Read urhobo Maika 3 Bible Online

Maika 3 - urhobo bible

Maika 3

¹Me da ta: Nyo, igbuyovwi ri Jekọp kugbe isun rẹ uwevwi rẹ Izrẹl O ji te ọke rẹ ovwan vwọ riẹn ọsoso-o?

²Ovwan ri tuoma rẹ emu esiri wa da guọnọ umwemwu, re bọrọ ophiẹn rẹ ihwo mẹ, re kpanọ uvwo nẹ ibeku rayen;

³re ria uvwo rẹ ihwo mẹ, re jẹ ophiẹn nẹ ayen oma ri vwirhi ibeku rayen ibribro, re nyavwe ayen krẹkrẹ kerẹ ivwo ra ghwẹ kuphihọ itaso, kerẹ ubro rẹ eranvwe vwẹ ukodo.

⁴Etiyin kẹ ayen che kperi se Ọrovwohwo ẹkẹvuọvo yọ cha kpahe kẹ aye-en; ko si opharo rọye nu kẹ ayen vwẹ ọke yena, fikiridie uruemu rayen pha miomiovwi.

⁵E nẹ Ọrovwohwo ta kpahe emraro na ri suẹn ihwo mẹ ghwrẹ na, ri kperẹ, Ufuoma yẹ ayen vwo emuọvo rẹ ayen ria-a, ẹkẹvuọvo yẹ ayen vwẹ ofovwi suọ ohwo ro phi emuọvo phihọ unu raye-en.

⁶Fiki rẹ ọtiọye na kọ cha dia ason kẹ wẹ, o rhe vwo emramrẹ-ẹ, ke ebri kẹ wẹ, o rhe vwo epha ẹbọ-ọ. Ọnre na che she ghene emraro na, ọke na ko che bi vwẹ enu rẹ ayen;

⁷emrẹ na ka cha phọphọ ayen, otu re bọ epha oma kọ vo ayen; ayen ki che rhurhu ẹbẹrunu rayen, kidie ayen cha mrẹ ẹkpahọ nẹ obọ rẹ Ọghẹnẹ rhe-e.

⁸Ẹkẹvuọvo vwọ kẹ vwẹ, evun mẹ vọnre vẹ ogangan, vẹ erhi rẹ Ọrovwohwo na, vẹ ọsoso vẹ ẹgba, mi che vwo ghwoghwo ogbeku ri Jekọp kẹ kugbe umwemwu rẹ Izrẹl kẹ.

⁹Nyo ọnana, ovwan igbuyovwi rẹ uwevwi ri Jekọp kugbe isun rẹ uwevwi rẹ Izrẹl, rẹ ọsoso tuoma na ri kuẹ uyota ejobi rhẹriẹ,

¹⁰re vwẹ ọbara bọn Zayọn re vwẹ oruchọ bọn Jerusalẹm.

¹¹Igbuyovwi rọye da udi tavwe ri ki brorhiẹ, irherẹn rọye yono fiki rẹ osa, emraro na hẹrhẹ igho re ke mraro, ye ayen vwẹ oma kpahe Ọrovwohwo ayen me ta, Ọrovwohwo na he uherevie rẹ avwanre-e? Emu umwemwu ọvuọvo che te avwanre oma-a.

¹²Vwẹ ọtiọye na fiki wẹ ka cha vwi Zayọn voro udju, Jerusalẹm ko che hirhe phihọ ẹkuerhurhu, Ugbenu rẹ uwevwi na kẹ egbo rẹ irhe.