Read urhobo Ukeri 30 Bible Online

Ukeri 30 - urhobo bible

Ukeri 30

¹Mosis da ta kẹ igbuyovwi rẹ orua rẹ ihwo rẹ Izrẹl, Ọnana obo rẹ Ọrovwohwo ji urhi rọye.

²Ọke rẹ ohwo de ve ive kẹ Ọrovwohwo, eyẹ o de duvwu iyori kẹ oma rọye, e jọ pha unu-u; ko ru kirobo rọ vwẹ unu ta na.

³Eyẹ ọke rẹ aye de ve ive kẹ Ọrovwohwo, ro de ve kẹ oma rọye, vwẹ ọke rọ vwọ uwevwi rẹ ọsẹ rọye, vwẹ ọke ọmoha rọye,

⁴rẹ ọsẹ rọye de nyo ive ro veri kugbe ive ro veri kẹ oma rọye, rọ kpahe ota ọvuọvo kẹ-ẹ; ive ro veri ejobi yi mudia kẹ.

⁵Ẹkẹvuọvo ọsẹ rọye da sẹn kẹ vwẹ ẹdẹ yena ro nyoro na, o rhe vwo ive rọye, o vwo ive ọvuọvo ro ve kẹ oma rọye, ro se mudia-a; Ọrovwohwo ko vwo ghovwo, fikiridie ọsẹ rọye sẹn kẹ.

⁶Ọ da dianẹ e vwi ro brọgọ kẹ ọshare, vwẹ ọke ro vwo ve ive na eyẹ ota re roro te-e de fio unu wan rọ vwọ gba oma obọ rọye,

⁷rẹ ọshare rọye de nyo, rọ ta emu ọvuọvo kẹ vwẹ ẹdẹ yena ro nyo ota na-a; ive rọye na ko mudia, ive ro veri kẹ oma rọye na ko mudia.

⁸Ẹkẹvuọvo ọ da dianẹ, ẹdẹ rẹ ọshare rọye nyo ota na, ọ da sẹn kẹ, etiyin ive ro veri na kẹ ofefe vwẹ oma rọye, eta ro roro te-e rọ tare vwẹ ẹbẹrunu rọye, vwọ gba oma rọye; Ọrovwohwo ko vwo ghovwo.

⁹Ẹkẹvuọvo ive kive rẹ ayeuku eyẹ aye ro ne orọnvwe, kemu kemu ro vwo duvwu iyori kẹ oma rọye, ko mudia kẹ.

¹⁰Ọ da dianẹ aye na ve ive na vwẹ uwevwi rẹ ọshare rọye, eyẹ ọ duvwi iyori kẹ oma,

¹¹rẹ ọshare rọye de nyo, rọ kpahe ota kẹ-ẹ, rọ je sẹn kẹ-ẹ; ive rọye ejobi ko mudia eta rọ ta kẹ oma rọye ejobi ki mudia.

¹²Ẹkẹvuọvo ọshare rọye de gu ayen kufia vwẹ ẹdẹ ro nyo ayen na, etiyin kemu kemu ejobi ro nẹ unu rọye rhe kpahe ive na, eyẹ vwọ kpahe eta rọ ta kẹ oma rọye na, rhe se mudia-a: ọshare rọye gu ive na kufia, Ọrovwohwo ko vwo ghovwo.

¹³Ive kive eyẹ omẹsiọn ro mu aye, ọshare rẹ aye se mudia, eyẹ ọshare rọye se gu kufia.

¹⁴Ẹkẹvuọvo ọ da dianẹ ọshare rọye ta ota ọvuọvo nẹ ẹdẹ ra ro ẹdẹ-ẹ, yẹ ọ rhọvwe phihọ ive rẹ aye rọye ejobi, eyẹ omẹsiọn rọye ejobi, rọ hẹ uyovwi rọye; jẹ ọ rhọvwe phihọ ayen ejobi, fikiridie ọ ta ota ọvuọvo kpahọ vwẹ ẹdẹ ro nyo aye-en.

¹⁵Ẹkẹvuọvo o de gu ayen kufia vwẹ ẹdẹdẹ ro vwo nyo ayen na, ọshare na kọ ghwa oghwa rẹ orukuruku rẹ aye rọye.

¹⁶Enana keye iji rẹ Ọrovwohwo ji urhi rọye kẹ Mosis, kirobo rọ dia vwẹ uvwre rẹ ọshare vẹ aye rọye, kugbe uvwre rẹ ọsẹ vẹ ọmọtẹ rọye, vwẹ ọke rẹ ọmoha rọye, rọ je vwọ uwevwi rẹ ọsẹ rọye na.