Read urhobo Habakọk 3 Bible Online

Habakọk 3 - urhobo bible

Habakọk 3

¹Ẹrhovwo ri Habakọk rẹ ọmraro na, kirobo ri Shigiọnot siro.

²E Ọrovwohwo, mi nyo iyẹnrẹ wẹn, iruo wẹn, E Ọrovwohwo, me djẹ oshọ rọye. Vwẹ uherevie rẹ ukpe na gba rhiọ; vwẹ uherevie rẹ ukpe na gba vwọ phia re a riẹn, vwẹ evun rẹ ophu biko karohọ arodọvwẹ.

³Ọghẹnẹ nẹ Teman rhe, Ọfuanfon Ọvuọvo na nẹ Ugbenu ri Paran rhe. Urinrin rọye rhurhu odjuvwu na, akpọ na ejobi da vọn vẹ ejiro rọye.

⁴Elo rọye kerẹ urhukpẹ ọ rọ sa edada nẹ abọ rọye cha; kẹ etiyin ọ da vwẹ ogangan rọye nẹ.

⁵Ọtiekọ ka obaro kẹ, edagbo-dagbo re nene ukuko.

⁶O mudia ọ da vwanvwẹ akpọ na; o niro o de mu ẹgborho na kpogho; etiyin igbenu ri bẹdẹ na da hra, igbenu itete re rhabae na de she divwi. Idjerhe rọye je herọ kirobo rọ epha nẹ awanre rhe.

⁷Me da mrẹ itughẹ ri Kushan re hẹ ukpokpogho, emwa rẹ inurhoro rẹ otọ ri Midian ki muẹ phariẹ.

⁸Irhie na wo muẹ ophu kpahe, E Ọrovwohwo? ku wo muẹ ophu kpahe irhie na, ghenẹ ivun miovwo uwe vwọ kpahe abadi na, ọke ru wọ da gua vwẹ enu rẹ iyesi wẹn, vwẹ enu rẹ ekpẹrẹ rẹ obọ ẹkparọ wẹn?

⁹Wo yoro umurhabọ wẹn nẹ evun rẹ akọ rọye, wọ da vwẹ edada na te ufi na. Wọ da vwẹ irhie na gbanẹ otọ na.

¹⁰Igbenu na mrẹ wẹ, ki muẹ oma chahe, ame rọ họnra na ra djẹ phihọ obaro, asan ikokodo na de kperi urhuru phia, ọ kpare obọ rọye kpenu.

¹¹Ọnre vẹ emeranvwe de mudia fọ vwẹ ẹdia rayen vwẹ urhukpẹ rẹ edada wẹn ra sa yanran na, vwẹ asan rẹ ubiri wẹn da nyavwaro.

¹²Wẹ re zagha otọ na vwẹ ivuemiovwo wẹn, wọ da vwẹ ọphu wẹn chiyi ẹgborho na muotọ.

¹³Fiki rẹ esivwo rẹ ihwo wẹn wọ vwọ yan phia, fiki rẹ esivwo rẹ ohwo ru wọ vwẹ evwri ghworo. Wọ guọghọ uyovwi rẹ ohwo umwemwu na, wọ da ghwiẹ emwa no nẹ ekpoghowọ ri te ohọre.

¹⁴Wọ da vwẹ ugbẹn rẹ ọgba vwo duvwu uyovwi rẹ ọgba ofovwi na fi, re rhere kere ogiribo rhe hra vwẹ, rọ ghọghọ kerẹsiẹ ra da bẹbẹ mu ovwiọgbere rọ.

¹⁵Wọ vwẹ iyesi wẹn muẹ abadi chiyẹ, ọgbogho rẹ ame rode.

¹⁶Mi vwo nyo, oma me kọ phariẹ, ẹbẹrunu mẹ ko muẹ phariẹ; ibeku mẹ ki di muẹ gbo, awọ mẹ ki di muẹ phariẹ. Mi mudia gbiẹi herhẹ ẹdẹ rẹ ukpokpogho che vwo she vwa ihwo re kparẹ ofovwi bru avwanre rhe.

¹⁷Owenẹ urhe ri fig rha kpa ipho dede-e, eyẹ ibi gbe hẹ enu ri vai-in, rẹ urhe rẹ oliv gbe mọ-ọ re idju na gbi yovwi emu-u ro gbi vwo ekru rẹ eranvwe vwẹ erhu-u,

¹⁸ye me je ghọghọ vwẹ oma rẹ Ọrovwohwo ghene, mi vwo aghọghọ vwẹ oma rẹ Ọghẹnẹ rẹ esivwo mẹ.

¹⁹Ọghẹnẹ, Ọrovwohwo ọye ogangan mẹ, ọye re ma awọ mẹ kerẹ awọ rẹ uzọ, ọye re nẹrhẹ ovwẹ chiyi asan ro kpenu.