Read urhobo Maika 5 Bible Online

Maika 5 - urhobo bible

Maika 5

¹Asakiephana e mu ogba rẹ ekpẹn riariẹ owẹ phihọ a gba ohẹrhẹ riariẹ avwanre phihọ ukpokpo kọye ayen vwọ fa ọhwa rẹ isun rẹ Izrẹl.

²Ẹkẹvuọvo wẹ, E Bẹtlẹhẹm Efrata, wẹ re ma hanvwe vwẹ usun rẹ uvwiẹ ri Juda, oma wẹ ọye ohwo ọvo che nurhe kẹ vwẹ rọ cha dia osun vwẹ Izrẹl, ohwo rọ herọ nẹ awanre rhe, nẹ ọke re rhabae rhe.

³Fiki rẹ ọtiọye na ke siobọ nẹ ayen bẹsiẹ rẹ ọke na vwo te bẹsiẹ rẹ ohwo rọ chuẹ uvwiẹ na vwo vwiẹ nu; Etiyin iniọvo rọye ejobi ki che rhivwi bru ihwo rẹ Izrẹl ra.

⁴Ko vrẹn mudia ghẹrẹ igegede rọye vwẹ ogangan rẹ Ọrovwohwo na, vwẹ ọrhọ rẹ odẹ rẹ Ọrovwohwo Ọghẹnẹ rọye. kọ cha dia vwẹ egbemọphẹ, vwẹ ọke yena kọ cha rho re duvwu ẹtan rẹ akpọ na.

⁵Ọnana kọ dia ufuoma, vwẹ ọke rẹ Asiria da rhe otọ rẹ avwanre rhi chiyi otọ rẹ avwanre, avwanre ki se isun igodẹ ighwrẹ kẹ kugbe isun ẹrenre;

⁶ọlọkọ kọye ayen che vwo sun otọ rẹ Asiria, otọ ri Nimrọd vẹ ọlọkọ re yoro phia; ayen ki che sivwi avwanre mie Asiria vwẹ ọke rọ da rhe otọ rẹ avwanre ro de rhi chiyi ughwru rẹ avwanre.

⁷Etiyin umuku ri Jekọp ro chekọ ke cha dia ohri rẹ ihwo buebu kerẹ evwru ro tue nẹ obọ rẹ Ọrovwohwo cha, kerẹ omoghwẹghwẹ osio vwẹ enu rẹ odi, ro mudia hẹrhẹ ihwo-o, eyẹ ọ hẹrhẹ emọ rẹ ihwo-o.

⁸Umuku ri Jekọp ro chekọ ke cha dia ohri rẹ ẹgborho na, vwẹ ohri rẹ ihwo buebu, kerẹ okpohrokpo vwẹ ohri rẹ eranvwe rẹ aghwa, kerẹ upene rẹ okpohrokpo vwẹ ohri rẹ ekru rẹ igegede, ọ da dianẹ ẹ wanvrẹn, ko chiyi ayen muotọ ọ me chẹghẹ kẹnẹ kẹnẹ, o rhe vwo ohwo ro sivwo-o.

⁹Obọ wẹn kọ kpare kpenu vwẹ enu rẹ ukọn wẹn ivwighrẹ wẹn ejobi ka nyavwe ayen kufia.

¹⁰Vwẹ ẹdẹ yena, eriyin Ọrovwohwo tare, ke Me nyavwe iyesi re hẹ ohri wẹn kufia ke Me guọghọ ekpẹrẹ wẹn kufia;

¹¹ke Me guọghọ irere rẹ otọ wẹn kufia ki mi kporo egba ọgangan wẹn she;

¹²ke Me nyavwe ihwo re mraro vwẹ otọ wẹn kufia wo gbi che vwo ihwo re mraro ọfa-a;

¹³ke Me nyavwe ema wẹn kufia osusu na ki nẹ ohri rẹ ovwan, wo gbi gbe uyovwi phihọ otọ ke iruo re obọ wẹn ọfa-a;

¹⁴ki mi che ghwie ighriki na nẹ ohri rẹ ovwan ayen Me guọghọ irere rẹ ovwan.

¹⁵Vwẹ ivuemiovwo vẹ ophu mẹ ke Me reihri vwẹ obọ rẹ ẹgborho ri jẹ ọghọ emuo.