Read urhobo Ukeri 21 Bible Online

Ukeri 21 - urhobo bible

Ukeri 21

¹Ọke rẹ ihwo ri Kenan, ovie rẹ Arad, rọ dia Nẹgẹb, vwo nyo tanẹ ihwo rẹ Izrẹl wan idjerhe rẹ Atarim cha, o de nene Izrẹl họnre, o de mu ihwo rẹ Izrẹl ẹvo ighuvwu.

²Izrẹl de ve ive kẹ Ọrovwohwo, ọ da ta, Wo de ghine phi ihwo na phihọ obọ mẹ ke me guọghọ irere rayen ejobi kakare.

³Ọrovwohwo de nyo urhuru rẹ Izrẹl ọ da vwẹ ihwo ri Kenan phihọ ayen obọ. Ayen da guọghọ ayen ve irere rayen kakare, etiyin e de se odẹ re asan na Họrmah.

⁴Ugbenu ri Họr etiyin ayen de mu oyan phihọ kpo idjerhe rẹ Abadi Ọvwavware na, ra ghrẹghrẹ otọ rẹ Idọm wan; ihwo na rhe se chirako vwẹ idjerhe na-a.

⁵Ihwo na da ta ota kpahe Ọghẹnẹ vi Mosis, Die wọ vwọ reyọ avwanre nẹ otọ rẹ Ijipt rhe rhi ghwu phihọ evun rẹ aton na? Kidie o vwo emuọre-e o vwo ame-e, yẹ emuọre nana kpare avwanre ohọre tututu.

⁶Etiyin Ọrovwohwo de ji eredekọ rẹ erhanre rhe uherevie rẹ ihwo na, e da rhovwo ihwo na, ọtiọye ihwo rẹ Izrẹl buebu de ghwu.

⁷Ihwo na de bru Mosis rhe, ayen da ta, Avwanre ru imwemwu, kidie, avwanre harhẹ Ọghẹnẹ vẹ ekpuyovwi wẹn; biko rẹ Ọrovwohwo kẹ avwanre rere o si eredekọ na nẹ uherevie rẹ avwanre. Etiyin Mosis da rẹ kẹ ihwo na.

⁸Ọrovwohwo da ta kẹ Mosis, Gbe duvwu ọrọdekọ rẹ erhanre, ru wo muo vi vwẹ enu rẹ ubiurhe, rere kohwo kohwo rẹ ọ rhovworo, rọ da mrẹ kọ rhọ.

⁹Kọye Mosis de duvwu ọrọdekọ rẹ ẹrovwo, o de muo vi vwẹ enu rẹ ubiurhe; ọda dianẹ ọrọdekọ rhovwo ohwo ọvo, ro de ni ọrọdekọ ra vwẹ ẹrovwo duvwu na kọ rhọ.

¹⁰Ihwo rẹ Izrẹl de mu oyan phihọ, ayen de rhi wo phihọ Obot.

¹¹Etiyin ayen de vrẹn nẹ Obot, ayen de rhi mu erhọn phihọ Iyeabarim, vwẹ aton ro hirhe opharo ku Moab vwẹ obaro ọnre.

¹²Nẹ etiyin ayen de mu oyan, ayen de rhi mu erhọn phihọ iyara ri Zẹrẹd.

¹³Ayen de mu oyan nẹ etiyin, ayen de mu erhọn phihọ abọ oboyi rẹ Arnon, ro evun rẹ aton, rọ riẹn nẹ ughwru rẹ Amọr rhe; kidie Arnon hẹ ughwru ri Moab, uvwre ri Moab vẹ Amọr.

¹⁴Fiki rẹ ọtiọye na a vwọ ta vwẹ ọbe rẹ Ofovwi rẹ Ọrovwohwo, Waheb vwi Suphah vẹ iyara rẹ Arnon,

¹⁵kugbe oghwrọrọ rẹ iyara na rọ riẹn abọ te asan rẹ Ar epha rọ vwẹ oma so ughwru ri Moab.

¹⁶Etiyin ayen nu kpo Beer; kọye orhare rẹ Ọrovwohwo ta kẹ Mosis nẹ, Ghwẹ ihwo na ejobi koko, ke me kẹ ayen ame.

¹⁷Etiyin Izrẹl da so une nana: Djẹ phia E orhare, so une kẹ!

¹⁸orhare rẹ isun tọnre; rẹ ehọnvwọre rẹ ihwo na ghwẹre, vẹ ọkpọ kugbe ugbọphogho rayen. Nẹ aton na ayen da yan kpo Mattanah,

¹⁹ni Mattanah re te Nahaliẹl, ni Nahaliẹl re te Bamot,

²⁰ni Bamot re te iyara re riẹn abọ kpo ubrakpọ ri Moab vwẹ obenu ri Pisgah ro nẹ obo aton na.

²¹Etiyin Izrẹl de ji ikọn bru Sihọn ovie rẹ ihwo rẹ Amọr tanẹ,

²²Ju vwe wan otọ wẹn vrẹn; avwanre cha wan udju eyẹ ogba ri vain rẹ ovwa-an; avwanre je da ame rẹ orhare-e, Ogbogbo rẹ Idjerhe rẹ Ovie na avwanre cha wan, bẹsiẹ rẹ avwanre vwọ wan otọ wẹn vrẹn.

²³Ẹkẹvuọvo Sihọn rha rhọvwe nẹ Izrẹl wan otọ rọye vrẹ-ẹn. Ọ da ghwẹ ihwo rọye ejobi koko, ọ da kpare ohọnre bru Izrẹl vwẹ evun rẹ aton, ayen de rhi te Jahaz, ayen da họnre Izrẹl.

²⁴Izrẹl da vwẹ ọlọkọ nyavwọ hwe, ọ da reyọ otọ rọye nẹ Arnon re te Jabbọk, rhiri re te ihwo rẹ Ammọn, kidie Jazer ọye ughwru rẹ ihwo rẹ Ammọn.

²⁵Izrẹl da reyọ irere rẹ ihwo rẹ Amọr, vwi Hẹshbọn kugbe ẹko rọye ejobi.

²⁶Hẹshbọn ọye orere ri Sihọn ovie rẹ Amọr ohwo ro nene ovie rẹ ẹsosuọ ri Moab họnre ọ da reyọ etọ rọye ejobi mie, rhiri re te Arnọn.

²⁷Fiki rọ ọtiọye na ihwo de roro ine vwọ suọ tanẹ, Yanrhe obo Hẹshbọn, e ja bọn, e ja bọn orere ri Sihọn phihọ.

²⁸Kidie erhanre la nẹ Hẹshbọn rhe, ogidi erhanre nẹ orere ri Sihọn rhe. Ọ da torhẹ Ar ri Moab, ri vwo igbenu ride rẹ Arnọn.

²⁹Ekan kọ wẹ E Moab! Wo ghwruru, E ihwo ri Chemosh! O ru emọ rọye phihọ isoghoro O de rhe ru emetẹ rọye phihọ ighuvwu, vwọ kẹ Sihọn ovie rẹ Amọr.

³⁰Ọtiọye uvwiẹ rayen ghwọrọ kufia nẹ Heshbon rhiri re te Dibọn, avwanre da guọghọ re tototo tavwe re erhanre na ke torhẹ rhiri re te Medẹba.

³¹Enẹ kọye Izrẹl rhe vwọ dia otọ rẹ Amọr.

³²Mosis ji ihwo re dọrhẹ ri Jazer; ayen da reyọ ẹko rọye, ayen da ghwẹ ekuakua rẹ ihwo rẹ Amọr re dia etiyin reyọ.

³³Etiyin ayen de ku oma rhẹriẹ ayen da yanran kpo obenu vwẹ idjerhe ri Bashan, Ọg ovie ri Bashan da rhe gba phihọ hẹrhẹ te ọye vẹ ihwo rọye de rhi phi ofovwi vwi Edrei.

³⁴Ẹkẹvuọvo Ọrovwohwo da ta kẹ Mosis, Wọ djẹ oshọ rọye-e; kidie mi phi ro phihọ obọ wẹn nure, kugbe ihwo rọye, kugbe otọ rọye, ku wo ru kẹ kirobo ru wo ru kẹ Sihon ovie rẹ Amọr, ro dia Hẹshbọn.

³⁵Kẹ ọtiọye ayen hwe re kugbe emọ rọye, kugbe ihwo rọye, rhiri bẹsiẹ rẹ ohwo ọvuọvo gbi chekọ-ọ; ayen da reyọ otọ rayen.