Read urhobo Ukeri 23 Bible Online

Ukeri 23 - urhobo bible

Ukeri 23

¹Etiyin Balaam da ta kẹ Balak, Gba so egbada ighwrẹn phihọ etinẹ kẹ vwẹ, wọ rha vwẹ irhuẹn ighwrẹn kugbe egbo ighwrẹn rhe.

²Balak de ru kirobo ri Balaam ta kẹ; etiyin Balak vi Balaam da reyọ erhuẹn ọvo vẹ egbo ọvo vwo ze izobo vwẹ enu rẹ agbada ọvuọvo.

³Etiyin Balaam da ta kẹ Balak, Mudia kẹrẹ izobo rẹ ẹtorhẹ wẹn na, re me yanran, ọke ọvo Ọrovwohwo me rhe vwa vwẹ; obo rọ vuẹ vwẹ ejobi ke me ta kẹ wẹ. Ọke yanran kpo enu rẹ ugbenu phrẹphrẹphrẹ na.

⁴Ọghẹnẹ kẹ vwa Balaam, etiyin Balaam da ta kẹ, Me rhuẹrẹ egbada ighwrẹn na nure, me je vwẹ erhuẹn ọvo kugbe egbo ọvo vwo ze izobo vwẹ enu rẹ agbada ọvuọvo nure.

⁵Ọrovwohwo de phi ota phihọ unu ri Balaam, ọ da ta, Rhivwi bru Balak ra, enẹ kọye wọ ta.

⁶O de rhivwi bro, nighe te ọye te isun ri Moab mudia kẹrẹ izobo rẹ ẹtorhẹ na.

⁷Etiyin Balaam de mu ikun egbe phihọ, ọ da ta, Nẹ Aram Balak da reyọ ovwẹ rhe, ovie ri Moab nẹ ugbenu rẹ obaro ọnre rhe; Yanrhe, mo duvwu Jekọp iyori kẹ vwẹ yanrhe, mọ rhe bọphiẹ Izrẹl!

⁸Komavọ mi duvwu iyori hwe ihwo rẹ Ọghẹnẹ duvwi iyori-i? komavọ me bọphiẹ ihwo rẹ Ọrovwohwo bọphiẹre-e?

⁹Nẹ obenu rẹ ugbenu rhe me da mrẹ, nẹ obenu rẹ igbenu itete rhe mi de no; nighe, ihwo re dia asan obọ rẹ ayen san. Ri kere oma rọye ba ẹghorho ri chekọ-ọ.

¹⁰Ono ri se kere ibiekpẹn rẹ otọ ri Jekọp, eyẹ se keri ẹkẹn ẹne rẹ Izrẹl? Jẹn uvwe ghwu ughwu rẹ ọvwata, rere oba mẹ họhọ Ọtiọye!

¹¹Etiyin Balak da ta kẹ Balaam, Die wo ru vwe na? Me reyọ owẹ nu wo rhi duvwu ivwighrẹ mẹ iyori, gbe nighe, wo ru emuọvo-ọ ku wọ rhoma nẹ ẹrhovwo ke ayen.

¹²Etiyin ọ da kpahe, ọ dianẹ me jomaotọ ta ota rẹ Ọrovwohwo phihọ unu mẹ?

¹³Etiyin Balak da ta kẹ Yanrhe nene uvwe kpo asan ọfa, ru wọ da sa mrẹ ayen; e re kẹrẹ obọ ọvo wọ cha mrẹ, wọ cha sa mrẹ ayen ejọbi-i; kẹ etiyin wọ de duvwu ayen iyori kẹ vwẹ.

¹⁴Ọ da reyọ kpo aghwa ri Zofim, vwẹ enu ri Pisgah, ọ da so egbada ighwrẹn, ọ da vwẹ erhuẹn ọvo kugbe egbo ọvo vwo ze izobo vwẹ agbada ọvuọvo.

¹⁵Balaam da ta kẹ Balak, Mudia etinẹ kẹrẹ izobo wẹn rẹ ẹtorhẹ na, rere me ra vwa Ọrovwohwo vwẹ abọ oboyi.

¹⁶Etiyin Ọrovwohwo da vwa Balaam, o de phi ota phihọ unu rọye, o da ta, Rhivwi bru Balak, enẹ kọye wọ cha ta.

¹⁷O de bro rhe, e vwo no, o mudia kẹrẹ asan izobo rẹ ẹtorhẹ na kugbe isun ri Moab ri mudia kẹrẹ. Etiyin Balak da ta kẹ, Die Ọrovwohwo tare?

¹⁸Etiyin Balaam de mu ikun egbe phihọ, ọ da ta, Vrẹn, Balak, wo nyo; kerhọn mẹ, E ọmọ ri Zippọr;

¹⁹Ọghẹnẹ dia ohwo, rọ vwọrọ ofia-an, eyẹ ọmọ rẹ ohwo, ro se kuẹrhẹriẹ-ẹ ọ ta nure, o gbi rhe ruo? Eyẹ rọ vwọ ta nu na, o gbi rhe se ruo gba?

²⁰Nighere, a vuẹ vwẹ ni mi bruba kẹ; o bruba kẹ nure, mi gbi se kuorhẹriẹ-ẹ.

²¹Ọ mrẹ umiovwo ọvuọvo vwẹ oma ri Jekọpu-u; eyẹ ọ mrẹ ukpokpogho ọvuọvo vwẹ Izrẹl na-a Ọrovwohwo rẹ Ọghẹnẹ rayen vẹ ayen herọ, edo rẹ ovie ọvo ọ hẹ uherevie rayen.

²²Ọghẹnẹ reyọ ayen nẹ otọ rẹ Ijipt rhe; ayen vwo ighoro kerẹ ighoro rẹ ọhrarhare.

²³Kidie o vwo ese ọvuọvo ro mu Jekọpu-u, o vwo aro ra sa mrẹ kpahe Izrẹl kaka-a; asakiephana ka cha ta kpahe Jekọp vẹ Izrẹl nẹ, Ọbo rẹ Ọghẹnẹ ruru!

²⁴Nighere, ihwo ẹvo! Kere okpohrokpo rẹ aye o ro vrẹn kerẹ okporhokpo rẹ ọshare rọ kpare oma rọye; o che rhuẹ-ẹn bẹsiẹ rọ vwọ chẹghẹ eranvwe rọye nu, rọ da da ọbara rọ rẹ emu ro hweri.

²⁵Etiyin Balak da ta kẹ Balaam, Wo duvwu ayen iyori kaka-a eyẹ wo ji bruba kẹ ayen kaka-a.

²⁶Ẹkẹvuọvo Balaam da ta kẹ Balak, Me ta kẹ wẹ jovwo-o, Obo rẹ Ọrovwohwo tare ejobi, ọye mi ru?

²⁷Balak da ta kẹ Balaam, Yanrhe asakiephana, re me reyọ owẹ vwo kpo asan ọfa; ọke ọvo o che jẹ Ọghẹnẹ wo de duvwu ayen iyori kẹ vwẹ vwẹ etiyin.

²⁸Etiyin Balak da reyọ Balaam kpo enu ri Peọr, ro hirhe aro ku aton.

²⁹Balaam da ta kẹ Balak, So agbada ighwrẹn kẹ vwẹ vwẹ etinẹ, ru wọ kẹ vwẹ irhuẹn ighwrẹn kugbe egbo ighwrẹn.

³⁰Balak de ru kirobo ri Balaam tare, ọ da vwẹ erhuẹn ọvo vẹ egbo ọvo vwo ze izobo vwẹ enu rẹ agbada ọvuọvo.