Read urhobo Habakọk 2 Bible Online

Habakọk 2 - urhobo bible

Habakọk 2

¹Mi mudia re me rhẹrẹ, re me gbrọ phihọ enu rẹ ohẹrhẹ na, re me kerhọn rẹ obo rọ cha ta kẹ vwẹ, vẹ obo re mẹ cha kpahe phihọ iguegu mẹ.

²Ọrovwohwo da kpahe kẹ vwẹ: Si emramrẹ na, sio phephẹ vwẹ enu rẹ ọbe, rere ohwo rọ djẹ wan se se.

³Kidie emramrẹ na je hẹrhẹ ọke rọye; o re broma kpo obo oba, ọ cha vwọrọn efia-an. Ọ da dianẹ o gbẹ egherẹ, hẹrhẹ; o che jẹ ẹcha-a, o che krinọ-ọ.

⁴Nighe, ohwo rẹ udu rọyẹ dia ọsoso-o chẹ she, ẹkẹvuọvo ọvwata kọ rhọ fiki rẹ esegbuyo-ta rọye.

⁵Ọ rọ marho, udi vwenẹ emu rẹ ogbarogba; ohwo rọ phoma cha sa dia-a. Urhuru ẹvwo rọye epha ghwọrọ kerẹ Erivwi; kerẹ ughwu evun vọ-ọn. Ọ ghwẹ ẹgbọrhọ rẹ akpọ na ejobi koko kẹ oma rọye, o mi toro ihwo na ejobi koko kẹ oma rọye.

⁶Enana ejobi na rha vwọ jehwẹ, rẹ ayen da mienu phihọ, tanẹ, Ekan kẹ ohwo rọ ghwẹ emu koko yẹ obo rọ ghwẹ koko na dia ọrọye-e — mavọ o krite? — ro de kru oghwa rẹ iviẹnwan nyẹ oma rọye!

⁷Ihwo ru wo re esa che phorhe ẹsiẹvuọvo e re rhọvwọrhe cha djẹ uguegue mu we-e? Ọke yena ku wọ dia emu rẹ uji kẹ ayen.

⁸Fikiridie wo gborho ẹgborho buebu, umuku rẹ ihwo ri chekọ ki che gborho uwe, fiki rẹ ọbara rẹ ihwo kugbe ozighi wo gbe vwẹ otọ na, ru wọ gbe vwẹ irere kugbe ihwo re dia evun rayen.

⁹Ekan kẹ ohwo rọ ghwẹ erere umwemwu phihọ uwevwi rọye, rọ bọn ẹho rọye phihọ ọbenu, rere obọ vwọ je te kpokpo.

¹⁰Wọwẹ ọvo rhe vwẹ omaẹvuọ kẹ uwevwi wẹn ru wọ vwọ nyavwẹ ihwo buebu kufia, wọ reyọ arhọ wẹn vwọ hwa osa.

¹¹Kidie ubioragha na che kperi nẹ igbẹhẹ rhe, ugbere re bru ona phihọ kọ cha kpahe kẹ.

¹²Ekan kẹ ohwo rọ vwẹ ọbara bọn ọrhọ, rọ tọn orere phihọ enu rẹ orukuruku!

¹³Nighere, ọ dia obọ rẹ Ọrovwohwo rẹ otuofovwi na o nurhe nẹ ihwo de wian kẹ erhanre torhẹ, nẹ ẹgborho de laghe oma ghevweghe?

¹⁴Kidie otọ na cha vọn vẹ erianriẹn rẹ urinrin rẹ Ọrovwohwo na, kirobo rẹ ame phoro abadi na.

¹⁵Ekan kẹ ohwo rọ riẹriẹ ọrivẹ rọyc phihọ udi ẹda vwẹ ukọ rẹ ophu rọye, rọ da nẹrhẹ idi muọ, rere ọ de bẹrẹ ẹro ni omaẹvuọ rayen!

¹⁶Ehwẹjẹ kọ che dje we ọvẹn ọ rha dia urinri-nn. Da udi, phihọ oma wen, rere wo gele! Uko rọ hẹ obọrhe rẹ Ọrovwohwo na kọ cha riẹriẹ owẹ phihọ, omaẹvuọ kọ che rhurhu urinrin wẹn!

¹⁷Emu ozighi re ru ki Lẹbanọn ko che shenyẹ wẹn; ẹghwọrọ rẹ eranvwe na kọ cha djẹ uguegue mu we, fiki rẹ ọbara rẹ ihwo kugbe ozighi re gbe vwẹ otọ na, ke irere kugbe ihwo re dia evun rẹ ayen.

¹⁸Didi erere ọye oma vwori ọke rẹ ọwena na da kparọ, oma rẹ utehru, oyono rẹ efian? Kidie ọwena na vwẹ ẹro so obo rẹ ọye ọvo kare ọke rọ da kare oma ro diunu!

¹⁹Ekan kẹ ohwo ro ta kẹ urhe rọ kare, nẹ Rhọvwọ rọ ta kẹ oragha ro diunu nẹ, Vrẹn! ọnana se dje otọ rẹ emu phia? Nighe, a nabọ vwẹ oro vẹ idọnọ efuanfon vwọ pharọ o vwo ẹnwẹn vwẹ oma rọye kaka-a.

²⁰Ẹkẹvuọvo yẹ Ọrovwohwo hẹ evun rẹ uwevwi ọfuanfon rọye e jẹn akpọ na ejobi fọ riẹi vwẹ obaro rọye.