Read urhobo Ukeri 35 Bible Online

Ukeri 35 - urhobo bible

Ukeri 35

¹Ọrovwohwo na da ta kẹ Mosis vwẹ uphẹphẹ ri Moab vwẹ oma ri Jọdan vwi Jẹriko,

²Ji urhi kẹ ihwo rẹ Izrẹl, nẹ ayen kẹ ihwo ri Livae na, vwẹ ẹkẹn uku rayen na, irere rere ayen dia; ku wọ kẹ ihwo ri Livae na otọ rẹ egbri re riariẹ irere na.

³Irere na ke dia erayen rere ayen dia evun rẹ ayen, otọ rẹ egbri rayen na kọ dia kẹ uchuru rayen irhuẹn rayen kugbe eranvwe rayen.

⁴Egbri rẹ irere na, ru wọ cha vwọ kẹ ihwo ri Livae na, kọ hẹre nẹ igbẹhẹ rẹ orere na re te kubit uriori riariẹ.

⁵Wọ me rha vwanvwe, obuko rẹ orere na, vwẹ obaro ọnre kubit uriọri ivẹ, vwẹ obọrhe ọnre kubit uriori ivẹ, vwẹ obuko ọnre kubit uriori ivẹ, vwẹ obọhwẹre ọnre kubit uriori ivẹ, orere na kẹ uherevie ọ dia; ọnana kọ dia otọ rẹ egbri ro te ayen vwẹ irere rayen na.

⁶Irere ru wọ vwọ kẹ ihwo ri Livae na ke cha dia irere esan rẹ a djẹrhọ, asan ra rhọvwe kẹ ohwo rẹ obọ chọre nọ djẹ ra, me cha vwẹ irere ujuvẹ gbe ivẹ vwọ ba.

⁷Irere ru wọ cha vwọ kẹ ihwo ri Livae ke dia ujuvẹ gbe erẹnrẹn, kugbe egbri rayen.

⁸Vwọ kẹ irere ru wo che siobọ nu vwẹ ẹkẹn rẹ ihwo rẹ Izrẹl na, orua rọ rhoro wo mi si ọrhuarho no, orua rọ hanvwere wo mi si otutuno; ọvuọvo kirobo rẹ uku rọye rho te, kẹ ọtiọye o siobọ nu kẹ irere rẹ ihwo ri Livae.

⁹Ọrovwohwo da ta kẹ Mosis,

¹⁰Ta kẹ ihwo rẹ Izrẹl, ọke wọ da wanvrẹn Jọdan kpo otọ ri Kenan,

¹¹ku wọ sanọ irere ra djẹrhọ kẹ oma wẹn, rere ohwo rẹ obọ chọre hwe ohwo vwọ djẹ kpo etiyin.

¹²Irere na ke dia asan ra djẹrhọ nẹ obọ rẹ ọreihri, rere ọ rẹ obọ chọre vwọ je ghwo bẹsiẹ ro vwo mudia vwẹ obaro rẹ ukoko na vwẹ ẹdjeguo.

¹³Irere ru wo che phi otọ na ke dia irere esan rẹ adjẹrhọ kẹ wẹ.

¹⁴Wọ vwẹ irere erha vwọ kẹ abọ oboyi ri Jọdan, kugbe irere erha vwẹ evun rẹ otọ ri Kenan, ke dia irere ra djẹrhọ.

¹⁵Irere nana esan na ke dia asan ra djẹrhọ vwọ kẹ ihwo rẹ Izrẹl, kugbe ọrhorha vẹ ọyoyan vwẹ uherevie rẹ ayen, rere kohwo kohwo ro hwe ohwo ọ dianẹ kẹ uvumwẹmwu-u vwọ mrasan djẹ kpo etiyin.

¹⁶Ẹkẹvuọvo ọ da vwẹ utehru ghwiẹ, ro de ghwu, ozighẹ kọye o ruẹ; ozighẹ na ka teyọ hwe.

¹⁷Ọ da vwẹ oragha vwọ ghwiẹ she, rọ da dia oravwọ ro se hwe ohwo, ro de ghwu, ohwo yena kẹ ozighẹ; ozighẹ na ka teyọ hwe.

¹⁸Eyẹ ọ da dianẹ ọ yọnrọn urhe vwẹ obọ vwọ ghwiẹ ohwo, ọ tiẹ urhe ro se hwe ohwo, ro de ghwu, ozighẹ ọye o ruẹ; ozighẹ na ke hwe ghwu.

¹⁹Ọreihri rẹ ọbara na ọvo re vwẹ obọ rọye hwe ozighẹ na; ọke rọ da vwa, ko hwe ghwu.

²⁰Ọ da dianẹ eghrẹ o vwo duvwo hwe, eyẹ ọ họrhọ ruọ, ro de fiọnko hẹrhẹ, ro de hwe ghwu,

²¹eyẹrẹ vwẹ eghrẹ ọ da vwẹ ubi vwọ ghwiẹ, ro de ghwu, ọtiọye na ohwo rọ ghwiẹ ubi na ke hwe; ozighẹ o ruẹ; Ọreihri rẹ ọbara na ko hwe ozighẹ na, vwẹ ọke rọ da vwa.

²²Ẹkẹvuọvo ọ da dianẹ o duvwuro kpregede rọ dianẹ kẹ eghrẹ-ẹ, rọ da vwẹ oravwọ vwo phio ọ dianẹ ko fiọnko hẹrhẹ-ẹ,

²³eyẹ oragha e vwo phio, ọ tiẹ oragha ro se hwe ohwo, rọ mrẹrẹ tavwe ro ki phio-o, ro de ghwu, dede na yọ dia ovweghrẹ rọye-e, yọ dianẹ ọ guọnerọ hwe-e,

²⁴etiyin ukoko na ke vwẹ ọ rẹ obọ chọre na kugbe ọreihri rẹ ọbara na vwo guẹdjọ, kirobo rẹ urhi na epha;

²⁵ukoko na ko sivwi ọ rẹ obọ chọre na nẹ obọ rẹ ọreihri rẹ ọbara, ukoko na ko vwo rhivwi kpo orere ra djẹrhọ na, rọ djẹ ra jovwo na, kọ dia evun rọye bẹsiẹ rẹ orherẹn rode ra vwẹ evwri ọfuanfon ghworo uyovwi vwo ghwu.

²⁶Ẹkẹvuọvo ọ da dianẹ ọ rẹ obọ chọre na gbe uvwrogho rọ da shariẹ ughwru rẹ orere ra djẹrhọ na rọ djẹ ra jovwo na,

²⁷rẹ ọreihri rẹ ọbara na da mrẹ vwẹ otafe rẹ ughwru rẹ orere ra djẹrhọ na, rẹ ọreihri rẹ ọbara na de hwe ọ rẹ obọ chọre na, ọ sa re abe rẹ ọbara na-a.

²⁸Kidie ohwo na evun rẹ orere ra djẹrhọ na ọye ọ dia bẹsiẹ rẹ orherẹn rode na vwo ghwu; ẹkẹvuọvo orherẹn rode na de ghwu nu ohwo rẹ obọ chọre se rhivwi kpo otọ rẹ ẹkẹn uku rọye.

²⁹Imu nana ke dia iji kugbe irhi vwẹ uvwiẹ rẹ ovwan ejobi vwẹ evun rẹ asan re wa dia.

³⁰Ọ da dianẹ ohwo ọvo hwẹ ohwo, ke hwe ozighẹ na siẹrẹ e de se oseri kpahọ; ẹkẹvuọvo a sa teye ohwo hwe vwẹ oseri rẹ ohwo ọvuọvo-o.

³¹Ọ rọ marho wo jẹn a tan ozighẹ rọ re abe rẹ ughwu-u; ẹkẹvuọvo ka teyọ hwe.

³²Wo jẹn a tan ohwo rọ djẹ kpo orere ra djẹrhọ na-a, rere ọ vwọ rhivwi ra dia otọ na bẹsiẹ rẹ orherẹn rode na vwo ghwu.

³³Wọ vwẹ ọtiọna gbe otọ ru wọ dia na ẹgua-a; kidie ọbara e vwo gbe otọ na ẹgua, o vwo emu ọvuọvo re vwo phorho otọ na-a, fiki rẹ ọbara re sun te na, jokpa nẹ ọbara rẹ ohwo na rẹ obọ chọre na.

³⁴Wo gbe otọ na ru wọ dia na ẹgua-a, vwẹ uherevie rẹ otọ rẹ ekpuyovwi me dia na; kidie mẹvwẹ Ọrovwohwo dia uherevie rẹ ihwo rẹ Izrẹl.