Read urhobo Ukeri 15 Bible Online

Ukeri 15 - urhobo bible

Ukeri 15

¹Ọrovwohwo da ta kẹ Mosis,

²Ta kẹ ihwo rẹ Izrẹl, ọke ru we de te otọ ru wa cha dia na, re me vwọ kẹ ovwan na,

³rẹ ovwan de ze izobo kẹ Ọrovwohwo nẹ usun rẹ uchuru rẹ ovwan eyẹ nẹ igegede rẹ ovwan, izobo rẹ erhanre eyẹ izobo re ẹtorhẹ eyẹ izobo ghevweghe, ra vwọ hwa osa rẹ ivẹ eyẹ izobo ro nẹ evun rhe eyẹ ọke rẹ orẹ, ro vwo gbo ọnrhẹn ororo kẹ Ọrovwohwo na,

⁴etiyin ohwo rọ vwẹ izobo rhe Ọrovwohwo na me dia izobo rẹ ọka ẹkẹn ehwe rẹ ephah rẹ omamọ rẹ eyagha rẹ ọka, ra vwẹ ẹkẹn ẹne rẹ ukoko rẹ evwri vwọ gua kugbe,

⁵wain re vwo ze izobo rẹ udi, ke rha ẹkẹn ẹne rẹ ukoko, kọye wọ rhuẹrẹ kugbe izobo rẹ ẹtorhẹ na, ovo omogodẹ ovuovo vwo kẹ izobo na.

⁶Ọ rẹ egbo, wọ me rhuẹrẹ vwọ kẹ izobo rẹ ọka ẹkẹn ivẹ rẹ ihwe rẹ ephah rẹ omamọ rẹ eyagha rẹ ọka ra vwẹ ẹkẹn erha rẹ ukoko rẹ evwri gua kugbe;

⁷vwọ kẹ izobo rẹ udi ku wo ze ẹkẹn erha rẹ ukoko ri wain, rẹ ọ dia izobo ro gbo ọnrhe ororo kẹ Ọrovwohwo na.

⁸Ọke ru wọ da rhuẹrẹ erhuẹn ọshare kẹ izobo rẹ ẹtorhẹ, eyẹ kẹ izobo ghevweghe rere a vwọ hwa osa rẹ ivẹ, eyẹ vwọ kẹ izobo rẹ ufuoma vwọ kẹ Ọrovwohwo,

⁹etiyin o mi ze kugbe erhuẹn ọshare na izobo rẹ ọka rẹ ẹkẹn erha rẹ ẹkẹn ihwe rẹ ephah rẹ omamọ rẹ eyagha rẹ ọka, ra vwẹ ubro rẹ ukoko rẹ evwri vwọ gua kugbe;

¹⁰ku wo ze izobo rẹ udi ubro rẹ ukoko ri wain, rọ dia izobo rẹ erhanre, ro gbo ọnrhe ororo kẹ Ọrovwohwo.

¹¹Ọtiọna kọye we ru erhuẹn ọvuọvo eyẹ, egbo eyẹ vwọ kẹ omogodẹ ọvuọvo eyẹ ẹmẹvwe ọvuọvo.

¹²Uchunu ru wọ nabọ rhuẹrẹ kpahe, ọtiọye wo ji ru kẹ ọvuọvo kirobo rẹ ayen bute.

¹³Ihwo re dia emotọ ejobi ki ru ọnana vwẹ idjerhe ọtiọna, ra da vwẹ erhanre ze izobo ro gbo ọnrhẹn ororo kẹ Ọrovwohwo na.

¹⁴Ọ da dianẹ ọrhorha hẹ uherevie rẹ ovwan eyẹ kohwo kohwo vwẹ ohri rẹ ovwan vwẹ evun rẹ uvwiẹ na ejobi, ze izobo rẹ erhanre, ro gbo ọnrhẹn ororo kẹ Ọrovwohwo na, ko ru kirobo wo ruru na.

¹⁵Vwe evun re ọghwẹgbe na, iji ọvuọvo re cha dia vwọ kẹ ovwan kugbe ọrhorha rọ vẹ ovwan gba dia, kọ dia iji ri bẹdẹ vwẹ evun rẹ uvwiẹ na ejobi, kirobo rẹ ovwan epha, ọtiọye ọrhorha je epha vwẹ obaro rẹ Ọrovwohwo na.

¹⁶Urhi ọvuọvo kugbe iji ọvuọvo re cha dia kẹ ovwan kugbe ọrhorha ro bru ovwan rhe.

¹⁷Ọrovwohwo da ta kẹ Mosis,

¹⁸Ta kẹ ihwo rẹ Izrẹl, ọke wo de te otọ re me reyọ owẹ rhe na,

¹⁹Ọke wọ da re emu rẹ otọ na, wo mi ze izobo kẹ Ọrovwohwo.

²⁰Vwẹ emu rẹ ẹsosuọ ro wọ to re, ku wọ vwẹ ikara vwo ze izobo; kerẹ izobo ro nẹ uwevwi re ewuye rhe, kẹ etiọye wo ze izobo na.

²¹Emu rẹ ẹsosuọ ro wọ to re na ku wọ vwọ kẹ Ọrovwohwo kerẹ izobo vwẹ uvwiẹ wẹn ejobi.

²²Ẹkẹvuọvo wo de ru chọ , ru wọ gbe rha yọnrọn irhi na rẹ Ọrovwohwo vwọ kẹ Mosis na-a;

²³irhi na ejobi rẹ Ọrovwohwo wan obọ ri Mosis ji kẹ ovwan na, nẹ ẹdẹ rẹ Ọrovwohwo vwo ji urhi na, yanran rhiri nẹ uvwiẹ ra ro uvwiẹ,

²⁴ọ da dianẹ wa vwẹ ugheghẹ ruo rẹ ukoko na rha riẹ-ẹn, ukoko na ejobi ke vwẹ upene rẹ erhuẹn ọshare vwo ze izobo rẹ ẹtorhẹ, ro gbo ọnrhẹn ororo kẹ Ọrovwohwo, kugbe izobo rẹ ọka kugbe izobo rẹ udi, kirobo rẹ urhi na epha, kugbe ẹmẹkpro ọvo re vwo ze izobo rẹ umwemwu.

²⁵Orherẹn na kọ gọ ẹgua nẹ ukoko rẹ ihwo rẹ Izrẹl na ejobi, ko vwo ghovwo ayen; fikiridie ọ chọ ayen obọ, kẹ ayen reyọ izobo rẹ ayen rhe, izobo rẹ ẹtorhẹ kẹ Ọrovwohwo, kugbe izobo rẹ umwemwu vwẹ obaro rẹ Ọrovwohwo na, fiki rẹ oruchọ rayen.

²⁶Etiyin ukoko rẹ ihwo rẹ Izrẹl ejobi ke vwo ghovwo ayen, kugbe ọrhorha rọ hẹ uherevie rayen, fikiridie ihwo na ejobi tototo vwo obọ vwẹ oruchọ na.

²⁷Ọ da dianẹ ohwo ọvo vwẹ ugheghẹ ru umwemwu, kọ vwẹ ẹvwe aye rẹ ukpe ọvo vwo ze izobo rẹ umwemwu.

²⁸Orherẹn na ko mudia gọ ẹgua na vwẹ obaro rẹ Ọrovwohwo fiki rẹ ohwo na ro ru oruchọ na, ọke rọ da vwẹ ughẹghẹ vwo ru umwemwu, ka gọ ẹgua nu kẹ, ke vwo ghovwo.

²⁹Ku we vwo urhi ọvo kẹ ohwo rọ vwẹ ughẹghẹ vwo ru umwemwu, vwọ kẹ ohwo rọ dia ọmotọ vwẹ uherevie rẹ ihwo rẹ Izrẹl na eyẹ ọrhorha rọ kua bru ayen rhe.

³⁰Ẹkẹvuọvo ohwo rọ vwẹ ẹro koko vwo ru umwemwu, ọ da dia ọmotọ eyẹ ọrhorha, yo yivwaro kpahe Ọrovwohwo, ke si ohwo yena nẹ uherevie rẹ ihwo rọye.

³¹Fikiridie ọ jẹ ota rẹ Ọrovwohwo fia, o miovwo urhi rẹ Ọrovwohwo, ke si ohwo yena nẹ oma tototo, orukuruku rọye kọ dia enu rẹ uyovwi rọye.

³²Ọke rẹ ihwọ rẹ Izrẹl vwọ evun rẹ aton, ayen da mrẹ ihwo ri du irhe vwẹ edidjala.

³³Ihwo re mrẹrẹ ro vwo du irhe na, de muo rhe Mosis vẹ Erọn, kugbe ukoko rẹ ihwo na ejobi.

³⁴Ayen de muo phihọ evun rẹ uwodi, fikiridie ayen je riẹn obo rẹ ayen che ruo-o.

³⁵Ọrovwohwo da ta kẹ Mosis, Ohwo na ke hwe ghwu; ukoko rẹ ihwo na ejobi ke reyọ nẹ evun rẹ erhọn na ka vwẹ elanọ phio hwe.

³⁶Ihwo rẹ ukoko na ejobi da reyọ nẹ evun rẹ erhọn na, ayen da vwẹ elanọ vwo phio hwe, kirobo rẹ Ọrovwohwo jẹ urhi kẹ Mosis.

³⁷Ọrovwohwo na da ta kẹ Mosis,

³⁸Ta kẹ ihwo rẹ Izrẹl, nẹ ayen churu ejọjọ phihọ abọ rẹ iwun rayen vwẹ asan re uvwie rayen ejobi teri, rere ayen rhe churu oruro rẹ ogiọgiọ mu esiri rẹ ejọjọ na;

³⁹ejọjọ na kọye wọ cha vwọ karophihọ irhi rẹ Ọrovwohwo na ejobi, rere we ru ayen, wo rhe nene udu rẹ obọ wẹ-ẹn kugbe ẹro rẹ obọ wẹ-ẹn, rẹ urhuru ghevweghe che si we re nene.

⁴⁰Ọtiọye na gba karophihọ rere we ru irhi mẹ na ejobi, re wọ dia fuanfon kẹ Ọghẹnẹ wẹn.

⁴¹Mẹvwẹ Ọrovwohwo Ọghẹnẹ rẹ ovwan rọ reyọ ovwan nẹ otọ rẹ Ijipt rhe, ro dia Ọghẹnẹ rẹ ovwan: Mẹvwẹ Ọrovwohwo rẹ Ọghẹnẹ wẹn.