Read urhobo Ukeri 9 Bible Online

Ukeri 9 - urhobo bible

Ukeri 9

¹Ọrovwohwo da ta ota kẹ Mosis vwẹ evun rẹ aton ri Sinae, vwẹ emeranvwe rẹ ẹsosuọ vwẹ ukpe rivẹ, ọke rẹ ayen vwo vrẹn nẹ otọ rẹ Ijipt rhe, tane,

²E jẹn ihwo rẹ Izrẹl re orẹ rẹ ẹwanvrẹn na, vwẹ ọke re bru phihọ otọ kẹ.

³Vwẹ ẹdẹ ihwẹne rẹ emeranvwe nana, vwẹ ọke ro ovwọnvwọn, ọye wọ vwọ re orẹ na vwẹ ọke re vwo ruo jovwo na; kirobo rẹ irhi kugbe iji rọye epha, ku wọ sẹro rọye.

⁴Kọye Mosis da ta kẹ ihwo rẹ Izrẹl ejobi tanẹ ayen re orẹ rẹ ẹwanvrẹn na.

⁵Ayen da re orẹ rẹ ẹwanvrẹn na vwẹ emeranvwe rẹ ẹsosuọ, vwẹ ẹdẹ ihwẹne rẹ emeranvwe na vwẹ ọke rẹ ovwọnvwọn vwẹ evun rẹ aton ri Sinae kirobo rẹ Ọrovwohwo ta kẹ Mosis, ọtiọye ihwo rẹ Izrẹl ruru.

⁶Eshare evo herọ vwẹ uherevie rẹ ayen rẹ oma rẹ ayen jẹfuọn, ena da dia ihwo re vwẹ obọ te orivwi rẹ ọshare ọvo, ihwo nana rha re orẹ rẹ ẹwanvrẹn na vwẹ ẹdẹ yena-a, ayen da rhe obaro ri Mosis vẹ Erọn vwẹ ẹdẹ yena;

⁷eshare na da te kẹ, oma rẹ avwanre fonro-o fiki rẹ obo rẹ avwanre vwọ vwẹ obọ te orivwi rẹ ọshare ọvo; kidie sorọ rẹ avwanre vwo jẹ izobo rẹ Ọrovwohwo e ze vwẹ ọke rẹ ihwo rẹ Izrẹl bru phihọ?

⁸Etiyin Mosis da ta kẹ ayen nẹ, Hẹrhẹ, rere mi nyo obo rẹ Ọrovwohwo cha ta vwọ kpahe owẹ.

⁹Ọrovwohwo na da ta kẹ Mosis,

¹⁰Ta kẹ ihwo rẹ Izrẹl, ọ da dianẹ ohwo ọvo vwẹ uherevie rẹ ovwan, yẹrẹ uvwiẹ rẹ ovwan na rẹ oma rọye jẹfuọn fikiridie ọ vwẹ obọ te orivwi, eyẹ ọ da hẹ ogboko fiki rẹ oyan rọ rare, ọ je sa re orẹ re ẹwanvrẹn na kẹ Ọrovwohwo.

¹¹Vwẹ emeranvwe rivẹ, vwẹ ẹdẹ ihwẹne, vwẹ ọke rẹ ovwọnvwọn ọye a vwọ riọ; ayen ke riọ vẹ ikara ro jephuo kugbe ẹbe re yara.

¹²Ayen re emerha rọye chekọ re te irhiọke-e ji vwirhi ubeku rọye-e; kirobo rẹ urhi rẹ ẹwanvrẹn epha ọtiọye ovwan yọnrọn.

¹³Ẹkẹvuọvo ohwo rẹ oma rọye fonro rẹ ọ dianẹ o kpo oya-an, ro de sioma nu kẹ orẹ rẹ ẹwanvrẹn na, ohwo yena e sionẹ uherevie rẹ ihwo rọye; fikiridie o ze izobo rẹ Ọrovwohwo vwẹ ọke re bru kẹ-ẹ, ohwo yena ọvo kọ ghwa oghwa rẹ umwemwu rọye.

¹⁴Ọ da dianẹ ọrhorha da rhe uherevie rẹ ovwan, rọ da guọnọ re ọrẹ rẹ ẹwanvrẹn na vwọ kẹ Ọrovwohwo, kirobo rẹ iji rẹ owanvrẹn na epha, kirobo rẹ urhi rọye epha, ọtiọye ọ dia vwọ kẹ ọrhorha vẹ ọmotọ.

¹⁵Vwẹ ẹdẹ ra vwẹ ọgarivi na vi, egho de mu riariẹ ọgarivi na, utughẹ rẹ iseri na; vwẹ ọke rẹ ovwọnvwọn ọ da hẹ enu rẹ ọgarivi na kerẹ erhanre rhiri re te urhiọke.

¹⁶Ọtiọye kọye ọ epha kẹdẹ kẹdẹ; egho na mi rhurho vwẹ oghẹruvo, uhoho rẹ erhanre na vwẹ ason.

¹⁷Ọke rẹ egho na de nẹ enu rẹ utughẹ na re, ihwo rẹ Izrẹl ki mu oyan, asan rẹ egho na de mudia etiyin kọye ihwo rẹ Izrẹl na mu erhọn phihọ.

¹⁸Ọke rẹ Ọrovwohwo de ji urhi ihwo rẹ Izrẹl ki mu oyan, vwẹ urhi rẹ Ọrovwohwo kẹ ayen mu erhọn; uche ọke rẹ egho na mudia vwẹ enu rẹ ọgarivi na krite, evun rẹ erhọn na kọye ayen dia.

¹⁹Ọ da tobọ dianẹ egho na de mu vwẹ enu rẹ ọgarivi na vwẹ ẹdẹ buebu, ihwo rẹ Izrẹl na da yọnrọn urhi rẹ Ọrovwohwo na, ayen gbi mu oya-an.

²⁰Ọke ọvo egho na mi mu vwẹ ẹmẹdẹ krẹ vwẹ enu rẹ ọgarivi na, kirobo rẹ urhi rẹ Ọrovwohwo ta kẹ ayen me dia evun rẹ erhọn na; kirobo rẹ urhi rẹ Ọrovwohwo ta kẹ ayen, ayen mi rhe mu oyan.

²¹Ọke ọvo egho na mi mu nẹ ovwọnvwọn re te irhiọke, ọke rọ da reyọ egho na kpenu vwẹ irhiọke, ayen ki mu oyan, ọ da dia ọtiọye ason ọvo kugbe uvo ọvo, vwẹ ọke rẹ egho na de si kpenu, ayen ki mu oyan.

²²Owenẹ ẹdẹ ivẹ, eyẹrẹ emeranvwe ọvo, eyẹrẹ ọke okrekri, ọye egho na dia enu rẹ ọgarivi na, ro de mudje etiyin rẹ Izrẹl ke dia evun rẹ erhọn na, ayen gbi mu oya-an; ẹkẹvuọvo ọke ra da reyọ kpenu ayen ki mu oyan.

²³Vwẹ urhi rẹ Ọrovwohwo na ayen ki mu erhọn, vwẹ urhi rẹ Ọrovwohwo na ayen ki mu oyan; ayen da sẹro rẹ urhi rẹ Ọrovwohwo vwẹ oma rẹ urhi rẹ Ọrovwohwo vwọ kẹ Mosis.