Read urhobo Ukeri 34 Bible Online

Ukeri 34 - urhobo bible

Ukeri 34

¹Ọrovwohwo da ta kẹ Mosis,

²Ji urhi kẹ ihwo rẹ Izrẹl, re wọ ta kẹ ayen, ọke ru wọ da ro otọ ri Kenan (ọnana otọ ro che te we rọ dia ẹkẹn uku wẹn, otọ ri Kenan asan ro rho te ejobi),

³obọrhe ọnre wẹn kọ dia abọ rẹ aton ri Zin vwẹ ẹbẹre rẹ Idọm, ughwru wẹn vwẹ obọrhe ọnre ko ne oba rẹ Abadi rẹ Ughweraka rọ obaro ọnre;

⁴ughwru wẹn ko chuko ku obọnrhe ọnre vwẹ asan re de yere kpo Akrabbim, rhe wanvrẹn kpo Zin, oba rọye kọ dia obọnrhe ọnre vwi Kadeshbarnea; rhe wan re te Hazaraddar, rhe wan te Azmọn;

⁵ughwru na kọ rhoma nẹ Azmọn rhe rhi te Ẹtẹrhe rẹ Ijipt, asan rọ bare kẹ Abadi na.

⁶Vwẹ ughwru rẹ obuko ọnre, ku wo vwo Abadi Rode na kugbe erhuru rọye; ọnana kọ dia ughwru wẹn rọ hẹ obuko ọnre.

⁷Ọnana kọ dia ughwru wẹn rẹ obọhwẹre ọnre: nẹ Abadi Rode na etiyin wọ da bẹrẹ usi phihọ re te Ugbenu ri Họr;

⁸rhe nẹ Ugbenu ri Họr ku wọ rha ka oka phihọ re te unu ri Hamat, oba rẹ ughwru na kọ dia Zedad;

⁹ughwru na ko gro te Zifrọn, oba rọye kọ dia Hazarenan: ọnana kọye re dia ughwru rọ obọhwẹre ọnre.

¹⁰Wọ ka oka phihọ ughwru wẹn vwẹ obaro ọnre nẹ Hazarenan re te Shefam;

¹¹ughwru na ko nẹ Shefam re te Riblah vwẹ obaro ọnre vwi Ain; ughwru na kọ yanran rhiri, re te igabọ rẹ abadi ri Chinneret vwẹ obaro ọnre;

¹²ughwru na kọ ghwrọrọ rheotọ re te Jọdan, oba rọye kọ dia asan Abadi rẹ Ughweraka na. Ọnana kọ dia otọ wẹn vẹ ughwru rọye riariẹ.

¹³Mosis de ji urhi kẹ ihwo rẹ Izrẹl, tanẹ, ọnana otọ rẹ Ọrovwohwo tanẹ a vwọ kẹ orua irhiri kugbe abọvo rẹ orua na nẹ wa vwọ riuku utetemute;

¹⁴kidie orua rẹ emọ ri Rubẹn vwẹ uwuwevwi rẹ ọsẹ rayen kugbe orua rẹ emọ ri Gad vwẹ uwuwevwi rẹ ọsẹ rayen da reyọ ẹkẹn uku rayen, ọtiọye rhe ji te ubro rẹ orua ri Manasse;

¹⁵orua na ivẹ na kugbe ubro rayen na reyọ ẹkẹn uku rayen nure vwẹ abọ oboyi ri Jọdan vwi Jeriko vwẹ obaro ọnre, ro hirhe aro ku obo rẹ ọnre da vacha.

¹⁶Ọrovwohwo da ta kẹ Mosis,

¹⁷Enana edẹ rẹ ihwo re cha ghare otọ na kẹ ovwan vwọ riuku na: Ẹlẹaza rẹ orherẹn na kugbe Joshua rẹ ọmọ ri Nọn.

¹⁸Wọ reyọ osun ọvuọvo nẹ orua ọvuọvo rhe, re ghare otọ na re wa vwọ riuku na.

¹⁹Enana keye edẹ rẹ ihwo na: Orua ri Juda, Kalẹb rẹ ọmọ ri Jefunneh.

²⁰Orua rẹ emọ ri Simiọn, Shẹmuẹl rẹ ọmọ rẹ Ammihud.

²¹Vwẹ orua ri Bẹnjamin, Elidad rẹ ọmọ ri Chislon.

²²Vwẹ orua rẹ emọ ri Dan osun ọvo, Bukki rẹ ọmọ ri Jọgli.

²³Vwẹ emọ ri Josẹf: vwẹ orua rẹ emọ ri Manasse osun ọvo, Hanniẹl rẹ ọmọ rẹ Efod.

²⁴Vwẹ orua rẹ emọ rẹ Ifrem osun ọvo, Kemuẹl rẹ ọmọ ri Shiftan.

²⁵Vwẹ orua rẹ emọ ri Zẹbulọn osun ọvo, Elizafan rẹ ọmọ ri Parnach.

²⁶Vwẹ orua rẹ emọ rẹ Isaka osun ọvo, Paltiẹl rẹ ọmọ rẹ Azzan.

²⁷Vwẹ orua rẹ emọ rẹ Asha osun ọvo, Ahihud rẹ ọmọ ri Shẹlomi.

²⁸Vwẹ orua rẹ emọ ri Naftali osun ọvo, Pedahẹl rẹ ọmọ rẹ Ammihud.

²⁹Enana ihwo na rẹ Ọrovwohwo ji urhi kẹ nẹ e ghare uku na vwọ kẹ ihwo rẹ Izrẹl vwẹ otọ ri Kenan.