Read urhobo Ukeri 8 Bible Online

Ukeri 8 - urhobo bible

Ukeri 8

¹Asakiephana Ọrovwohwo da ta kẹ Mosis,

²Ta kẹ Erọn, vwẹ ọke ru wọ da vwẹ irhukpẹ na mu nure, irhukpẹ ighwrẹn na ke vwẹ orẹmrẹ phia vwẹ obaro rẹ ogburhukpẹ na.

³Erọn de ru ọtiọye; ọda vwẹ irhukpẹ na mu re e vwẹ orẹmrẹ phia vwẹ obaro rẹ ogburhukpẹ na, kirobo rẹ Ọrovwohwo ta kẹ Mosis.

⁴Ke enẹ e ru ogburhukpẹ na, oro re duvwuru; nẹ obotọ re te idodo rọye, a nabọ duvwo; kerẹ ona rẹ Ọrovwohwo dje kẹ Mosis; ọtiọye o ru ogburhukpẹ na.

⁵Ọrovwohwo da ta kẹ Mosis,

⁶Reyọ ihwo ri Livae nẹ uherevie rẹ ihwo rẹ Izrẹl rere wo ru ayen fon.

⁷Enẹ wo ru kẹ ayen, re vwo ru ayen fon: fẹrẹ ame rẹ ephorho ku ayen, re ayen vwẹ anre wanre oma rayen ejobi, re ayen fọnrhọ emwa rayen kugbe rere ayen je họ oma rayen.

⁸Gbe jẹn ayen reyọ upene rẹ erhuẹn ọshare kugbe izobo rẹ ọka rẹ omamọ rẹ eyagha rẹ ọka ra vwẹ evwri gua kugbe, wọ me je reyọ upene rẹ erhuẹn ọshare ọfa re vwo ze izobo rẹ umwemwu.

⁹Ku wọ vwẹ ihwo ri Livae na vwọ rhe utughẹ ra da vwa oma na, re wo ghwẹ ukoko rẹ ihwo rẹ Izrẹl na ejobi koko.

¹⁰Ọke wọ da vwi Livae na vwọ phia kẹ Ọrovwohwo na, ihwo rẹ Izrẹl na ejobi ke ghwẹ abọ rayen kpahe ihwo ri Livae na,

¹¹Erọn kọ vwẹ ihwo ri Livae na ze kẹ Ọrovwohwo rere ọ dia izobo rẹ ekpogho ro nẹ obọ rẹ ihwo rẹ Izrẹl na rhe, rere ọ vwọ dia ẹkẹn iruo rayen rẹ ayen ru kẹ Ọrovwohwo.

¹²Ihwo ri Livae na ke ghwẹ abọ rayen kpahe iyovwi rẹ irhuẹn eshare na; ko wọ vwẹ ọvo ze izobo rẹ umwemwu ọ ro chekọ kẹ izobo rẹ ẹtorhẹ kẹ Ọrovwohwo, rere a vwọ gọ ẹgua nẹ ihwo ri Livae na.

¹³Ihwo ri Livae na ki gbe odibo kẹ Erọn vẹ emọ rọye, ka vwẹ ayen ze izobo rẹ ekpogho kẹ Ọrovwohwo.

¹⁴Ke enẹ wọ hẹriẹ ihwo ri Livae na nẹ ohri rẹ ihwo rẹ Izrẹl, ihwo ri Livae na ke dia emẹ.

¹⁵Ọye na de re nu ihwo ri Livae na ke yanran ra ro evun rẹ utughẹ ra da vwa oma na re ru iruo vwẹ evun rọye, vwẹ ọke ru wo de ru ayen fon nu wọ da vwẹ ayen ze izobo rẹ ekpogho nu.

¹⁶Kidie a vwẹ ayen ejobi tototo vwọ kẹ vwẹ nẹ ohri rẹ ihwo rẹ Izrẹl ejobi nure, vwẹ ẹdia rẹ ihwo re bẹrẹ urhoro rẹ ini rayen, emekpako rẹ ihwo rẹ Izrẹl ejobi me reyọ ayen vwo kẹ oma mẹ.

¹⁷Kidie emekpako rẹ ohri rẹ ihwo rẹ Izrẹl na ejobi emẹ te e rẹ eranvwe eyẹ te re ihwo; vwẹ ẹdẹ mi vwo hwe emekpako vwẹ otọ rẹ Ijipt na, mi vwo ru ayen fon vwọ kẹ oma mẹ,

¹⁸kọye me da reyọ ihwo ri Livae vwẹ ẹdia re emekpako na vwẹ ohri rẹ ihwo rẹ Izrẹl.

¹⁹Me da vwẹ ihwo ri Livae na vwo ru ẹse kẹ Erọn vẹ emọ rọye vwo nẹ ohri rẹ ihwo rẹ Izrẹl na, rere ayen gbe odibo kẹ ihwo rẹ Izrẹl vwẹ utughẹ ra da vwa oma na, rere a vwọ gọ ẹgua nẹ ihwo rẹ Izrẹl oma, rere emiavwe vwo jẹ ohri rẹ Izrẹl na ẹvwẹriẹ a riẹn ọke rẹ ihwo rẹ Izrẹl na de rhi si kẹrẹ ẹshẹ na.

²⁰Kenẹ Mosis kugbe Erọn vẹ ukoko rẹ ihwo rẹ Izrẹl ruru kẹ ihwo ri Livae na; kirobo rẹ Ọrovwohwo ji urhi kẹ Mosis kpahe ihwo ri Livae, ihwo rẹ Izrẹl de ru ọtiọye kẹ ayen.

²¹Ihwo ri Livae na de ru oma rayen fon nẹ umwemwu, ayen da fọnrhọn emwa rayen, Erọn da vwẹ ayen ze izobo rẹ ekpogho kẹ Ọrovwohwo, Erọn da gọ ẹgua nẹ ayen re e vwo ru ayen fon.

²²Rẹ ena vwo ru ni ihwo ri Livae na da yanran re ru iruo rayen vwẹ evun rẹ utughẹ ra da vwa oma na re gbe odibo kẹ Erọn vẹ emọ rọye; kirobo rẹ Ọrovwohwo ji urhi kẹ Mosis kpahe ihwo ri Livae na, ọtiọye kọye e ru kẹ ayen.

²³Ọrovwohwo na da ta kẹ Mosis,

²⁴Ọnana ọye cha dia ẹkẹn ute rẹ ihwo ri Livae: nẹ ikpe uje gbe iyori kpenu kẹ ayen se ru iruo vwẹ evun rẹ utughẹ ra da vwa oma na;

²⁵nẹ ikpe ujuvẹ gbẹ ihwe kpenu ke ayen kpo omaerovwo nẹ iruo rayen ayen gbi gbe odibo ọfa-a,

²⁶ẹkẹvuọvo kẹ ayen gbe odibo kẹ imoni rayen vwẹ evun rẹ utughẹ ra da vwa oma na, re ayen vwẹ ẹro te, kugbe rere ayen vwo jẹ owian ẹwian. Enẹ kọye wo ru kẹ ihwo ri Livae na vwẹ okoka rẹ iruo rayen ru.