Read urhobo Ukeri 29 Bible Online

Ukeri 29 - urhobo bible

Ukeri 29

¹Vwẹ ẹdẹ rẹ ẹsosuọ rẹ emeranvwe rẹ ighwrẹn ku we vwo ọghwẹgbe ọfuanfon; wo ruẹ iruo ọganga-an. Ọye ẹdẹ ru we vwo hworo owanre,

²ku wo ze izobo rẹ ẹtorhẹ ro gbo ọnrhẹn ororo kẹ Ọrovwohwo: upene rẹ erhuẹn ọshare ọvo, egbo ọvo, imigodẹ ighwrẹn rẹ ẹgbukpe ọvo ri vwo eka-an;

³ji kugbe izobo rẹ ọka ra nọre ra vwẹ evwri gbe, ẹkẹn erha rẹ ihwe rẹ ephah vwọ ba erhuẹn na, ẹkẹn ivẹ rẹ ihwe vwọ ba egbo na,

⁴ẹkẹn ọvo rẹ ihwe vwọ ba ọvuọvo rẹ imigodẹ ighwrẹn na;

⁵kugbe ẹkpro ọvo re vwo ze izobo rẹ umwemwu, ra vwọ gọ ẹgua kẹ wẹ;

⁶vwọ ba izobo rẹ ẹtorhẹ rẹ emeranvwe ọkpokpọ, vẹ izobo rẹ ọka rọye, kugbe izobo rẹ ẹtorhẹ kọke kọke, kugbe izobo rẹ ọka rọye, kugbe izobo rẹ udi rayen, kirobo rẹ urhi rẹ ji kẹ ayen epha, izobo rẹ erhanre ro gbo ọnrhẹn ororo kẹ Ọrovwohwo.

⁷Vwẹ ẹdẹ rihwe rẹ emeranvwe righwrẹn na ku wo vwo ọghwẹgbe ọfuanfon, wọ me vwẹ oja re oma wẹn; wo ruẹ iruo ọvuọvo-o,

⁸ẹkẹvuọvo ku wo ze izobo rẹ ẹtorhẹ kẹ Ọrovwohwo, ro gbo ọnrhẹn ororo; upene rẹ erhuẹn rẹ ọshare ọvo, egbo ọvo, imigodẹ ighwrẹn rẹ ẹgbukpe ọvo, ayen che vwo ekan kẹ wẹ-ẹ;

⁹kugbe izobo rẹ ọka rayen ra nọre ra vwẹ evwri gbe, ẹkẹn erha rẹ ihwe rẹ ephah vwọ ba irhuẹn na, ẹkẹn ivẹ re ihwe vwo ba egbo na,

¹⁰ẹkẹn ọvo rẹ ihwe vwọ ba ọvuọvo rẹ imigodẹ ighwrẹn na:

¹¹ji kugbe ẹkpro ọvo re vwo ze izobo rẹ umwemwu, ji kugbe izobo rẹ umwemwu rẹ a vwọ gọ ẹgua, kugbe izobo rẹ ẹtorhẹ kọke kọke vẹ izobo rẹ ọka rọye, vẹ ọ rẹ izobo rẹ udi rayen.

¹²Vwẹ ẹdẹ rẹ ihwiori rẹ emeranvwe rẹ ighwrẹn na ku we vwo ọghwẹgbe ọfuanfon; wo ruẹ iruo ọganga-an, ku wọ re orẹ kẹ Ọrovwohwo ẹdẹ ighwrẹn;

¹³ku wo ze izobo rẹ ẹtorhẹ, izobo ra vwẹ erhanre torhẹ, ro gbo ọnrhẹn ororo kẹ Ọrovwohwo, upene rẹ irhuẹn eshare ihwerha, egbo ivẹ, imigodẹ ihwẹne rẹ ẹgbukpe ọvo; ayen vwo eka-an;

¹⁴kugbe izobo rẹ ọka rayen ra nọre ra vwẹ evwri gbe, ẹkẹn erha rẹ ihwe rẹ ephah vwọ ba irhuẹn eshare na ọvuọvo, ẹkẹn ivẹ rẹ ihwe vwọ ba ọvuọvo rẹ egbo ivẹ na,

¹⁵ẹkẹn ọvo rẹ ihwe vwọ ba egbo na ọvuọvo rẹ imigodẹ ihwẹne na,

¹⁶ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rọye.

¹⁷Vwẹ ẹdẹ rivẹ upene rẹ erhuẹn eshare ihwivẹ, egbo ivẹ, imigodẹ ihwẹne rẹ ẹgbukpe ọvo ri vwo eka-an,

¹⁸vẹ izobo rẹ ọka vẹ ọ rẹ udi vwọ ba irhuẹn rẹ eshare na, egbo na, kugbe imigodẹ na ununu rayen kirobo rẹ urhi djeri;

¹⁹ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rayen.

²⁰Vwẹ ẹdẹ rerha irhuẹn rẹ eshare uhwọvo, egbo ivẹ, imigodẹ ihwẹne rẹ ẹgbukpe ọvo ri vwo eka-an,

²¹vwọ ba izobo rẹ ọka kugbe ọ rẹ udi vwọ kẹ irhuẹn eshare na, egbo na, kugbe imigodẹ na ununu rayen kirobo rẹ urhi na epha;

²²ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rọye.

²³Vwẹ ẹdẹ rẹne irhuẹn eshare ihwe, egbo ivẹ, imigodẹ ihwẹne rẹ ẹgbukpe ọvo ri vwo eka-an,

²⁴vẹ izobo rẹ ọka rọye kugbe izobo rẹ udi rọye vwọ ba irhuẹn na, egbo na, kugbe imigodẹ na ununu rayen kirobo rẹ urhi epha;

²⁵ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke, izobo rẹ ọka rọye kugbe izobo rẹ udi rọye.

²⁶Vwẹ ẹdẹ riyori irhuẹn rẹ eshare irhiri, egbo ivẹ, imigodẹ ihwẹne rẹ ẹgbukpe ọvo ri vwo eka-an,

²⁷kugbe izobo rẹ ọka vẹ izobo rẹ udi vwọ kẹ irhuẹn eshare na, egbo na, kugbe imigodẹ na ununu rayen kirobo rẹ urhi na epha;

²⁸ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rọye.

²⁹Vwẹ ẹdẹ resan irhuẹn ẹrenren, egbo ivẹ, imigodẹ ihwẹne rẹ ẹgbukpe ọvo ri vwo eka-an,

³⁰kugbe izobo rẹ ọka vẹ izobo rẹ udi vwọ ba irhuẹn eshare na, egbo na, kugbe imigodẹ na ununu rayen kirobo rẹ urhi epha;

³¹ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rọye.

³²Vwẹ ẹdẹ righwrẹn irhuẹn eshare ighwrẹn, egbo ivẹ, imigodẹ ihwẹne rẹ ẹgbukpe ọvo ri vwo eka-an,

³³kugbe izobo rẹ ọka vẹ izobo rẹ udi vwọ kẹ irhuẹn eshare na, egbo na, kugbe imigodẹ na ununu rayen kirobo rẹ urhi epha;

³⁴ji kugbe ẹkpro ọvo re vwo ze izobo rẹ umwemwu, vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rọye.

³⁵Vwẹ ẹdẹ rẹ ẹrenren ku wo vwo ọghwẹgbe ọfọfọ: wo rue iruo oganga-an,

³⁶ẹkẹvuọvo ku wo ze izobo rẹ ẹtorhẹ, izobo ra vwẹ erhanre torhẹ, ro gbo ọrhen ororo kẹ Ọrovwohwo: erhuẹn ọshare ọvo, egbo ọvo, imigodẹ ighwrẹn rẹ ẹgbukpe ọvo ri vwo eka-an.

³⁷Kugbe izobo rẹ ọka kugbe izobo rẹ udi vwọ ba erhuẹn ọshare na, egbo na, kugbe imigodẹ na, ununu rayen, kirobo rẹ urhi epha:

³⁸ji kugbe ẹkpro ọvo re vwo ze izobo rẹ umwemwu; vwọ ba izobo rẹ ẹtorhẹ kọke kọke vẹ izobo rẹ ọka rọye kugbe izobo rẹ udi rọye.

³⁹Enana keye wo ze kẹ Ọrovwohwo na vwẹ ẹdẹ rẹ orẹ re bruru na, je vwọ ba izobo rẹ ive wẹn kugbe izobo rẹ evun esiri wẹn, rọ dia izobo rẹ ẹtorhẹ wẹn, kugbe izobo rẹ ọka wẹn, kugbe izobo rẹ udi wẹn, kugbe izobo rẹ ufuoma wẹn.

⁴⁰Etiyin Mosis da ta kẹ ihwo rẹ Izrẹl ejobi kemu kemu kirobo rẹ Ọrovwohwo ji urhi vwọ kẹ Mosis.