Read urhobo Ukeri 25 Bible Online

Ukeri 25 - urhobo bible

Ukeri 25

¹Ọke rẹ Izrẹl vwọ dia Shitim ihwo na vẹ emetẹ ri Moab ki koko gbe ọfanrhiẹn.

²Enana ki si ihwo na kpo izobo rẹ edjọ rayen, ihwo na ke ria, ayen ke vwẹ uyovwi kpotọ kẹ edjọ rayen.

³Etiyin Izrẹl de ku ọghrọrọ ri Baal ri Peọr phihọ ohọre rọye. Ophu rẹ Ọrovwohwo da rhe tua kpahe Izrẹl.

⁴Ọrovwohwo da ta kẹ Mosis, Reyọ ehọnvwọre rẹ ihwo na, re wo churu ayen si uvo vwẹ obaro re Ọrovwohwo, rere ophu ọtuatua rẹ Ọrovwohwo na vwo bi chọ Izrẹl ra.

⁵Etiyin Mosis da ta kẹ iguẹdjọ rẹ Izrẹl, kohwo kohwo vwẹ usun rẹ ovwan gbe hwe irivẹ rọye ri kuoma gbe Baal ri Peọr.

⁶Nighere, ohwo rẹ Izrẹl ọvo da rhe ọ da reyọ aye rẹ ohwo ri Midian rhe ekru rọye, vwẹ irharo ri Mosis kugbe irharo rẹ ukoko rẹ ihwo rẹ Izrẹl na ejobi, vwẹ ọke rẹ ayen vwo viẹ vwẹ asan anurhoro rẹ utughẹ ra da vwa oma na.

⁷Ọke ri Finihas rẹ ọmọ rẹ Eleazar, ọmọ rẹ Erọn rẹ orherẹn na, vwọ mrẹ, o de vrẹn ọ da yan jẹ ukoko na vwo, ọ da reyọ ubiri vwẹ obọ rọye

⁸ọ da vwo kpaho ohwo rẹ Izrẹl na ra ro obo etan rẹ uvun rọye, o de duvwu ayen ivẹ na, ọshare rẹ Izrẹl na kugbe aye na, ivun fi. Enẹ kọye ọtiekọ na vwo fue nẹ ihwo rẹ Izrẹl oma.

⁹Dede na otu ri ghwuru vwẹ oma rẹ ọtiekọ na da dia uriori uje gbe ẹne.

¹⁰Etiyin Ọrovwohwo da ta kẹ Mosis,

¹¹Finihas rẹ ọmọ rẹ Eleazar rẹ ọmọ rẹ Erọn rẹ orherẹn na, o fue ophu mẹ ri mi muẹ vwọ kpahe ihwo rẹ Izrẹl na, kidie omaẹriọ rẹ ọ re vwẹ ohri rẹ ihwo na ọ rerọ kpahe ayen, fiki rẹ ọtiọye na me gbe ghwọrọ ihwo rẹ Izrẹl vwẹ evun rẹ omaẹriọ mẹ na-a.

¹²Fiki rẹ ọtiọye na gba ta, Nighere, me vwẹ ọphọ mẹ rẹ ufuoma vwọ kẹ;

¹³kọ dia kẹ, kugbe uvwiẹ rọye rọ cha vwẹ obuko rọye, kọ dia ọphọ rẹ orherẹn rhiri bẹdẹ, fikiridie ọ rioma fiki rẹ Ọghẹnẹ rọye, ọ da gọ ẹgua nu kẹ ihwo rẹ Izrẹl.

¹⁴Odẹ rẹ ohwo rẹ Izrẹl re hweri na, re hweri kugbe aye ri Midian na, da dia Zimri rẹ ọmọ ri Salu, ọkpako vwẹ unuwevwi ọvo vwẹ orua ri Simiọn.

¹⁵Odẹ rẹ aye rẹ ohwo ri Midian na ra teye hwe na da dia Kọzbi ọmọtẹ ri Zur, rọ dia ọkpako rẹ unuwevwi rẹ ihwo ri Midian.

¹⁶Ọrovwohwo da ta kẹ Mosis,

¹⁷Lagha ihwo ri Midian na, rere wo hwe ayen;

¹⁸kidie ayen lagha owẹ vẹ umwemwu rayen, rẹ ayen vwọ mu ihwo wẹn vwẹ oma rẹ ota ri Peọr, kugbe vwẹ oma rẹ ota ri Kọzbi Ọmọtẹ rẹ ovie ri Midian, oniọvo rayen ra teye hwe vwẹ ẹdẹ rẹ ọtiekọ na vwi fiki ri Peọr.