Read urhobo Ukeri 36 Bible Online

Ukeri 36 - urhobo bible

Ukeri 36

¹Igbuyovwi rẹ uwevwi rẹ esẹ rẹ uvwiẹ rẹ emọ ri Giliad rẹ ọmọ ri Makai rẹ ọmọ ri Manasse, ọ rẹ uwevwi rẹ esẹ rẹ emọ ri Josẹf, de si kẹrẹ ayen da ta ota kẹ Mosis, vwẹ obaro rẹ isun na, igbuyovwi rẹ uwevwi rẹ esẹ rẹ ihwo rẹ Izrẹl;

²ayen da ta, Ọrovwohwo na ri ji urhi kẹ ọrovwovwe nẹ ọ vwẹ otọ na ghare uku utetemute kẹ ihwo rẹ Izrẹl; Ọrovwohwo de ji urhi kẹ ọrovwovwe nẹ ọ vwẹ ẹkẹn uku ri Zelofehad oniọvo rẹ avwanre vwọ kẹ emetẹ rọye.

³Ẹkẹvuọvo a da vwẹ ayen brọgọ kẹ emọ rẹ orua ọfa rẹ ihwo rẹ Izrẹl na ẹkẹn uku rayen ka cha reyọ nẹ ẹkẹn uku rẹ esẹ rẹ avwanre, ka vwọ ba ẹkẹn uku rẹ orua rẹ ayen de kpo orọvwe na; ke sionu ẹkẹn uku rẹ avwanre.

⁴Ọke rẹ ukpe rẹ orẹ rẹ ihwo rẹ Izrẹl de te, etiyin ka cha vwẹ ẹkẹn uku rayen na ba uku rẹ orua rẹ ayen de kpo orọvwe na; uku rayen ka reyọ nẹ uku rẹ orua rẹ ọsẹ rẹ avwanre,

⁵Mosis de ji urhi kẹ ihwo rẹ Izrẹl kirobo rẹ ota rẹ Ọrovwohwo epha, tanẹ Obo rẹ orua rẹ emọ ri Josẹf tare na gbare.

⁶Ọnana urhi rẹ Ọrovwohwo jiri kpahe emetẹ ri Zelofehad, Jẹn ayen rọvwọ ohwo ro me je ayen; ọ me dia evun rẹ orua rẹ ọsẹ rayen na ọvo ayen da rọvwọ.

⁷E rhe se mu uku rẹ orua rẹ ihwo rẹ Izrẹl ọvo vwo kpo orua ọfa-a; kohwo kohwo rẹ Izrẹl na ejobi kọ gba oma mu uku rẹ orua rẹ ọsẹ rọye.

⁸Kọmọtẹ kọmọtẹ ro vwo uku vwẹ orua ọvo rẹ ihwo rẹ Izrẹl na kọ rọvwọ ohwo ọvo vwẹ evun rẹ uvwiẹ rẹ orua rẹ ọsẹ rọye, rere kohwo kohwo vwẹ Izrẹl na se vwo vwo ẹkẹn uku rẹ ọsẹ rọye.

⁹Ọtiọye na a rha sa ghwa uku nẹ orua ọvo kpo orua ọfa-a; kidie korua korua rẹ ihwo rẹ Izrẹl na ke gba oma mu ẹkẹ uku rọye.

¹⁰Emetẹ rẹ Zelofehad de ru kirobo rẹ Ọrovwohwo ji urhi kẹ Mosis,

¹¹kidie Mahlah, Tirzah, Hoglah, Milkah, kugbe Noah, rẹ emetẹ ri Zelofehad, da rọvwọ emọ rẹ iniọvo rẹ ọsẹ rayen.

¹²Ayen da rọvwọ vwẹ evun rẹ uvwiẹ rẹ emọ ri Manasse rẹ ọmọ ri Josef, ẹkẹ uku rayen da daji evun rẹ orua rẹ ọsẹ rayen na.

¹³Enana keye irhi kugbe iji rẹ Ọrovwohwo ji kẹ Mosis no ji kẹ ihwo rẹ Izrẹl vwẹ uphẹphẹ ri Moab vwẹ oma ri Jọdan vwi Jeriko.