Read urhobo Ukeri 20 Bible Online

Ukeri 20 - urhobo bible

Ukeri 20

¹Etiyin ihwo rẹ Izrẹl, ukoko na ejobi, de rhi te aton ri Zin vwẹ emeranvwe rẹ ẹsosuọ, ihwo na da daji Kadẹsh; Miriam de ghwu vwẹ etiyin, e de sho phihọ etiyin.

²Asakiephana ame gbi rhe ukoko na-a, ayen da rhe ghwẹ oma koko vwọ so Mosis vẹ Erọn.

³Ihwo na ki nene Mosis ghwọ, ayen da ta, Manẹ avwanre ghwuru vwẹ ọke rẹ imoni rẹ avwanre vwo ghwu vwe obaro rẹ Ọrovwohwo na vwonẹ!

⁴Die wọ vwọ reyọ ọghwẹgbe rẹ Ọrovwohwo vwọ rhe evun rẹ aton nana, rere avwanre vwo ghwu vwẹ etinẹ, te avwanre vẹ uchuru rẹ avwanre?

⁵Die wọ vwọ reyọ avwanre nẹ otọ rẹ Ijipt rhe, wọ vwọ reyọ avwanre rhe asan omiomiovwi nana? ọ dia asan re ọka-a, eyẹ figi-i, eyẹ vaini-i, eyẹ pomegranate-e; o ji vwo ame ra da-a.

⁶Etiyin Mosis vẹ Erọn de vrẹn jẹ ọghwẹgbe na vwo kpo obo unurhoro rẹ utughẹ ra da vwa oma na, ayen de she bọvwọn opharo rhuotọ. Urinrin rẹ Ọrovwohwo da vwẹ oma phia kẹ ayen,

⁷etiyin Ọrovwohwo da ta kẹ Mosis,

⁸Reyọ ọkpọ na, re wọ ghwẹ ihwo na koko, wẹ vẹ Erọn rẹ oniọvo wẹn, ru wọ ta kẹ oragha na vwẹ irharo rẹ ayen nẹ ọ vwẹ ame rọye rhe; kẹ ọtiọye wọ reyọ ame vwọ kẹ ukoko na da vẹ uchuru rayen.

⁹Etiyin Mosis da reyọ ọkpọ na vwẹ irharo rẹ Ọrovwohwo, kirobo re ji urhi kẹ.

¹⁰Mosis vẹ Erọn da ghwẹ ọghwẹgbe na koko vwẹ obaro rẹ oragha na, ọ da ta kẹ ayen, We nyo asakiephana, ovwan ihwo okpetu na, kẹ avwanre reyọ ame nẹ oragha nana rhe kẹ ovwan?

¹¹Etiyin Mosis da kpare obọ rọye kpenu ọ da vwẹ ọkpọ rọye na teyọ oragha na abivẹ; ame da mwavwe no rhe buebu, ukoko na da da, kugbe uchuru rayen.

¹²Ọrovwohwo da ta kẹ Mosis vẹ Erọn, Fikiridie ovwan se vwe gbuyota-a, we ru vwẹ fon vwẹ obaro rẹ ihwo rẹ Izrẹl na-a, fiki rẹ ọtiọye na, wo gbe sa vwẹ ọghwẹgbe nana vwo te otọ re me vwọ kẹ ayen na-a.

¹³Enana keye ame ri Meriba, asan rẹ ihwo rẹ Izrẹl de nene Ọrovwohwo ghwọ, o de dje oma rọye fuanfon vwọ kẹ ayen.

¹⁴Mosis de ji ikọn nẹ Kadesh rhe bru ovie rẹ Idọm, Enẹ oniọvo wẹn Izrẹl tare: Wọ riẹn ukpokpogho ro te avwanre oma;

¹⁵obo rẹ esẹ rẹ avwanre kpo obo otọ rẹ Ijipt, avwanre da dia otọ rẹ Ijipt krekri; ihwo rẹ Ijipt da vwẹ obọ ogangan yọnrọn avwanre vẹ esẹ rẹ avwanre;

¹⁶avwanre de kperi se Ọrovwohwo, o de nyo urhuru rẹ avwanre, o de ji amakashe rọye rhe, ọ da rhe reyọ avwanre nẹ Ijipt rhe, asakiephana avwanre hẹ kadẹsh, orere rọ hẹ akakọ rẹ ughwru rẹ otọ rẹ ovwan.

¹⁷Asakiephana gbe jẹ avwanre wan otọ rẹ ovwan na vrẹn. Avwanre cha wan udju eyẹ ogba ri vain vrẹ-ẹn, avwanre je cha da ame rẹ erhanre rẹ ovwa-an; ogbogbo rẹ idjerhe rẹ Ovie na avwanre cha wan, avwanre cha rhẹriẹ oma kpo obọrhe eyẹ obọhwẹre-e, bẹsiẹ rẹ avwanre cha vwọ wan vrẹn ughwru rẹ ovwan.

¹⁸Ẹkẹvuọvo Idọm da ta kẹ, Wọ cha wan vrẹn etine-e, o da dia ọtiọye ke me cha vwẹ ọlọkọ vwọ họnre ovwan.

¹⁹Ihwo rẹ Izrẹl da ta kẹ, Nighe idjerhe rode na avwanre cha wan; ọda dianẹ avwanre da ame rẹ ovwan, te omẹvwẹ vẹ uchuru mẹ, ke me hwa osa rọye, jẹn uvwe vwẹ owọ wan vrẹn ọvo, emuọfa rha herọ-ọ.

²⁰Ẹkẹvuọvo ọ da ta, Wọ cha wan vrẹ-ẹn. Idọm da ghwẹ ihwo buebu rhe vwọ hẹrhẹ ayen vẹ egba rode.

²¹Enẹ kọye Idọm sen kẹ ihwo rẹ Izrẹl nẹ ayen wan otọ rayen vrẹ-ẹn; Izrẹl ke rhẹriẹ oma ra wan idjerhe ọfa.

²²Etiyin ayen de mu oyan ni Kadẹsh, ihwo rẹ Izrẹl, ukoko na ejobi, de rhi te Ugbenu ri Họr.

²³Etiyin Ọrovwohwo da ta kẹ Mosis vẹ Erọn vwẹ Ugbenu ri Họr, vwẹ ughwru rẹ otọ rẹ Idọm,

²⁴Erọn ko che ghwu bru ihwo rọye; kidie ọ cha sa ru otọ re me vwọ kẹ ihwo rẹ Izrẹl na-a, fikiridie wo vwo udu kẹ urhi mẹ vwẹ asan ame ri Meriba.

²⁵Gba reyọ Erọn vẹ ọmọ rọye rẹ ọmọshare Eleazar, ru wọ vwẹ ayen rhe obenu rẹ Ugbenu ri Họr,

²⁶ghwiẹ iwun rẹ Erọn mie, re wo ku ayen phihọ Eleazar rẹ ọmọ rọye; Erọn ko che bru ihwo rọye ra, ko che ghwu vwẹ etiyin.

²⁷Mosis de ru kirobo rẹ Ọrovwohwo ta kẹ; ayen da yan kpenu rẹ Ugbenu ri Họr vwẹ irharo rẹ ukoko na ejobi.

²⁸Mosis da ghwiẹ iwun rẹ Erọn na mie, ọ de ku ayen phihọ oma rẹ Eleazar ọmọ rẹ Erọn rẹ ọmọshare, etiyin Erọn de ghwu vwẹ obenu rẹ ugbenu. Etiyin Mosis vẹ Eleazar de wotọ nẹ enu rẹ Ugbenu na rhe.

²⁹Ọke rẹ ukoko na ejobi vwọ mrẹ nẹ Erọn ghwuru, uwevwi rẹ Izrẹl ejobi da viẹ fiki rẹ Erọn ẹdẹ ọgban.