Read urhobo Ukeri 18 Bible Online

Ukeri 18 - urhobo bible

Ukeri 18

¹Ọtiọye Ọrovwohwo ta kẹ Erọn, Wẹ vẹ emọ wẹn kugbe uwevwi rẹ ọsẹ wẹn vẹ owẹ re cha ghwa oghwa rẹ orukuruku vwẹ oma rẹ ẹshẹ na; te owẹ vẹ emeshare wẹn kugbe uwevwi rẹ ọsẹ vẹ owẹ re cha ghwa oghwa rẹ orukuruku vwẹ oma rẹ iruo rẹ orherẹn na.

²Wọ me je reyọ imoni wẹn vwọ ba oma rhe, orua ri Livae, orua rẹ ọsẹ wẹn rere ayen vwẹ oma ba wẹ, re gbe odibo kẹ wẹ vwẹ ọke re owẹ vẹ emeshare wẹn kugbe uwe da obaro rẹ utughẹ rẹ iseri na.

³Ayen cha vwẹ ẹro te we rere ayen ji ru iruo rẹ utughẹ na; ẹkẹvuọvo ayen che bi kẹrẹ ekuakua rẹ ẹshẹ na-a eyẹ asan agbada na-a, ọ da dia ọtiọye, te ayen te owẹ ki ghwu.

⁴Ayen ki ku oma kugbe uwe, kẹ ayen vwẹ ẹro te utughẹ ra da vwa oma na, fiki rẹ iruo rẹ utughẹ na; ohwo ọfa gbi se si kẹrẹ owẹ-ẹ.

⁵Ku wọ vwẹ ẹro te iruo rẹ ẹshẹ na ejobi kugbe iruo rẹ agbada na, rere ophu ọfa vwo jẹ enu re ihwo rẹ Izrẹl na ẹdia.

⁶Nighere, me reyọ imoni wẹn ihwo ri Livae na nẹ ohri rẹ ihwo rẹ Izrẹl; ayen ẹse vwọ kẹ ovwan, ra vwọ kẹ Ọrovwohwo, rẹ ayen vwo ru iruo rẹ utughẹ ra da vwa oma.

⁷Te owẹ te ẹmo wẹn vẹ owẹ ki gbe ru iruo rẹ orherẹn na vwọ kpahe iruo rẹ agbada na ejobi kugbe obo re evun rẹ asan ra vwẹ amwa tan na, ku wọ cha ga ẹga. Me vwẹ iruo rẹ orherẹn na ru ẹse kẹ wẹ, ohwo ọfa ro rhi si kẹrẹ owẹ ejobi ka teyọ hwe.

⁸Etiyin Ọrovwohwo da ta kẹ Erọn, Gbe nighere, mi vwi kemu kemu ejobi ro chekọ vwẹ izobo re ze kẹ vwẹ na vwọ kẹ wẹ emu ọfuanfon rẹ ihwo rẹ Izrẹl ejobi. Me vwẹ ayen kẹ wẹ re dia ẹkẹn wẹ; kọ je dia ughwẹ ri bẹdẹ vwọ kẹ emọ wẹn.

⁹Ọnana kọ dia ọwẹn emu rọ ma fon na, ri chekọ rẹ erhanre je te; kizobo kizobo rayen zeri, kizobo kizobo rẹ ọka rayen, eyẹ izobo rẹ umwemwu rayen kugbe izobo rẹ abe rayen, rẹ ayen ze kẹ vwẹ kọ dia ọ rọ ma fon kẹ wẹ vẹ emọ wẹn.

¹⁰Asan rọ ma fon ejobi etiyin wọ da riọ; kọshare kọshare ejobi sa riọ; ọfuanfon vwọ kẹ wẹ.

¹¹Ọnana je ọwẹn rhe, izobo rẹ ẹse rayen, kugbe izobo rẹ ekpegho rẹ ihwo rẹ Izrẹl; me vwẹ ayen ejobi kẹ wẹ, je vwọ kẹ emeshare wẹn kugbe emetẹ wẹn vẹ owẹ, kọ dia ẹkẹn ute wẹn bẹdẹ; kohwo kohwo rọ fonro vwẹ evun rẹ uwevwi wẹn kọ sa riọ.

¹²Evwri ro me yovwi ejobi, vẹ udi ro me yovwi kugbe eka, emamọ rẹ ẹsosuọ rayen vwọ kẹ Ọrovwohwo, me vwẹ ayen kẹ wẹ.

¹³Emamọ rẹ ẹsosuọ re ka vware vwẹ otọ rayen, rẹ ayen vwọ rhe Ọrovwohwo na, kọ dia ọwẹn, kohwo kohwo rọ fọnro vwẹ evun rẹ uwevwi wẹn kọ sa rio.

¹⁴Kemu kemu ejobi re vwo ve vwẹ Izrẹl na kọ dia ọwẹn.

¹⁵Kemu kemu ejobi ro rhie urhoro, owenẹ ohwo yerẹ eranvwe re vwo ze izobo kẹ Ọrovwohwo, ejobi ke dia ewẹn; ẹkẹvuọvo, ọmọkpako rẹ ohwo kọye wọ tan hirhe, kugbe ọmọ rẹ ẹsosuọ rẹ eranvwe ro jẹfuọn wọ tan hirhe.

¹⁶Unu rẹ etan hirhe rayen (o de te emeranvwe nu ku wọ tan ayen) unu rẹ etan rọye shekẹl iyori rẹ idọnọ efuanfon, kirobo ri shekẹl rẹ ẹshẹ na epha, rọ dia gera uje.

¹⁷Ẹkẹvuọvo ọmọ rẹ ẹsosuọ rẹ erhuẹn yerẹ ogegede yerẹ ẹvwe, wọ tan eyena-a eyena fonro. Wọ me fẹrẹ ọbara rayen ku agbada na, ku wọ torhẹ ivwiri rayen kerẹ izobo ra vwẹ erhanre torhẹ re gbo ọnrhẹn ororo kẹ Ọrovwohwo.

¹⁸Ẹkẹvuọvo uvwo rayen kọ dia ọwẹn, kirobo rẹ udu rọye re kpoghori na kugbe ekpoghowọ rẹ obọrhe dia ọwẹn na.

¹⁹Izobo ọfuanfon ejobi rẹ ihwo rẹ Izrẹl ze kẹ Ọrovwohwo na, me vwẹ ayen kẹ wẹ, kugbe emọ rẹ emeshare kugbe e rẹ emetẹ rẹ vẹ owẹ gba herọ, kọ dia ẹkẹn wẹn bẹdẹ; ọnana ọphọ rẹ ughweraka bẹdẹ vwẹ obaro rẹ Ọrovwohwo vwọ kẹ wẹ vẹ uvwiẹ rọ vẹ owẹ gba herọ.

²⁰Ọrovwohwo da ta kẹ Erọn, Wo che vwo uku vwẹ otọ raye-en, eyẹ wo ji vwo ẹkẹn vwẹ uherevie raye-en, mẹvwẹ ẹkẹn kugbe uku wẹn vwẹ uherevie rẹ ihwo rẹ Izrẹl na.

²¹Vwọ kẹ ihwo ri Livae, me vwẹ ẹkẹn ihwe rẹ Izrẹl na ejobi vwọ ke ayen, vwọ riuku, kọye re dia osa rẹ iruo rayen ruẹ, iruo rayen vwẹ utughẹ ra da vwa oma na.

²²Kẹ etinẹ yanran, ihwo rẹ Izrẹl gbi che si kẹrẹ utughẹ ra da vwa oma na-a, ọ da dia ọtiọye kẹ ayen ghwa umwemwu kẹ ayen ghwu.

²³Ẹkẹvuọvo ihwo ri Livae keye ri ru iruo rẹ utughẹ ra da vwa oma na, kẹ ayen ghwa orukuruku rayen; kọ dia urhi ri bẹdẹ vwẹ evun rẹ uvwiẹ rayen ejobi; vwẹ ohri rẹ ihwo rẹ Izrẹl na ayen gbi che vwo ẹkẹn uku rohọ raye-en.

²⁴Fikiridie ẹkẹn ihwe rẹ ihwo rẹ Izrẹl, rayen vwo ze izobo kẹ Ọrovwohwo na, me vwẹ ayen kẹ ihwo ri Livae, rọ dia ẹkẹn uku rayen; fiki rẹ ọtiọye na me vwo ta kẹ ayen nẹ ayen gbi vwo uku vwẹ ohri rẹ ihwo rẹ Izrẹl na-a.

²⁵Ọrovwohwo na da ta kẹ Mosis,

²⁶ọ rọ marho ku wọ ta kẹ ihwo ri Livae, ọke ru wọ da reyọ ẹkẹn ehwe na mie ihwo rẹ Izrẹl na, ẹkẹn re me vwọ kẹ ovwan na nẹ wa vwọ riuku na ku we ji sino vwo ze izobo kẹ Ọrovwohwo na, ẹkẹn ihwe vwẹ evun rẹ ẹkẹn ihwe wẹn.

²⁷Ke che roro izobo wẹn kẹ wẹ kẹrẹsiẹ ra mrẹ ọka vwẹ utuwevwi rẹ ewuye, kerẹ ọvọnvọn rẹ asan ra da nyẹ wain.

²⁸Ọtiọye rhe wo ji ze izobo kẹ Ọrovwohwo vwẹ evun rẹ ẹkẹn ihwe wẹn ejobi, ru wọ mrẹre vwẹ obọ rẹ ihwo rẹ Izrẹl; vwẹ evun rẹ etiyin na ku wọ vwẹ izobo rẹ Ọrovwohwo kẹ Erọn rẹ orherẹn na.

²⁹Vwẹ evun rẹ izobo ra vwọ kẹ wẹ ejobi, kẹ etiyin wo de ze ute rẹ izobo rẹ Ọrovwohwo kẹ, ọ ro me yovwi vwẹ ayen ejobi, ẹbẹre ro me vwo ọghọ ejobi wọ vwọ kẹ ayen.

³⁰Fiki rẹ ọtiọye na ku wọ ta kẹ ayen, ọke wọ da vwẹ omamọ rọye vwo ze kẹ nu, iri chekọ ke kere vwọ kẹ ihwo ri Livae, kerẹ emu ro chekọ vwẹ utuwevwi re de wuye na, kirobo ri nẹ asan ra da nyẹ wain rhẹ;

³¹wọ sa riọ vwi kasan kasan ejobi, wẹwẹ vẹ evwruwevwi wẹn; fikiridie ọye osa rẹ iruo wẹn ru wo ruru vwẹ evun rẹ utughẹ ra da vwa oma na.

³²Wọ rha ghwa oghwa rẹ umwemwu fiki rọye-e, wo da vwẹ ọ ro me yovwi vwọ vwo ze izobo nu. Wọ rha vwẹ emu ọfuanfon rẹ ihwo rẹ Izrẹl na gbe ẹgua-a, wo de ruo wo de rhe ghwu.