Read urhobo Ukeri 32 Bible Online

Ukeri 32 - urhobo bible

Ukeri 32

¹Asakiephana emọ ri Rubẹn kugbe emọ ri Gad de vwo uchuru buebu gbidi; ayen da mrẹ otọ ri Jazer kugbe otọ ri Giliad, nighe, asan na da dia asan rẹ uchuru.

²Eriyin emọ ri Gad kugbe emọ ri Rubẹn da rhe re ta kẹ Mosis kugbe Ẹlẹazar rẹ orherẹn na kugbe isun rẹ ihwo rẹ ukoko na,

³Atarọt, Dibon, Jazer, Nimrah, Hẹshbọn, Elealeh, Sebam, Nebo, kugbe Beọn,

⁴otọ na rẹ Ọrovwohwo ghwọre vwe obaro rẹ ukoko rẹ Izrẹl na, ọye otọ ro yoma kẹ uchuru rẹ idibo wẹn.

⁵Ayen da ta, ọ da dianẹ avwanre mrẹ aruesiri vwẹ obaro wẹn, jẹn a vwẹ otọ nana kẹ idibo wẹn rọ dia ẹkẹn ughwẹ rẹ ayen wọ vwẹ avwanre wan urhie ri Jọdan na vrẹ-ẹn.

⁶Ẹkẹvuọvo Mosis da ta kẹ emọ ri Gad kugbe emọ ri Rubẹn, Kẹ imoni wẹn kpo ofovwi yẹ ovwan tidia etinẹ?

⁷Die wa vwọ djoshọ mu ihwo rẹ Izrẹl nẹ ayen yanran kpo otọ rẹ Ọrovwohwo vwọ kẹ ayen na-a?

⁸Enẹ esẹ rẹ ovwan ruru, ọke ri mi vwo ji ayen nẹ Kadeshbarnea ra mrẹ otọ na.

⁹Kidie ọke rẹ ayen vwọ yanran te Iyara rẹ Eskol, ra mrẹ otọ na, a da djoshọ mu ihwo rẹ Izrẹl rere ayen vwo jẹ otọ rẹ Ọrovwohwo kẹ ayen na ẹra.

¹⁰Ophu rẹ Ọrovwohwo da tua kpahe ayen vwẹ ẹdẹ yena, o de duvwu iyori, tanẹ,

¹¹Omuẹro nẹ usun rẹ ihwo nana ri nẹ Ijipt rhe na, nẹ ẹgbukpe uje kpenu yanran, cha sa mrẹ otọ re veri kẹ Ebraham, Aizik, kugbe Jekọp na-a, fikiridie ayen vwẹ udu rẹ ayen ejobi nene uvwe-e;

¹²Ọvuọvo jokpa ri Kalẹb rẹ ọmọ ri Jefunneh rẹ ohwo ri Ken kugbe Joshua rẹ ọmọ ri Nọn, kidie ayen ọvo rẹ vwẹ udu rẹ ayen ejobi nene Ọrovwohwo na.

¹³Ophu rẹ Ọrovwohwo da rhe tua kpahẹ Izrẹl, ọ da nẹrhẹ ayen suosuo ikpe ujuvẹ vwẹ evun rẹ aton, bẹsiẹ rẹ uvwiẹ na ejobi ri ru umwemwu vwẹ obaro rẹ Ọrovwohwo na vwọ ghwọrọ re.

¹⁴Nighere, ovwan kọye rhe mu vwẹ ẹdia rẹ esẹ rẹ ovwan na, uvwiẹ rẹ ihwo umwemwu na, rẹ ovwan rhanriẹ ophu rẹ Ọrovwohwo na kpahe Izrẹl!

¹⁵Kidie we de chuko kuo we gbi nene-e, ọ je rhoma chuko ku ayen vwẹ evun rẹ aton na; ovwan ke ghwọrọ ihwo nana ejobi.

¹⁶Etiyin ayen de si kẹrẹ, ayen da ta, Avwanre gba ogba rẹ igegede phihọ etinẹ kẹ igodẹ rẹ avwanre, re ma je bọn irere kẹ imitete rẹ avwanre,

¹⁷ẹkẹvuọvo avwanre ghwẹ ekuakua rẹ ofovwi rẹ avwanre, avwanre je choma vwọ ka obaro kẹ ihwo rẹ Izrẹl, bẹsiẹ ma vwọ reyọ ayen rhi te asan rayen; imitete rẹ avwanre na ke dia irere ra gba ogba riariẹ na fiki rẹ ihwo rẹ otọ na.

¹⁸Avwanre che rhivwi kpo iwevwi rẹ avwanre bẹsiẹ rẹ ihwo rẹ Izrẹl dohwo dẹdia rẹ uku rọye vwọ reyọ nu-u.

¹⁹Kidie avwanre che nene ayen riuku rẹ ẹbẹre rivẹ ri Jọdan na-a ji kugbe abọ oboyi rọye; kidie ẹkẹn uku rẹ avwanre ẹbẹre obonẹ ri Jọdan ọ epha vwẹ obaro ọnre na.

²⁰Etiyin Mosis da ta kẹ ayen, ọ da dianẹ wo ru ọnana, wa da ghwẹ ekuakua rẹ ofovwi rẹ ovwan rẹ ovwan da ka obaro kẹ Ọrovwohwo vwo kpo ofovwi na,

²¹ri kohwo kohwo rọ hwa ekuakua rẹ ofovwi phihọ da wanvrẹn Jọdan na vwẹ obaro rẹ Ọrovwohwo na, bẹsiẹ rọ vwọ djẹ ivwighrẹ rọye ejobi nẹ obaro rọye

²²ru we de phi otọ na kua vwẹ obaro rẹ Ọrovwohwo; we de ru ọyena nu ku we rhivwi yu we sio oma rẹ ovwan nẹ abọ rẹ oghwa rẹ Ọrovwohwo kugbe Izrẹl; otọ nana kọ dia ughwẹ rẹ ovwan vwẹ obaro rẹ Ọrovwohwo.

²³Ẹkẹvuọvo we rhe ru ọtiọye-e, nighere, yu we ru umwemwu kpahe Ọrovwohwo; jo mu we ẹro nẹ umwemwu wẹn ọvo che tu we phia.

²⁴Bọn irere kẹ imitete rẹ ovwan, wa je gba ogba kẹ igodẹ rẹ ovwan; ru we ru obo ru we veri na.

²⁵Emọ ri Gad kugbe emọ ri Rubẹn da ta kẹ Mosis, Idibo wẹn ru kirobo rẹ ọrovwovwe ji urhi na.

²⁶Imitete rẹ avwanre na, eya rẹ avwanre, igodẹ rẹ avwanre na, kugbe irhuẹn rẹ avwanre na, ke dia etinẹ vwẹ evun rẹ irere ri Giliad;

²⁷ẹkẹvuọvo idibo wẹn ke wanvrẹn, dohwo doma rọye chare kẹ ofovwi na, vwẹ obaro rẹ Ọrovwohwo kpo ofovwi na, kirobo rẹ ọrovwovwe ji urhi na.

²⁸Eriyin Mosis de ji urhi kẹ ayen kpahe Ẹlẹazar rẹ orherẹn na, ji te Joshua re omo ri Nọn, ji te igbuyovwi rẹ iwevwi rẹ esẹ rẹ orua rẹ ihwo rẹ Izrẹl na.

²⁹Mosis da ta kẹ ayen, ọ da dianẹ emọ ri Gad kugbe emọ ri Rubẹn, dohwo doma rọye da cha kẹ ofovwi na vwẹ obaro rẹ Ọrovwohwo na, ri de nene ovwan wan Jọdan na vrẹn rẹ ovwan de phi otọ na kua, etiyin ke wa vwẹ otọ ri Giliad vwọ ghare ayen ughwẹ;

³⁰ẹkẹvuọvo ayen rha sa choma rẹ ayen da wanvrẹ-ẹn, kẹ ayen vẹ ovwan ji vwo ughwẹ na kugbe vwẹ otọ ri Kenan na.

³¹Emọ ri Gad kugbe emọ ri Rubẹn da kpahe, kirobo rẹ Ọrovwohwo ta kẹ idibo wẹn na, eriyin avwanre che ru.

³²Avwanre rhuẹrẹ oma re ma wanvrẹn vwẹ obaro rẹ Ọrovwohwo kpo otọ ri Kenan na, ughwẹ kugbe uku rẹ avwanre ke dia abọ oboyi ri Jọdan na.

³³Mosis da vwọ kẹ ayen, emọ ri Gad kugbe emọ ri Rubẹn kugbe abọvo rẹ orua ri Manasse rẹ ọmọ ri Josẹf, uvie ri Sihọn ovie rẹ ihwo rẹ Amọr kugbe uvie rẹ Ọg ovie rẹ Basan, otọ na kugbe irere na vẹ ẹghwa rayen ejobi, irere rẹ otọ rayen na ejobi re kpae.

³⁴Emọ ri Gad da bọn Dibọn, Atarot, Arọẹr,

³⁵Atrot-Shofan, Jazer, Jogbehah,

³⁶Betnimrah, kugbe Bet-haran, irere ra gba ogba riariẹ phihọ, kugbe ogba rẹ igodẹ.

³⁷Emọ ri Rubẹn da bọn Hẹshbọn, Elealeh, Kiriataim,

³⁸Nebo, kugbe Baalmeọn (odẹ rayen e che wene), kugbe Sibmah; ayen de mu edẹ efa kẹ irere rẹ ayen bọnre na.

³⁹Emọ ri Makaya rẹ ọmọ ri Manasse da yanran kpo Giliad ra reyọ, ọ da ghwẹ ekuakua rẹ ihwo rẹ Amọr re dia ejobi reyọ.

⁴⁰Mosis da vwi Giliad ke Makaya rẹ ọmọ ri Manasse, ọ da dia evun rọye.

⁴¹Jair rẹ ọmọ ri Manasse da yanran ra reyọ ẹko rọye ejobi, o de se ayen Havvotjair.

⁴²Nobah da yanran ra reyọ Kenat vẹ ẹko rọye ejobi, o de se Nobah, kirobo rẹ odẹ rọye epha.