Read urhobo Ukeri 27 Bible Online

Ukeri 27 - urhobo bible

Ukeri 27

¹Etiyin emetẹ ri Zelofehad rẹ ọmọ ri Hefar, rẹ ọmọ ri Giliad, rẹ ọmọ ri Makiya, rẹ ọmọ ri Manasse, de nẹ orua rẹ ihwo ri Manasse rhe rẹ ọmọ ri Josẹf. Edẹ rẹ emetẹ rọye na da dia: Mahlah, Noa, Hoglah, Milkah, kugbe Tirzah.

²Ayen de mudia vwẹ obaro ri Mosis, kugbe obaro rẹ Ẹlẹazar rẹ orherẹn na, kugbe obaro rẹ isun na kugbe ukoko na ejobi, vwẹ anurhoro rẹ utughẹ ra da vwa oma na, tane,

³Ọsẹ rẹ avwanre ghwuru vwẹ evun rẹ aton; ọ hẹ usun rẹ ihwo re vẹ Korah gba ghwẹ oma koko vwọ so Ọrovwohwo na-a, ẹkẹvuọvo o ghwuru fiki rẹ umwemwu rẹ obọ rọye; o vwo ọmọshare-e.

⁴Die sorọ a vwọ reyọ odẹ rẹ ọsẹ rẹ avwanre nẹ evun rẹ orua rọye, fiki robo ro vwiẹ ọmọshare-e? Kẹ avwanre ughwẹ vwẹ uherevie rẹ imoni rẹ ọsẹ rẹ avwanre.

⁵Mosis da vwẹ ẹdjọ rayen vwo rhe Ọrovwohwo.

⁶Ọrovwohwo da ta kẹ Mosis,

⁷Emetẹ ri Zelofehad re ase; wọ sa kẹ ayen ẹkẹn uku vwẹ ohri rẹ imoni rẹ ọsẹ rayen rere wo siobọ nẹ ẹkẹn uku rọ ọsẹ rayen vwọ kẹ ayen.

⁸Ku wọ ta kẹ ihwo rẹ Izrẹl na, ọ da dianẹ ohwo ghwuru, ro vwo ọmọshare-e, ka vwẹ ẹkẹn uku rọye vwọ kẹ ọmọtẹ rọye.

⁹Ọ da jẹ dianẹ o vwo ọmọtẹ-ẹ, gba vwẹ ẹkẹn uku rọye vwọ kẹ iniọvo rọye.

¹⁰Ọ da diane o rhe ji vwo iniọvo-o, gba vwẹ ẹkẹn uku rọye vwọ kẹ iniọvo rẹ ọsẹ rọye.

¹¹Ọ da dianẹ ọsẹ rọye rhe vwo iniọvo-o, gba vwẹ ẹkẹn uku rọye vwọ kẹ imoni rẹ orua rọye rọ kẹrẹ, kọ reyọ. Kọ dia kẹ ihwo rẹ Izrẹl iji kugbe urhi, kirobo rẹ Ọrovwohwo ji urhi kẹ Mosis.

¹²Ọrovwohwo da ta kẹ Mosis, Yanran kpo enu rẹ ugbenu nana rẹ Abarim, rere wọ ra mrẹ otọ re me vwọ kẹ ihwo rẹ Izrẹl na.

¹³Ọke wọ da mrẹ nu, ekpuyovwi wẹn ko ghwu, kirobo rẹ oniọvo wẹn Erọn ghwuru,

¹⁴fikiridie wo vwo udu kẹ ota mẹ vwẹ evun rẹ aton ri Zin vwẹ ọke rẹ ukoko na vwo mukpahe ota mẹ, re vwo ru vwe fon vwẹ asan ame na vwẹ irharo rayen. (Enana ame ri Meriba ri Kadẹsh vwẹ evun rẹ aton ri Zin.)

¹⁵Mosis da ta kẹ Ọrovwohwo,

¹⁶Jẹn Ọrovwohwo Ọghẹnẹ rẹ erhi rẹ ihwo ejobi na, ọ vwẹ ohwo mu vwẹ enu rẹ ukoko na,

¹⁷rọ ka obaro kẹ ayen ro sun ayen ra ro ji sun ayen rhe ro sun ayen ro otafe kugbe re ọ je reyọ ayen rhe uwevwi; rere ukoko rẹ Ọrovwohwo vwo jẹ dia kerẹ igodẹ ri vwo osu-un.

¹⁸Ọrovwohwo da ta kẹ Mosis, Reyọ Joshua rẹ ọmọ ri Nun, ohwo rẹ erhi evun rọye re wọ ghwẹ obọ wẹn kpahọ;

¹⁹jo mudia vwẹ obaro rẹ Ẹlẹazar rẹ orherẹn na kugbe ukoko na ejobi, ku wo vwo mu vwẹ irharo rayen ejobi.

²⁰Ku wọ vwẹ ogangan wẹn na evo vwọ kẹ, rere ukoko rẹ ihwo rẹ Izrẹl na sa vwẹ ọghọ kẹ.

²¹Ko che mudia vwẹ obaro rẹ Ẹlẹazar rẹ orherẹn na, kọ cha vwẹ Utẹ vwọ guọnọ otọ rẹ ẹdjeguo kẹ vwẹ obaro rẹ Ọrovwohwo na; vwẹ oma rẹ ota rọye kẹ ayen ro otafe, vwẹ oma rẹ ota rọye kẹ ayen ro uwevwi, te ọye te ihwo rẹ Izrẹl ejobi re vọye gba berọ, ukoko na ejobi.

²²Mosis de ru kirobo rẹ Ọrovwohwo ji urhi kẹ; ọda reyọ Joshua o de vwo mudia vwẹ obaro rẹ Ẹlẹazar rẹ orherẹn na kugbe ukoko na ejobi,

²³ọ da ghwẹ abọ rọye kpahọ, o de vwo mu kirobo rẹ Ọrovwohwo dje kẹ Mosis.