Read urhobo Ukeri 28 Bible Online

Ukeri 28 - urhobo bible

Ukeri 28

¹Ọrovwohwo da ta kẹ Mosis,

²Ji urhi kẹ ihwo rẹ Izrẹl, re wọ ta kẹ ayen, izobo mẹ, emuọre mẹ re vwo ze izobo rẹ ẹtorhẹ, ọnrhẹn ororo mẹ, wọ me jomaotọ ru we ze kẹ vwẹ vwẹ ọke rọye.

³Ku wọ ta kẹ ayen, ọnana kẹ izobo rẹ erhanre rẹ ovwan che ze kẹ Ọrovwohwo na: imigodẹ rẹ eshare ivẹ rẹ ẹgbukpe ọvo ro vwo eka-an, kẹdẹ kẹdẹ, rere ọ dia izobo re kọke kọke.

⁴Omogodẹ ọvo wo vwo ze izobo vwẹ irhiọke, omogodẹ ro chekọ kọye wo vwo ze vwẹ ovwọnvwọn;

⁵ọtiọye rhe ji te ẹkẹn ihwe rẹ iputusẹ rẹ ọka ra nọre vworo vworo, re vwo ze izobo rẹ ọka, ra vwẹ ẹkẹn ẹne rẹ ukoko rẹ evwri nabọ gbe kugbe.

⁶Ọnana kẹ izobo rẹ ẹtorhẹ kọke kọke, re vwo mu vwẹ Ugbenu ri Sinae fiki rẹ ọnrhẹn ororo, izobo rẹ erhanre kẹ Ọrovwohwo.

⁷Izobo rẹ udi rọye kọ dia ẹkẹn ẹne ri ukoko vwọ kẹ omogodẹ ọvuọvo; vwẹ asan ọfuanfon na wo de ku izobo rẹ udi ọgangan na kuẹ Ọrovwohwo.

⁸Omogodẹ ro chekọ na ku wo vwo ze izobo vwẹ ovwọnvwọn; kerẹ izobo rẹ ọka rẹ irhiọke yẹ, kerẹ izobo rẹ udi, ku wo vwo ze izobo rẹ ẹtorhẹ, ro gbo ọnrhẹn ororo kẹ Ọrovwohwo.

⁹Vwẹ edidjala na imigodẹ rẹ eshare ivẹ rẹ ẹgbukpe ọvo ri vwo eka-an, kugbe ẹkẹn ivẹ rẹ ihwe rẹ ephah rẹ ọka ra nabọ nọ rẹ izobo, ra vwẹ evwri gbe kugbe, kugbe izobo rẹ udi rọye;

¹⁰ọnana kọye izobo rẹ ẹtorhẹ kẹdidjala kẹdidjala, vwọ ba izobo rẹ ẹtorhẹ kugbe izobo rẹ udi.

¹¹Vwẹ ẹsosuọ rẹ emeranvwe wẹn ko wo ze izobo rẹ ẹtorhẹ kẹ Ọrovwohwo: emọ rẹ erhuẹn eshare ivẹ, egbo ọvo, imigodẹ rẹ eshare ighwrẹn rẹ ẹgbukpe ọvo ri vwo eka-an;

¹²ji kugbe ẹkẹn erha rẹ ihwe rẹ ephah rẹ ọka ra nabọ nọ re vwo ze izobo rẹ ọka, ra vwẹ evwri gbe, vwọ kẹ erhuẹn ọvuọvo; kugbe ẹkẹn ivẹ rẹ ihwe rẹ ọka ra nabọ nọ vwo ze izobo rẹ ọka, ra vwẹ evwri gbe, vwọ kẹ egbo ọvo na;

¹³kugbe ẹkẹn ehwe rẹ omamọ rẹ ọka ra vwẹ evwri gbe rọ dia izobo rẹ ọka vwọ kẹ omogodẹ ọvuọvo; rọ dia izobo ra torhẹre ro gbo ọnrhẹn ororo, izobo rẹ erhanre kẹ Ọrovwohwo na.

¹⁴Izobo rẹ udi rọye kọ dia ubro rẹ ukoko ri wain kẹ erhuẹn ọvuọvo, ẹkẹn erha ri ukoko kẹ egbo ọvuọvo; ẹkẹn erha re ukoko kẹ egbo ọvuọvo; ọnana kọye cha dia izobo rẹ ẹtorhẹ vwẹ emeranvwe ọvuọvo vwẹ emeranvwe na ejobi bẹsiẹ rẹ ukpe na vwo re.

¹⁵Ji kugbe ẹkpro ọvo re vwo ze izobo rẹ umwemwu kẹ Ọrovwohwo; ke vwo ze ba izobo rẹ ẹtorhẹ kẹdẹ kẹdẹ kugbe izobo rẹ udi rọye.

¹⁶Vwẹ ẹdẹ rihwẹne rẹ emeravwe rẹsosuọ ọye ẹwanvrẹn rẹ Ọrovwohwo.

¹⁷Vwẹ ẹdẹ ihwiori rẹ emeranvwe na kẹ orẹ na; ẹdẹ ighwrẹn ọye wa rẹ ikara ro jephuo.

¹⁸Vwẹ ẹdẹ rẹ ẹsosuọ kọ dia ẹdẹ rẹ ọghwẹgbe ọfuanfon: wo ruẹ iruo ọganga-an,

¹⁹ẹkẹvuọvo ze izobo rẹ erhanre, izobo ra torhẹre kẹ Ọrovwohwo: upene rẹ erhuẹn eshare ivẹ, egbo ọvo, kugbe imigodẹ ighwrẹn rẹ ẹgbukpe ọvo wọ me mrẹ nẹ i vwo eka-an;

²⁰ji kugbe izobo rẹ ọka ra nabọ nọ ra vwẹ evwri gbe; ẹkẹn erha rẹ ihwe rẹ ephah ọye wọ vwọ ba erhuẹn ọshare ọvo, kugbe ẹkẹn ivẹ rẹ ihwe kọye wọ vwọ ba egbo na;

²¹ẹkẹn ọvo rẹ ihwe kọye wọ vwọ ba imigodẹ ọvuọvo ighwrẹn na;

²²ji kugbe ẹkpro ọvo re vwo ze izobo rẹ umwemwu, rere a vwọ gọ ẹgua kẹ wẹ.

²³Ku wo ze enana ba izobo rẹ ẹtorhẹ rẹ irhiọke na, rọ dia izobo rẹ ẹtorhẹ kọke kọke.

²⁴Vwẹ idjerhe ọvuọvo na kọye wo ze kẹdẹ kẹdẹ, vwẹ ẹdẹ ighwrẹn, izobo rẹ emuọre ra vwẹ erhanre torhẹ, ro gbo ọnrhen ororo kẹ Ọrovwohwo; e ji ze ba izobo rẹ ẹtorhẹ kọke kọke kugbe izobo rẹ udi rọye.

²⁵Vwẹ ẹdẹ righwrẹn na ku we vwo ọghwẹgbe ọfuanfon; wo ruẹ iruo ọganga-an.

²⁶Vwẹ ẹdẹ rẹ emamọ rẹ ẹsosuọ na, vwẹ ọke wo de che ze izobo rẹ ọka rẹ orhọ kẹ Ọrovwohwo na vwẹ orẹ rẹ ẹdidjala wẹn na, ku wo vwo ọghwẹgbe ọfuanfon; wo ruẹ iruo ọganga-an,

²⁷ẹkẹvuọvo ze izobo rẹ ẹtorhẹ, ro gbo ọnrhen ororo kẹ Ọrovwohwo na: upene rẹ erhuẹn eshare ivẹ, egbo ọvo, imigodẹ ighwrẹn rẹ ẹgbukpe ọvo;

²⁸ji kugbe izobo rẹ ọka rayen ra nọre ra vwẹ evwri gbe, ẹkẹn erha rẹ ihwe re ephah a vwọ ba erhuẹn ọshare ọvuọvo, ẹkẹn ivẹ rẹ ihwe a vwọ ba egbo ọvo,

²⁹ẹkẹn ọvo rẹ ihwe vwọ ba ọvuọvo rẹ imigodẹ ighwrẹn na;

³⁰kugbe ẹkpro ọvo, ra vwọ gọ ẹgua kẹ wẹ.

³¹Je vwọ ba izobo rẹ ẹtorhẹ ri kọke kọke kugbe izobo rẹ ọka, wọ vwẹ ayen ze kugbe izobo rẹ udi rayen. Wọ me mrẹ nẹ ayen vwo eka kaka-a.