Read urhobo Ukeri 2 Bible Online

Ukeri 2 - urhobo bible

Ukeri 2

¹Ọrovwohwo da ta kẹ Mosis vẹ Erọn,

²Ihwo rẹ Izrẹl ki mu erhọn dohwo daphiana rọye, vẹ oka rẹ uwevwi rẹ esẹ rayen; kẹ ayen mu erhọn hirhe aro ku utughẹ ra da vwa oma na vwi kẹbẹre kẹbẹre.

³Ihwo ri che mu erhọn phihọ ẹbẹre rẹ obaro ọnre ro hirhe aro ku obaro kọ dia aphiana rẹ erhọn ri Juda vwẹ edjedje rayen, osun rẹ ihwo ri Juda da dia Nahshọn rẹ ọmọ rẹ Amminadab.

⁴Ihwo rọye re keri da dia uriori ujorha gbe ihwe gbe ẹne kugbe ujori esan.

⁵Ihwo ri re mu erhọn kẹrẹ ke dia orua rẹ Isaka, osun rẹ ihwo rẹ Isaka da dia Natanẹl rẹ ọmọ ri Zuar.

⁶Ihwo rọye re keri da dia uriori ujuvẹ gbe ihwẹne, kugbe ujori ẹne.

⁷Orua ri Zẹbulọn osun rẹ ihwo ri Zẹbulọn da dia Eliab rẹ ọmọ ri Hẹlọn.

⁸Ihwo rọye re keri da dia uriori ujuvẹ gbe ihwe gbe ighwrẹn kugbe ujori ẹne.

⁹Ihwo rẹ erhọn ri Juda, vwẹ edjedje rayen, ọvo da dia odu gbe ujọne gbe esan kugbe ujori ẹne. Ayen re cha ka obaro vwẹ oyan na.

¹⁰Vwẹ ẹbẹre rẹ obọrhe ọnre etiyin aphiana rẹ erhọn ri Rubẹn cha dia vwẹ edjedje rayen, osun rẹ ihwo ri Rubẹn da dia Elizur rẹ ọmọ ri Shedeur.

¹¹Ihwo rọye re keri da dia uriori ujuvẹ gbẹ esan kugbe ujori iyori.

¹²Ihwo ri mu erhọn kẹrẹ ke dia orua ri Simiọn, osun rẹ ihwo ri Simiọn da dia Shẹlumiẹl ọmọ ri Zurishaddai:

¹³unu rẹ ihwo rọye re keri da dia uriori ujuvẹ gbe ihwe gbe irhiri kugbe ujori erha.

¹⁴O de te orua ri Gad, osun rẹ ihwo ri Gad da dia Eliasaf ọmọ ri Ruẹl,

¹⁵otu rọye re keri da dia uriori ujuvẹ gbe iyori kugbe ujori esan gbe ujuvẹ gbe ihwe.

¹⁶Ihwo rẹ erhọn ri Rubẹn ejobi, vwẹ edjedje rayen ọvuọvo, da dia uriori ujuvẹ gbẹ uhwọvo kugbe ujori ẹne gbe ujuvẹ gbe ihwe. Ayen ke cha dia edje rivẹ vwẹ usun na.

¹⁷Ọke yena ka bọn utughẹ ra da vwa oma na vwẹ obo otafe, erhọn rẹ ihwo ri Livae na kọ dia uherevie rẹ erhọn na: obo rẹ ayen mu erhọn na, eriyin ayen je yan ro otafe, dohwo dẹdia rọye, dohwo daphiana rọye.

¹⁸Vwẹ obuko ọnre kẹ etiyin aphiana rẹ erhọn rẹ Ifrem cha dia vwẹ edjedje rayen, osun rẹ ihwo rẹ Ifrem da dia Elishama rẹ ọmọ rẹ Ammihud:

¹⁹unu rẹ ihwo rọye re keri da dia uriori ujuvẹ kugbe ujori iyori.

²⁰Ọ rọ rha vwọ kpahọ kẹ orua ri Manasse, osun rẹ ihwo ri Manasse da dia Gamaliẹl Ọmọ ri Pedahzur:

²¹unu rẹ ihwo rọye re keri da dia uriori ọgban gbẹ ivẹ kugbe ujori ivẹ.

²²O de rhi te orua ri Bẹnjamin, osun rẹ ihwo ri Bẹnjamin da dia Abidan ọmọ ri Gidiọni,

²³unu rẹ ihwo rọye da dia uriori ọgban gbẹ iyori kugbe ujori ẹne.

²⁴Unu rẹ ihwo ejobi re ẹrhọn rẹ Ifrem, edjedje rayen, da dia odu gbe ẹrenren kugbe ujori Ayen ke dia orerha vwẹ usun na.

²⁵Vwẹ obọhwẹre ọnre na kẹ etiyin aphiana rẹ erhọn ri Dan cha dia vwẹ edjedje rayen, osun rẹ ihwo ri Dan da dia Ahiezer rẹ ọmọ rẹ Ammishaddai.

²⁶Unu rẹ ihwo rọye ejobi re keri da dia uriori ujorha gbẹ ivẹ kugbe ujori ighwrẹn.

²⁷Ihwo ri rhe mu erhọn kẹrẹ kẹ orua ri Asha, osun rẹ ihwo rẹ Asha da dia Pagiẹl rẹ ọmọ rẹ ọchran,

²⁸unu rẹ ihwo rọye re keri da dia uriori ujuvẹ gbe ọvo kugbe ujori iyori.

²⁹O de rhi te orua ri Naftali, osun rẹ ihwo ri Naftali da dia Ahira rẹ ọmọ rẹ Enan,

³⁰unu rẹ ihwo rọye re keri da dia uriori ujuvẹ gbẹ ihwerha kugbe ujori ẹne.

³¹Unu rẹ ihwo ejobi re erhọn rẹ Dan da dia odu gbẹ ujuvẹ gbẹ ihwe gbẹ ighwrẹn kugbe ujori esan. Ayen re cha ka uko, edjedje.

³²Enana ihwo rẹ Izrẹl re keri vwi dohwo duwevwi rẹ ọsẹ rọye; Ihwo re evun rẹ erhọn na re keri edjedje da dia odu esan gbẹ erha gbẹ ujori iyori gbẹ ujuvẹ gbẹ ihwe.

³³Ẹkẹvuọvo ihwo ri Livae na e kere ayen kugbe usun rẹ ihwo rẹ Izrẹl na-a, kerẹ urhi rẹ Ọrovwohwo ji kẹ Mosis.

³⁴Enẹ kọye ihwo rẹ Izrẹl ruru, kirobo rẹ Ọrovwohwo ji urhi kẹ Mosis, kọye ayen de mu erhọn dohwo daphiana rọye, kẹ etiọye ayen ji mu oyan, dohwo duvwiẹ rọye, dohwo duwevwi rẹ ọsẹ rọye.