Read urhobo Ukeri 31 Bible Online

Ukeri 31 - urhobo bible

Ukeri 31

²Re ihri rẹ ihwo rẹ Izrẹl vwẹ obọ rẹ ihwo ri Midian; ọke yena da wan nu ku wo ghwu bru ihwo wẹn.

³Mosis da ta kẹ ihwo na, A rhuẹrẹ ihwo na oma vwọ kẹ ofovwi, rere ayen ra họnre ihwo ri Midian, rere ayen ra re ihri vwẹ obọ rẹ ihwo ri Midian kẹ Ọrovwohwo.

⁴Wo ji ihwo uriori nẹ orua ọvuọvo rẹ Izrẹl na kpo ofovwi na.

⁵Etiyin ayen de phi ihwo phihọ otọ, vwẹ usun rẹ uriori buebu rẹ Izrẹl, uriori nẹ orua ọvuọvo rhe, uriori ihwivẹ re rhuẹrẹ oma rẹ ofovwi.

⁶Etiyin Mosis de ji ayen kpo ofovwi, uriori nẹ orua ọvuọvo rhe, vwọ ba Finihas rẹ ọmọ rẹ Ẹlẹazar rẹ orherẹn, vẹ ekuakua rẹ ẹshẹ na kugbe owanre vwẹ obọ ra vwọ kọ udje.

⁷Ayen de phi Midian, kirobo rẹ Ọrovwohwo ji urhi kẹ Mosis, ayen de hwe ọshare kọshare.

⁸Ayen de hwe ivie ri Midian kugbe ihwo ri chekọ rẹ ayen hweri, Ẹvi, Rekem, Yur, Hur, kugbe Reba, ivie iyori ri Midian na; ayen da je vwẹ ọlọkọ hwe Balaam rhe rẹ ọmọ ri Beor.

⁹Ihwo rẹ Izrẹl de mu eya ri Midian ighuvwu kugbe imitete rayen; ayen da ghwẹ uchuru rayen reyọ, igodẹ rayen, kugbe ekuakua rayen ejobi,

¹⁰Irere rayen vwẹ asan rẹ ayen dia ejobi, kugbe asan rẹ ayen mu erhọn phihọ ejobi, ayen da vwẹ erhanre torhẹ ayen,

¹¹ayen da ghwẹ ekuakua rayen ejobi kugbe eyere rayen ejobi, te e rẹ ohwo te e rẹ eranvwe.

¹²Etiyin ayen da reyọ ighuvwu na vẹ eyere rẹ ayen ghwẹre ejobi rhe Mosis, kugbe Ẹlẹazar rẹ orherẹn na, kugbe ukoko rẹ ihwo rẹ Izrẹl na ejobi, vwẹ asan erhọn na vwẹ uphẹphẹ ri Moab vwẹ oma ri Jọdan na vwi Jeriko.

¹³Mosis, kugbe Ẹlẹazar rẹ orherẹn na, kugbe isun rẹ ukoko na ejobi, da yan ra vwa ayen vwẹ obo otafe rẹ erhọn na.

¹⁴Ivun de miovwo Mosis kpahe iruiruo rẹ ofovwi na, isun rẹ uriori kugbe isun rẹ ujori ri nẹ iruo rẹ ofovwi na rhe.

¹⁵Mosis da ta kẹ ayen, Ovwan yan jẹn eya na vwo ọkpokpọ?

¹⁶Nighere, enana re sorọ re ihwo rẹ Izrẹl, vwẹ oma rẹ iroro ri Balaam jẹrẹ, vwo ru emu ogbarogba kpahe Ọrovwohwo vwẹ oma rẹ ota ri Peor, kọye ọtiekọ vwọ rhe ukoko rẹ ihwo rẹ Ọrovwohwo na.

¹⁷Asakiephana, gbe hwe ọshare kọshare vwẹ uherevie re imitete na, kugbe aye kaye rọ riẹn obo ra vẹ ọshare vwerhẹre we mi hwe.

¹⁸Ẹkẹvuọvo upene rẹ emetẹ na ejobi re je riẹn ọshare-e re je vwẹrhẹ-ẹ, wa sẹro rẹ ayen kẹ oma rẹ ovwan.

¹⁹Muerhọn phihọ otafe rẹ erhọn na ẹdẹ ighwrẹn; ọ ro hwe ohwo ejobi, ọ rọ vwẹ oma te orivwi ejobi, we ru oma rẹ ovwan fon vẹ ighuvwu ru we muru ejobi vwẹ ẹdẹ rẹ erha kugbe ẹdẹ rẹ ighwrẹn.

²⁰Ovwan dohwo diwun rọye fọnrhọn, kemu kemu ra vwẹ ophiẹn ru, emu ejobi ra vwẹ ophiẹn rẹ ẹvwe ru, kugbe kemu kemu ejobi ra vwẹ urhe ru.

²¹Etiyin Ẹlẹazar rẹ orherẹn na da ta kẹ ihwo rẹ ofovwi na ri re phi ofovwi na ọnana iji rẹ urhi rẹ Ọrovwohwo ji kẹ Mosis:

²²jokpa rẹ oro ọvo, idọnọ efuanfon, ẹrovwo, utehru, isọn rẹ odje,

²³kemu kemu rẹ erhanre jẹ sa torhẹ, ku wo vwo dje erhanre, kọ cha fon. Ẹkẹvuọvo ke ji ruo fon vwẹ ame ri jẹfuọn; kemu kemu rẹ udu rọye gba erhanre-e, ku wọ vwọ wan ame na.

²⁴Wọ me nabọ fọnrhọn emwa wẹn vwẹ ẹdẹ rẹ ighwrẹn na, ku wọ fon; kẹsiẹye wọ ke rhe vwẹriẹ evun rẹ erhọn na.

²⁵Ọrovwohwo da ta kẹ Mosis,

²⁶Kere ekuakua ru wa ghwẹ reyọ na, ọ rẹ eranvwe kugbe ọ rẹ ohwo, wẹ kugbe Ẹlẹazar rẹ orherẹn na kugbe igbuyovwi rẹ uwevwi rẹ esẹ rẹ ukoko na;

²⁷gba ghare eyere na ẹko ivẹ, vwọ kẹ ihwo ri kpo ofovwi na kugbe ukoko na.

²⁸Gbe toro arhọghọ mie ihwo ri kpo ofovwi na kẹ Ọrovwohwo, abọvo rẹ ujori iyori, vwẹ usun rẹ ihwo na kugbe irhuẹn eshare kugbe ekẹtẹkẹtẹ kugbe usun rẹ igodẹ;

²⁹reyọ nẹ abọvo rayen, re wọ vwọ kẹ Ẹlẹazar rẹ orherẹn na rọ dia izobo kẹ Ọrovwohwo.

³⁰Reyọ abọvo mie ihwo rẹ Izrẹl abọvo vwẹ ujuvẹ gbe ihwe, ọ rẹ ohwo, ẹ rẹ erhuẹn, ọ rẹ ekẹtẹkẹtẹ, kugbe ọ rẹ igodẹ, vwẹ ọ rẹ uchuru ejobi, wọ vwẹ ayen kẹ ihwo ri Livae re vwẹ ẹro te ọgarivi rẹ Ọrovwohwo na.

³¹Etiyin Mosis vẹ Ẹlẹazar rẹ orherẹn na de ru kirobo rẹ Ọrovwohwo ji urhi kẹ Mosis.

³²Asakiephana eyere ri chekọ vwẹ ekuakua na rẹ ihwo rẹ ofovwi na ghwarhe da dia; odu esan kugbe ujorha gbẹ ihwiori rẹ igodẹ,

³³uriori esan kugbe ujorha gbẹ ihwivẹ rẹ irhuẹn,

³⁴uriori esan gbẹ ọvo rẹ ekẹtẹkẹtẹ,

³⁵uriori ọgban gbẹ ivẹ rẹ ihwo keye eya re je riẹn eshare vwẹ oma rẹ ovwẹrhẹ-ẹ.

³⁶Kugbe abọvo, rẹ ẹkẹn rẹ ihwo ri kpo ofovwi na, da dia uriori ọgban gbe ighwrẹn ujori iyori rẹ igọdẹ,

³⁷kugbe itetoro rẹ Ọrovwohwo rẹ igọdẹ da dia ujori esan gbẹ ujorha gbẹ iyori.

³⁸Irhuẹn na da dia uriori ọgban gbẹ esan, itetoro rẹ Ọrovwohwo rọ herọ da dia ujorha gbẹ ihwivẹ.

³⁹Ekẹtẹkẹtẹ na da dia uriori ọgban kugbe ujori iyori, itetoro rẹ Ọrovwohwo rọ herọ da dia ujorha gbẹ ọvo.

⁴⁰Ihwo na da dia uriori ihwe gbe esan, itetoro rẹ Ọrovwohwo rọ herọ da dia ihwo ọgban gbẹ ivẹ.

⁴¹Etiyin Mosis da vwẹ itetoro rọ dia izobo kẹ Ọrovwohwo, vwọ kẹ Ẹlẹazar rẹ orherẹn na, kirobo rẹ Ọrovwohwo ji urhi kẹ Mosis.

⁴²Nẹ abọvo rẹ ihwo rẹ Izrẹl, ri Mosis hẹriẹ nẹ oma rẹ ihwo ri kpo ofovwi —

⁴³asakiephana abọvo rẹ ukoko na da dia odu erha gbẹ ọgban gbẹ ighwrẹn kugbe ujori iyori rẹ igodẹ,

⁴⁴uriori ọgban gbẹ rẹ irhuẹn,

⁴⁵uriori ọgban kugbe ujori iyori rẹ ekẹtẹkẹtẹ,

⁴⁶kugbe ihwo uriori ihwe gbẹ esan —

⁴⁷nẹ abọvo rẹ ihwo rẹ Izrẹl, Mosis da reyọ abọvo vwẹ ujuvẹ gbẹ ihwe, ọ rẹ ihwo kugbe eranvwe, ọ da vwẹ ayen kẹ ihwo ri Livae re vwẹ ẹro te ọgarivi rẹ Ọrovwohwo na; kirobo rẹ Ọrovwohwo ji urhi kẹ Mosis.

⁴⁸Etiyin iruiruo re vwo mu phihọ enu rẹ ihwo uriori rẹ ofovwi na, olori rẹ uriori kugbe olori rẹ ujori, de rhi si kẹrẹ Mosis,

⁴⁹ayen da ta kẹ Mosis, Idibo wẹn kerẹ ihwo rẹ ofovwi na nure re hẹ otọ ri isuesun rẹ avwanre, yẹ ohwo ọvuọvo ghwru nẹ usun rẹ avwanre-e.

⁵⁰Avwanre reyọ izobo rẹ Ọrovwohwo vwọ rhire, obo rẹ ohwo ọvuọvo mrẹre, ekuakua rẹ oro, umuobọ kugbe eshẹshẹghẹ, isa rẹ obọ, eravwọ rẹ erhọn, kugbe evwarha, rere a vwọ gọ ẹgua kẹ oma rẹ avwanre vwẹ obaro rẹ Ọrovwohwo.

⁵¹Etiyin Mosis kugbe Ẹlẹazar rẹ orherẹn na de mie ayen oro na, kugbe ekuakua re duvwuru na.

⁵²Kugbe oro rẹ izobo na ejobi rẹ ayen vwo ze kẹ Ọrovwohwo na, mie isun rẹ uriori kugbe shekẹl ujuvẹ gbẹ ihwe.

⁵³(Ihwo rẹ ofovwi na ghwẹ ekuakua, kẹ dohwo doma rọye).

⁵⁴Etiyin Mosis kugbe Ẹlẹazar rẹ orherẹn na da reyọ vwọ rhe utughẹ ra da vwa oma na, kerẹ ẹkarohọ vwọ kẹ ihwo rẹ Izrẹl na vwẹ obaro rẹ Ọrovwohwo na.