Read urhobo Ukeri 5 Bible Online

Ukeri 5 - urhobo bible

Ukeri 5

¹Ọrovwohwo da ta kẹ Mosis;

²Ta kẹ ihwo rẹ Izrẹl nẹ ayen si ọhọnvwoti kọhọnvwoti, kugbe kohwo kohwo rẹ ọbara hwẹ nẹ oma cha, kugbe kohwo kohwo ejobi ro gbe ẹgua nẹ evun rẹ erhọn na; fikiridie ọ vwẹ oma te orivwi.

³Wo si te ọshare te aye nẹ evun rẹ erhọn na rere ayen vwo je erhọn na emiovwo, vwẹ uherevie rẹ asan re me dia na.

⁴Ihwo rẹ Izrẹl na de ghine ru ọtiọye, ayen da djẹ ihwo na nẹ evun rẹ erhọn na, kirobo rẹ Ọrovwohwo ta kẹ Mosis, ọtiọye ihwo rẹ Izrẹl ruru.

⁵Ọrovwohwo da ta kẹ Mosis,

⁶Ta kẹ ihwo rẹ Izrẹl nẹ, ọke rẹ ọshare yẹrẹ aye de ru umwemwu rẹ ihwo ruẹ siẹ rẹ ayen de miovwo urhi rẹ esegbuyota rẹ Ọrovwohwo rẹ ohwo yena da re abe,

⁷kọ fan umwemwu rọye ro ruru na; kọ hwa osa rẹ obo ro ru chọ na, ọ me vwẹ akoiyori vwọ ba, ọ me vwọ ba kẹ ohwo ro ru chọ na.

⁸Ẹkẹvuọvo ohwo na rhe vwo omoni ra rhan emu rẹ orucho na kẹ-ẹ, emu rẹ oruehọ na ra cha rhan rhivwi na, ka rhan kẹ Ọrovwohwo ra vwọ kẹ orherẹn, ra vwẹ egbo rẹ arhuẹrẹ vwọ ba kọye a vwọ rhuẹrẹ vwọ kẹ.

⁹Kizobo kizobo ejobi, emu ọfuanfon ejobi rẹ ihwo rẹ Izrẹl, reyọ vwo rhe orherẹn, kọ dia ọrọye.

¹⁰Kohwo kohwo ro vwo emu ọfuanfon ejobi kọ dia ọrọye; kemu kemu ejobi rẹ ohwo vwọ kẹ orherẹn kọ dia ọrọye.

¹¹Ọrovwohwo da ta kẹ Mosis,

¹²Ta kẹ ihwo rẹ Izrẹl, ọ da dianẹ aye rẹ ohwo yan ghwru ro de gbe ọfanrhiẹn rhurho,

¹³ọ da dianẹ ohwo ọfa duro, rọ da djahọ kẹ ọshare rọye, yẹn a je mrẹ otọ rọye dede na yo miovwi oma rọye nure, yẹn a mrẹ ohwo ro se oseri muo-o, fikiridie ọ vabọ.

¹⁴Ọ da dianẹ erhi rẹ omẹriọ da ro ọshare rọye oma; rọ da rioma kpahe aye rọye na ro miovwo oma rọye na; eyẹ ọ da dianẹ erhi rẹ omẹriọ de bro rhe, rọ da rioma kpahe aye rọye, dede na yo ji miovwo oma rọye-e na;

¹⁵ọke yena ọshare na kọ reyọ aye na vwo rhe orherẹn ọ me reyọ izobo ra guọnọ vwẹ obọ rọye rhe, ẹkẹn ihwe rẹ iputusẹ rẹ ọka ri bali; o ku ọfigbo phihọ-ọ, o ji phi adjidja phihọ-ọ, fikiridie ọye izobo rẹ ọka rẹ omẹriọ, izobo rẹ ọka rẹ ẹkarohọ rọ nẹrhẹ a karohọ imwemwu.

¹⁶Ọke yena orherẹn na ko sio kẹrẹ oma, o mi muo phihọ obaro rẹ Ọrovwohwo;

¹⁷orherẹn na kọ reyọ ame ọfuanfon phihọ ẹvwẹrẹ, kọ ghwẹ ekpẹn rẹ utuwevwi rẹ ọgarivi na o mi phio phihọ evun rẹ ame na.

¹⁸Orherẹn na ko phi aye na phihọ obaro rẹ Ọrovwohwo na, ọ me rhan ẹto rẹ uyovwi rẹ aye na, o mi mu izobo rẹ ọka rẹ ẹkaroho na phihọ obọ rọye, kọye izobo rẹ ọka rẹ omẹriọ na. Orherẹn na mi rhe mu ame phihọ obọ rọye kọye ame rọ yara korokoro rọ ghwẹ ekan yan.

¹⁹Etiyin orherẹn na ko vwo duvwu iyori, tanẹ, ọ da dianẹ ọshare ọfa vẹ owẹ mroma, ọ da dianẹ wo gbe owọ phihọ aghwa vwo ru emu rẹ ẹgua, vwẹ ọke ru wọ vwọ otọ rẹ ogangan rẹ ọshare wẹn na, gbe jẹn ame nana rọ yara korokoro rọ ghwẹ ekan yan na rhiẹ wẹ.

²⁰Ẹkẹvuọvo wo de gbe owọ phihọ aghwa, dede na ye wọ otọ rẹ ogangan rẹ ọshare wẹn na, ọ da dianẹ wo gbe oma wẹn ẹgua-a, rẹ ohwo ọfa rọ dia ọshare wẹ-ẹn de nene uwe ru emu,

²¹etiyin, (gbe jẹn orherẹn na vwẹ aye na duvwu iyori rẹ ekan na, re ọ ta kẹ aye na) Ọrovwohwo na ru we phihọ isọn kugbe iyori vwẹ ohri rẹ ihwo wẹn, vwẹ ọke rẹ Ọrovwohwo na da kpare owọ wẹn nu we ro de ru ekroma wẹn vwọ;

²²gbe jẹn ame nana rọ ghwẹ ekan cha na su ame vọn we evun rọ nẹrhẹ oma wẹn vwọ rere ekpoghowọ wẹn kpare nẹ uwe oma. Aye na kọ ta, Isẹ, Isẹ.

²³Ọrherẹn na mi re si ekan nana phihọ ẹbe rẹ ekan na, ọ me hworhẹ ayen phihọ ame rọ yara korokoro na;

²⁴kọ vwẹ ame rọ yara korokoro na rọ ghwẹ ekan cha na vwọ kẹ aye na da. Ame na rọ ghwẹ ekan cha na kọ ro evun rọye kọ miavwọ gangan.

²⁵Ọrherẹn na me reyọ izobo rẹ ọka rẹ omẹriọ nẹ obọ rẹ aye na, kọ kpogho izobo rẹ ọka na vwẹ obaro rẹ Ọrovwohwo na ro ki muo rhe enu rẹ agbada na;

²⁶orherẹn na me ghwẹ ẹkuobọ rẹ izobo rẹ ọka na; rọ dia ẹkẹn rẹ ẹkarohọ, ọ me torhẹ vwẹ enu rẹ agbada na, o de ru nu ọ me rha vwẹ ame na kẹ aye na da.

²⁷Ọke rọ da vwẹ ame na kẹ da nure, etiyin, ọ da dianẹ o gbe oma rọye ẹgua rọ de gbe ọfanrhiẹn rhurhu ọshare rọye, ame rọ ghwẹ ekan cha na kọ ro evun rẹ oma rọye kọ miavwọ gangan, oma roye kọ vwọ ekpoghowọ rọye kọ kpare she kufia, aye na ko che hirhe phihọ isọn vwẹ uherevie rẹ ihwo rọye.

²⁸Ẹkẹvuọvo aye na rhe gbe oma rọye ẹgua-a rọ da fon, kọ dia phrẹrẹ kọ sa mrevun ro de vwiẹ emọ.

²⁹Ọnana kọye urhi rẹ omẹriọ, rọ da dianẹ aye, rọ otọ rẹ ogangan rẹ ọshare, o de dje owọ phihọ aghwa ro de gbe oma rọye ẹgua,

³⁰eyẹ vwẹ ọke rẹ erhi rẹ omẹriọ de bru ọshare na rhe rọ da rioma kpahe aye rọye; etiyin ko phi aye na phihọ obaro rẹ Ọrovwohwo na, orherẹn na kọ vwẹ urhi nana ejobi vwo muo.

³¹Oshare na kọ vabọ rẹ orukuruku nana phrẹrẹ, ẹkẹvuọvo aye na kọ ghwa oghwa rẹ orukuruku rọye.