Read urhobo Ukeri 19 Bible Online

Ukeri 19 - urhobo bible

Ukeri 19

¹Asakiephana Ọrovwohwo da ta kẹ Mosis vẹ Erọn,

²Ọnana ọye urhi rẹ Ọrovwohwo jiri; Ta kẹ ihwo rẹ Izrẹl rere ayen reyọ upene rẹ erhuẹn ọvwavware ro jẹ oka evwo vwọ rhe, ra je gba ọghrọrọ mu dẹvo-o.

³Ku wọ reyọ vwọ kẹ Eleaza rẹ orherẹn, ka reyọ kpo otafe rẹ erhọn na e mi hwe vwẹ obaro rọye.

⁴Eleaza rẹ orherẹn na ko duvwu urhiabọ rọye phihọ ọbara rọye, kọ sarọ ku obaro rẹ utughẹ ra da vwa oma na asieghwrẹn.

⁵Ka torhẹ umuomuo rẹ erhuẹn na vwẹ obaro rọye; ophien rọye, uvwo rọye, kugbe ọbara rọye, vẹ isọn rọye, ka torhẹ;

⁶orheren na kọ reyọ urhe rẹ igẹdu kugbe ahworhe kugbe isene a me kpare ayen phihọ uherevie rẹ erhuẹn rẹ a torhe na.

⁷Etiyin orherẹn na kọ fọnrhọn emwa rọye ọ me rha vwẹ ame họ oma rọye, tavwe rọ ke rhoma rhe evun rẹ erhọn na; ọrheren na kọ dia vwi ijẹfuọn bẹsiẹ rhi te ovwọnvwọn.

⁸Ohwo rọ torhẹ erhuẹn na kọ fọnrhon emwa rọye, ọ me rha họ oma rọye vwẹ ame, ọ me rha dia vwi jẹfuọn bẹsie rhi te ovwọnvwọn.

⁹Ohwo rẹ oma rọye fonro kọye re ghwẹ iwurhie rẹ upene re erhuẹn ra torhẹrẹ na koko, ọ me ra ghwẹ ayen phihọ otafe rẹ erhọn na vwẹ asan rọ fonro, ka sẹro rọye vwọ kẹ ukoko rẹ ihwo re Izrẹl fiki rẹ ame na ro jẹfuọn, rere e vwo si umwemwu nu.

¹⁰Ohwo rọ ghwẹ iwurhie rẹ erhuẹn na kọ fọnrhọn emwa rọye, ọ me dia vwi jẹfuọn re te ovwọnvwọn. Ọnana kọ dia vwọ ke ihwo rẹ Izrẹl, kugbe ọrhorha rọ uherevie rẹ ayen, kọ dia urhi re rara.

¹¹Ohwo rọ vwẹ obọ te orivwi rẹ ohwo kohwo yo gbe ẹgua, ọ me dia etiyin ẹdẹ ighwrẹn;

¹²ọ me họ oma rọye vwẹ ẹdẹ rẹ erha kugbe ẹdẹ righwrẹn, tavwe rọ ke fọn; ekẹvuọvọ ọ rha họ oma rọye vwẹ ẹdẹ rerha kugbe ẹdẹ righwrẹ-en kọ dia vwi jẹfuọn.

¹³Kohwo kohwo rọ vwẹ obọ te orivwi, oma re ohwo ro ghwu nure, rọ rha hworhẹ oma rọye-e, yo gbe ọgarivi rẹ Ọrovwohwo na ẹgua, ohwo yena ke sionẹ uherevie rẹ Izrẹl; fikiridie e ku ame ro rufuọn na kuo-o, kọ dia vwi jẹfuọn; ijẹfuọn rọye je hẹ uyovwi rọye.

¹⁴Ọnana ọye urhi siẹ rẹ ohwo de ghwu vwẹ evun rẹ utughẹ na, kohwo kohwo rọ rhe evun rẹ utughẹ na, vi kohwo kohwo rọ evun rọye ejobi kọ dia vwi jẹfuọn ẹdẹ ighwrẹn.

¹⁵Koravwọ koravwọ ro rhie phihọ ejobi, ro vwo urhurho vwẹ enu rọye-e yọ fonro-o,

¹⁶Kohwo kohwo rọ hẹ otafe rọ vwẹ obọ te ohwo ra vwẹ ọlọkọ hwe, eyẹ orivwi, eyẹ ubeku re ohwo, eyẹ ushi, kọ dia vwi jẹfuọn ẹdẹ ighwrẹn.

¹⁷Vwọ kẹ ohwo ro jẹfuọn na ayen ke reyọ imiwurhie rẹ izobo rẹ umwemwu ra torhẹre na, ke ku ame rọ djẹ ọkẹre ba vwẹ evun rẹ oravwọ;

¹⁸ohwo rọ fọnro kọ reyọ ahworhẹ, ko dje phihọ ame na, ọ me sarọ ku enu rẹ utughẹ na, vẹ ekuakua ra vwọ rhuẹrẹ ejobi, kugbe enu rẹ ihwo rẹ etiyin, kugbe enu rẹ ohwo rọ vwẹ obọ te ubeku na, eyẹ ọ rọ vwẹ obọ te ohwo re hweri na, eyẹ orivwi na, eyẹ ushi na;

¹⁹ohwo rọ fonro na kọ sarọ ku ohwo ro jẹfuọn na vwẹ ẹdẹ rerha kugbe ẹdẹ righwrẹ na; vwẹ ẹdẹ righwrẹ na kọye ọ vwọ hwọrhẹ, kọ fọnrhọn emwa rọye ọ me rha vwẹ ame họ oma rọye, vwẹ ovwọnvwọn kọ fon.

²⁰Ẹkẹvuọvo ohwo ro jẹfuọn na ọ rha sa họ oma rọye-e, ohwo yena ke sionẹ uherevie rẹ ọghwẹgbe na, fikiridie o gbe ẹshẹ rẹ Ọrovwohwo ẹgua; fikiridie e ji ku ame ro rufuọn na kuo-o, yẹ ọ je hẹ ijẹfuọn.

²¹Ọnana kọ dia urhi re rare vwọ kẹ ayen. Ohwo rọ fẹrẹ ame ri jẹfuọn na kọ je nabọ fọnrhọn emwa rọye; ohwo rọ vwẹ obọ rọye te ame ri jẹfuọn na kọ dia vwi jẹfuọn re te ovwọnvwọn.

²²Kemu kemu ejobi rẹ ohwo ro jẹfuọn na vwẹ obọ te kọ dia vwi jefuọn; kohwo kohwo rọ vwẹ obọ te kọ dia vwi jefuọn te ovwọnvwọn