Read urhobo Ukeri 22 Bible Online

Ukeri 22 - urhobo bible

Ukeri 22

¹Etiyin ihwo rẹ Izrẹl de mu oyan, ayen de mu erhọn phihọ uphephẹ ri Moab rọ abọ oboyi ri Jodan vwi Jericho.

²Etiyin Balak ọmọ ri Zippọr, da mrẹ obo rẹ Izrẹl ruru kẹ ihwo rẹ Amọr.

³Ihwo ri Moab da rhe vọn vẹ oshọ rẹ ihwo na, fikiridie ihwo na buru gangan; oshọ rẹ ihwo rẹ Izrẹl de mu ihwo ri Moab.

⁴Etiyin Moab da ta kẹ ekpako ri Midian, Urogho nana cha rarẹ ihwo re riariẹ avwanre muotọ, kirobo rẹ erhuẹn ọ ria odi rẹ aghwa. Kọye Balak ọmọ ri Zippọr rọ dia ovie ri Moab vwẹ ọke yena,

⁵de ji ikọn bru Balaam ọmọ ri Beọr vwi Petọr ro si kẹrẹ Urhie, vwẹ otọ ri Amaw re se, tanẹ, Nighe, ihwo ẹvo nẹ otọ rẹ Ijipt rhe, ihwo na rhurhu otọ na kpisi, ayen mu erhọn phihọ oboyi ro hirhe aro ku vwe na.

⁶Yanrhe asakiephana wo rhi duvwu ihwo na iyori kẹ vwẹ, fikiridie ayen gan nọ kẹ vwẹ; vwẹ ọke ọvo si mi se phi ayen kua re me da djẹ ayen nẹ otọ na; kidie me riẹnre nẹ ohwo ru wo bruba kẹ, yẹ bruphihọ kẹ, ohwo ru wo duvwu iyori yẹ eduvwiro iyori.

⁷Etiyin ekpako ri Moab vi Midian de vrẹn vẹ igho ra vwọ bọ epha vwẹ obọ rẹ ayen, ayen de te asan ri Balaam, ayen ke vuẹ ovuẹ ri Balak.

⁸Etiyin ọ da ta kẹ ayen, We wo phihọ etinẹ vwẹ ason na, ke me cha vuẹ ovwan obo rẹ Ọrovwohwo vuẹ vwẹ; etiyin osun ri Moab da vwerhẹ kẹrẹ Balaam.

⁹Ọghẹnẹ de bru Balaam rhe, ọ da ta kẹ nẹ, Amono ihwo nana re vẹ owẹ gba etiyin?

¹⁰Balaam da ta kẹ Ọghẹnẹ, Balak ọmọ ri Zippọr, ovie ri Moab ọye ri ji ikọn bru vwe rhe, tanẹ,

¹¹Nighe ihwo ẹvo nẹ otọ rẹ Ijipt rhe, irhurhu otọ na kpisi, yanrhe asakiephana, wo rhi duvwu ayen iyori kẹ vwẹ okẹ ọvo se me sa họnre ayen re me da djẹ ayen yanran.

¹²Ọghẹnẹ da ta ki Balaam, Wo nene ayen ra-a; wọ ji duvwu iyori hwe ihwo na-a, kidie, ebruphihọ kẹ ayen nure.

¹³Ọye Balaam de vrẹn vwẹ irhiọke, ọ da ta kẹ isun ri Balak, Yanran kpo otọ wẹn, kidie Ọrovwohwo senre tanẹ mi nene ovwan ra-a.

¹⁴Etiyin isun ri Moab de vrẹn ayen de bru Balak rhe, ayen da ta, Balaam rhọvwe nene avwanre rhe-e.

¹⁵Etiyin Balak da rhoma ji isun buebu efa re rhoro ri vwo ọghọ nọ ayen.

¹⁶Ayen de bru Balaam rhe ayen da ta kẹ, ọtiọna Balak ọmọ Zippọr tare: Wo jẹn emu ọvuọvo djẹ wẹ ẹcha-a.

¹⁷Kidie mi ghinẹ bru ọghọ phihọ owẹ oma, kemu kemu ejobi ru wọ tanẹ mi ru ọye mi ru; yanrhe, wo rhi duvwu iyori hwe ihwo nana kẹ vwẹ.

¹⁸Ẹkẹvuọvo Balaam da kpahe ọ da ta kẹ idibo ri Balak, Owenẹ Balak ghwẹ uwevwi rọye rọ vọnre vẹ idọnọ efuanfon kugbe iro vwọ kẹ vwẹ dede, me sa yan jẹ urhi rẹ Ọrovwohwo Ọghẹnẹ mẹ vwo-o, re mi vwo ru ọ rọ hanvwere eyẹ ọ ro rhoro-o.

¹⁹Biko, asakiephana, hẹrhẹ vwẹ etinẹ ason na rhe, rere me riẹn sẹ emu ofa je herọ rẹ Ọrovwohwo cha vuẹ vwẹ.

²⁰Ọghẹnẹ de bru Balaam rhe vwẹ ason ọ da ta kẹ, ọ da dianẹ ihwo na rhi se we, vrẹn, wo nene ayen ra; ẹkẹvuọvo obo re me vuẹ wẹ ọye wo ji ru.

²¹Etiyin Balaam de vrẹn vwẹ irhiọke ọ da ro ekẹtẹkẹtẹ rọye o de nene isun ri Moab yanran.

²²Ẹkẹvuọvo ophu da nabọ mu Ọghẹnẹ gangan fikiridie Balaam rare; etiyin amakashe rẹ Ọrovwohwo de mudia idjerhe hẹrhẹ rere ọ dia ukọn kẹ. Asakiephana ọ rọ gua vwẹ enu rẹ ekẹtẹkẹtẹ, vẹ idibo rọye ivẹ ri nene.

²³Etiyin ekẹtẹkẹtẹ na da mrẹ amakashe rẹ Ọrovwohwo ro mudia vwẹ idjerhe vẹ ọlọkọ vwẹ obọ rọ kpare, ekẹtẹkẹtẹ na de bioma ro akakọ rẹ idjerhe na, ọ da họrhọ ro aghwa, etiyin Balaam da fa ekẹtẹkẹtẹ na rere o vwọ ro idjerhe.

²⁴Etiyin amakashe rẹ Ọrovwohwo na de re mudia phihọ asan ohwahwa rẹ idjerhe na vwẹ uvwre rẹ ogba ri vain vẹ igbẹhẹ rọ herọ tobọna tobọna.

²⁵Ọke rẹ ekẹtẹkẹtẹ na vwọ mrẹ amakashe rẹ Ọrovwohwo na, ọ da ra vwọ bọvwọ igbẹhẹ ọ da vwẹ owọ ri Balaam vwọ nyẹ igbẹhẹ na; etiyin ọ da rhoma fa.

²⁶Etiyin amakashe rẹ Ọrovwohwo na da djẹ obaro, o de re mudia phihọ asan ọhwahwa, asan re de jẹ oma ẹ sa rhẹriẹ kpo obọhwere eyẹ obọrhe.

²⁷Ọke rẹ ekẹtẹkẹtẹ na vwọ mrẹ amakashe rẹ Ọrovwohwo na, o de she diguẹ vwẹ obotọ ri Balaam; ophu de mu Balaam gangan ọ da reyọ ọkpọ rọye vwọ fa ekẹtẹkẹtẹ na.

²⁸Etiyin Ọrovwohwo de rhie unu rẹ ekẹtẹkẹtẹ na ọ da ta ki Balaam, Die mi ru we ru wọ vwọ fa vwẹ asiarha nana?

²⁹Balaam da ta kẹ ekẹtẹkẹtẹ na, Fikiridie wọ vwo vwẹ heha, ọ dianẹ ọlọkọ rhe vwe obọ nọ manẹ mi hwe we nure.

³⁰Etiyin ekẹtẹkẹtẹ na da ta ki Balaam, Me dia ekẹtẹkẹtẹ wẹn, ru wọ gua rhabae na rhi te ẹdẹ ri nonẹ? Mi ji ru we ọtiọna dẹvure? ọ da kpahe tanẹ, Ẹjo.

³¹Etiyin Ọrovwohwo de rhie ẹro ri Balaam phihọ, ọ da mrẹ amakashe rẹ Ọrovwohwo ro mudia vwẹ idjerhe, vẹ ọlọkọ vwẹ obọ rọ kpare, etiyin o de gbe uyovwi kpotọ o de shiguẹ.

³²Amakashe rẹ Ọrovwohwo na da ta kẹ, Die wọ vwọ fa ekẹtẹkẹtẹ wẹn asiarha nana? Nighere me rhere rhe da wẹ ji, fikiridie idjerhe wẹn na ọchọchọ kẹ vwẹ;

³³ekẹtẹkẹtẹ na da mrẹ vwẹ, ọ da rhẹriẹ oma aberha nana. Ọ dianẹ ọ rhẹriẹ oma vwo-o, ọ rẹ uyota na, manẹ mi hwe we ekẹtẹkẹtẹ na ọvo kọye e chekọ.

³⁴Etiyin Balaam da ta kẹ amakashe rẹ Ọrovwohwo na, Mi ru umwemwu, kidie me riẹnre nẹ wo mudia idjerhe hẹrhẹ ovwẹ-ẹ. Asakiephana ọ da dia obo re brare vwẹ obaro wẹn, ki mi rhivwi kpo.

³⁵Amakashe rẹ Ọrovwohwo na da ta ki Balaam, Wọ vẹ ihwo na yanran, ẹkẹvuọvo ota re me vuẹ wẹ, ọye ọvo wọ ta. Etiyin Balaam vẹ isun ri Balak da yanran.

³⁶Ọke ri Balak vwo nyo nẹ Balaam rhire etiyin ọ da yanran ra vwa vwẹ orere ri Moab, vwẹ ughwru rọ orhoma ri Arnọn, vwẹ obo oba rẹ ughwru na.

³⁷Balak da ta kẹ Balaam, Mi ji ohwo rhe se we-e? Kidie sorọ wo vwo jẹ cha, wo rori ni mi se bru ọghọ phihọ owẹ oma?

³⁸Balaam da ta kẹ Balak, Nighe, mi bru we rhire! Asakiephana me tobọ ji vwo ogangan me vwọ ta ota? Ọta rẹ Ọghẹnẹ phihọ unu mẹ ọye me ta.

³⁹Etiyin Balaam vi Balak da yanran, ayen de rhi te Kiriath-hu-zoth.

⁴⁰Balak da reyọ irhuẹn vẹ igegede vwo ze izobo, o de vwo rhe Balaam kugbe isun re vọye gba herọ.

⁴¹Ẹdẹ rẹ ivẹ Balak da reyọ Balaam vwo kpo Bamotbaal, etiyin ọ da mrẹ ihwo na re ma kẹrẹ obọ.