ẹgbukpe ujuvẹ, ke cha rioja fiki ri je segbuyota evwo rayen, bẹsiẹ rẹ irivwi rẹ ovwan che vwo gbo phihọ evun rẹ aton na:

³⁴kirobo rẹ uchẹdẹ rẹ ovwan dorhẹ rẹ otọ na krite, ẹdẹ ujuvẹ na, ẹdẹ ọvo ẹgbukpe ọvo, kọye ovwan ghwa oghwa rẹ orukuruku rẹ ovwan, ikpe ujuvẹ, ku wọ riẹn obo rẹ ivuemiovwo mẹ epha.

³⁵Mẹvwẹ Ọrovwohwo na, me ta nure, uyota ọnana mi che ruẹ kẹ ukoko umwemwu na re ghwẹ koko vwọ so vwẹ na: vwẹ evun rẹ aton nana ayen da cha mrẹ oba rẹ akpọ rayen, etiyin ayen de che ghwu.

³⁶Eshare ri Mosis jiri re dọrhẹ rẹ otọ na, ri rhivwi rhe re da nẹrhẹ ukoko na ejobi brenu fiki rẹ iyẹnrẹn omiomiovwi rẹ ayen nẹ kpahe otọ na,

³⁷eshare re ghwa iyẹnrẹn omiomiovwi rẹ otọ na rhe na. Ọtiekọ de hwe ayen vwẹ obaro rẹ Ọrovwohwo na.

³⁸Ẹkẹvuọvo Joshua rẹ ọmọ ri Nun vi Kalẹb rẹ ọmọ ri Jefunneh keye re rhọre, vwẹ usun rẹ ihwo ri re dọrhẹ rẹ otọ na.

³⁹Etiyin Mosis da ta eta nana vwọ kẹ ihwo rẹ Izrẹl, ihwo na de mu oma phihọ gangan.

⁴⁰Ayen de vrẹn vwẹ irhiọke ride, ayen de kpo obo orere rọ hẹ ugbenu na, tanẹ, Nighe avwanre etinẹ, avwanre ki che kpo asan rẹ Ọrovwohwo veri vwọ kẹ avwanre, fikiridie avwanre ru imwemwu.

⁴¹Ẹkẹvuọvọ Mosis da ta, Die ovwan vwọ chọ urhi rẹ Ọrovwohwo na, fikiridie, ọnana cha sa kẹ wẹn obọ ẹkparọ-ọ?

⁴²We kpo obo ugbenu na-a a da rhe teyọ ovwan ejobi she teyọ otọ vwẹ obaro rẹ ivwighrẹ rẹ ovwan, fikiridie Ọrovwohwo na hẹ uherevie rẹ ovwa-an.

⁴³Kidie ihwo rẹ Amalẹk vẹ ihwo ri Kenan hẹ oboyi hẹrhẹ ovwan, kẹ ayen vwẹ ọlọkọ gere ovwan she, fikiridie we chuko ku Ọrovwohwo na, Ọrovwohwo vẹ ovwan rha herọ-ọ.

⁴⁴Ẹkẹvuọvo ayen de phurie yanran kpo obo orere rọ hẹ obo ugbenu na, dede na ekpeti rẹ ọphọ rẹ Ọrovwohwo na, eyẹ Mosis vrẹn nẹ evun rẹ erhọn na-a.

⁴⁵Etiyin te ihwo rẹ Amalẹk kugbe ihwo ri Kenan na re dia orere rẹ ugbenu yena de wotọ rhe, ayen de phi ayen kua ayen da vwọ tua ayen, rhiri re te Họrmah.