Read urhobo Habakọk 1 Bible Online

Habakọk 1 - urhobo bible

Habakọk 1

¹Epha rẹ Ọghẹnẹ ri Habakọk rẹ ọmraro na bọre.

²E Ọrovwohwo, mavọ o krite ri mi vwo kperi se ọchuko, yu wo nyo-o? Eyẹrẹ kperi se we nẹ Ozighi, yu wo se sivwẹ-ẹ?

³Die wọ vwọ nẹrhẹ ovwẹ mrẹ oruchọ re me vwọ kparo nẹ ukpokpogho? Eghwọrọ vẹ ozighi gbere obaro kẹ vwẹ; ẹghwọ vẹ aphro vwọ kpahe ovwẹ chachacha.

⁴Ọtiọye na urhi na kọ doghobọ ọsoso gbe vwẹ oma phia-a. Kidie ohwo umwemwu sogodogo riariẹ ọvwata na, e de ku ọsoso na rhẹriẹ.

⁵Ni ohri rẹ ẹgborho na, re wọ mrẹ; jo gbe we unu re ofu dje we. Kidie mi re ru iruo vwẹ ọke wẹn ra da ta kẹ wẹ wọ che segbuyota-a.

⁶Kidie nighere, me kpare ihwo ri Kaldia cha, ẹgborho gudugudu ro muenu, ri nẹ udje wan asan rẹ otọ na hẹri te ejobi, ri gborho ẹdia rẹ ihwo efa.

⁷Ihwo ri mu udidi ri mu oshọ; ọsoso rayen kugbe ọrho yoro nẹ ayen oma cha.

⁸Iyesi rayen djẹ onẹ phẹre nọ edjanakpo, i muoshọ nẹ ikpohrokpo rẹ ovwọnvwọn; otu re gua iyesi rayen ra gọlọ hẹ obaro. Uyota, otu re gua iyesi rayen ogboko i nurhe, e rhan kerẹ ugo rọ mrẹ obo ro re fru.

⁹Fiki rẹ ozighi ayen vwọ rhe; uguegue rẹ ayen ka obaro kẹ ayen. Ayen mu ighuvwu ka obaro kẹ ayen.

¹⁰Ayen mienu phihọ ivie, ayen ke vwẹ otu rẹ isun na jehwẹ, ayen ke vwẹ ogba ogangan rẹ ayen gbare jehwẹ, kidie ayen mu ekpẹn nyẹ ayen da ruọ.

¹¹Etiyin ayen de hwerhe vrẹn kerẹ odju ayen da yan he obaro, ihwo re re abe, rẹ ẹgba rayen hirhe phihọ ọghẹnẹ kẹ ayen.

¹²Ọ dia owẹ re herọ rhiri bẹdẹ, E Ọrovwohwo Ọghẹnẹ mẹ, Ọfuanfọn Ọvuọvo mẹ na? Avwanre che ghwu-u, E Ọrovwohwo, wẹ re vwẹ ayen mu kerẹ ẹdjọeguo; Wẹ, E Oragha, wẹ re vwẹ ayen mu vwọ kẹ efafa.

¹³Wẹ rẹ ẹro rọye fon nọ o rhe ju we vwo ni umiovwo-o, o rhe ju we vwo ni obo re chọre-e, kidie wo rhe nẹ ihwo ri je segbuyota, ru wọ vwọ fọ rẹ ihwo umwemwu vwo mu vwe rọ ohwo rọ dia ọvwata nọ?

¹⁴Kidie wọ ma ihwo rẹ akpọ kerẹ eri rẹ abadi, kerẹ eravwọ ri kpono ri vwo osu-un.

¹⁵Ọ da vwẹ oghọre sa ayen ejobi, ọ da vwẹ ariri kpono ayen rhe, ugodo rẹ ariri na da jẹ phihọ ayen; ọtiọye na kọ ghọghọ ko mu oma kpenu.

¹⁶Fiki rẹ ọtiọye na ko ze izobo kẹ ariri rọye kọ tọrhẹ insẹns kẹ ugodo rẹ ariri rọye, kidie ayen ọ vwọ re akpọ, emu rọ ria pha tẹgbẹ yoyovwi.

¹⁷Ọ gba vwi kẹdẹ kẹdẹ siẹ iyeri nẹ ariri rọye, o gbe di hwe ẹgborho na ekueku bẹdẹ?